Banka Evropiane për Rindërtim dhe Zhvillim (BERZH), do të financojë për rehabilitimin e sistemit të transmetimit të energjisë elektrike në vend. Drejtori i Përgjithshëm i KESH-it, Andi Beli dhe zëvendëspresidenti i BERZH-it, Varel Freeman, kanë firmosur dje marrëveshjen e huasë. Kredia e dhënë arrin në shumën e 16 milionë eurove. Me anë të kësaj kredie do të bëhet i mundur rehabilitimi i nënstacioneve të transmetimit të energjisë. Pra do të zëvendësohen pajisjet e teknologjisë së vjetër, me pajisje bashkëkohore, të cilat do të ndikojnë në përmirësimin me energji elektrike. Nga ky projekt do të përfitojnë nënstacioni i Fierzës, i Komanit, i Vaut të Dejës, Burrelit dhe Elbasanit.
Kredia
Ministri i Financave ka nënshkruar dje marrëveshjen e garancisë ndërmjet Republikës së Shqipërisë, me Zv/Presidentin e BERZH-it, Varel Freeman. Po dje u firmos edhe marrëveshja e huasë ndërmjet Korporatës Elektroenergjetike Shqiptare, përfaqësuar nga Andi Beli dhe përfaqësuesi i BERZH-it. Kredia prej 16 milionë eurosh do të akordohet për projektin e rehabilitimit të nënstacioneve të transmetimit të energjisë, me qëllim zëvendësimin e pajisjeve të teknologjisë së vjetër me pajisje bashkëkohore në nënstacionet Fierzë, Koman dhe Vau i Dejës, Burreli dhe Elbasani. “Unë gjej rastin këtu për të falënderuar përfaqësuesin e BERZH-it, i cili iu bashkëngjit këtij projekti dhe bëri të mundur plotësimin e tij”, - tha ministri i Financave Ridvan Bode, pas nënshkrimit të marrëveshjes. Ndërkohë, përfaqësuesi i BERZH-it, Freeman theksoi vendosmërinë e Bankës Evropiane për Rindërtim dhe Zhvillim, për të qenë aktivë me të tjera programe mbështetëse për qeverinë dhe sektorin privat në Shqipëri.
Projekti
Kostoja totale e këtij projekti arrin në 52.14 milionë dollarë. Bashkëfinancuesit e këtij projekti janë, Shoqata Ndërkombëtare për Zhvillim (IDA) me 27 milionë dollarë, hua e cila është bërë efektive në vitin 2005. Një tjetër bashkëfinancues është BERZH-i me 20 milion dollarë ose 16 milionë euro, si edhe Korporata me 5.14 milionë dollarë. Kredia e dhënë nga BERZH-i ka një afat maturimi prej 12 vjetësh, periudha grace është 3 vjet, interesi është Euribor +1 për qind, komisioni i angazhimit është 0.5 për qind në vit, si dhe data e mbylljes është 31.12.2009.
BERZH
Banka Evropiane për Rindërtim dhe Zhvillim është një ndër financuesit kryesorë të projekteve strategjikë të vendit. Deri më tani BERZH–i ka financuar mbi 300 milionë euro në Shqipëri, ku një e treta e të cilave është dhënë për sektorin energjetik, ndërsa pjesa tjetër është përdorur për infrastrukturën, financat dhe sektorin privat.