Nga data 1 dhjetor 2006 fillojnë dhe reduktohen në mënyrë graduale të gjitha tarifat doganore të tregtisë mes Shqipërisë dhe Bashkimit Evropian. Burime të rezervuara në zyrën e shtypit të Ministrisë së Integrimit bënë të ditur se me datën 1 dhjetor 2006, do të hyjë përfundimisht në fuqi Marrëveshja e Ndërmjetme, ose siç njihet ndryshe, pjesa tregtare e Marrëveshjes së Stabilizim-Asociimit. Kjo do të thotë se që nga kjo datë do të ulen në mënyrë graduale tarifat doganore të tregtisë mes BE-së dhe Shqipërisë në harkun kohor të viteve 2006-2011. Ndërsa për disa prodhime industriale, tarifa doganore bëhen menjëherë zero. Makinat e reja nuk do të paguajnë taksë doganore, duke përfituar nga kjo marrëveshje, e cila i njeh të drejtën autoveturave të reja që vijnë nga BE-ja të kalojnë me tarifa zero në doganën shqiptare. Ndërkohë që nuk do ta kenë këtë fat makinat e vjetra. Atyre do t’u duhet të paguajnë 15% të taksës doganore.
Ndërkaq, pritet që të liberalizohen edhe rreth 93% të produkteve bujqësore, disa prej të cilave do të hyjnë që në fillim pa taksë doganore, ndërsa mjaft të tjera do t’u nënshtrohen një serie kategorish taksimi, me tendencë ulje graduale të tarifave doganore.
Humbjet
Qeveria shqiptare, pas disa shtyrjeve, ka notifikuar tashmë Marrëveshjen “Interim”, e cila do të nisë të zbatohet sipas të gjitha procedurave, duke filluar nga data 1 dhjetor 2006. Por ky reduktim i tarifave doganore pritet të shkaktojë jo pak humbje në buxhetin e shtetit, në planin e të ardhurave nga doganat. Kjo ka qenë dhe një nga arsyet se përse qeveria shqiptare e dërgoi me vonesë marrëveshjen për ratifikim në Kuvend. Duke qenë se reduktimi i tarifave doganore do të shkaktojë humbje jo të vogla, Ministria e Financave mësohet se është duke përgatitur një plan veprimi për të mbuluar efektet financiare. Mbulimi i këtyre efekteve financiare pritet të shoqërohet me rritjen e akcizave për shumë produkte që do importohen nga vendet e BE-së. Hapat e hedhura nga Ministria e Financave janë mjaft të ngadalta në këtë drejtim. Ajo me kohë duhet të kishte paraqitur plan-veprimin për mbulimin e humbjeve që do të shkaktojë reduktimi i tarifave doganore. Që pas nënshkrimit të MSA opozita protestoi në kuvend që kjo marrëveshje, sipas MSA nuk hyri në fuqi menjëherë. Presioni i madh i BE ka çuar në vendimmarrjen e qeverisë. Kjo marrëveshje nuk ratifikohet nga të 25 parlamentet e vendeve anëtare të BE-së. Ajo ratifikohet nga Parlamenti shqiptar dhe aprovohet nga Sekretariati i Përgjithshëm i Këshillit të Bashkimit Evropian.

• Përfitimet
  Marrëveshja e Ndërmjetme që do të hyjë në fuqi më 1 dhjetor, parashikon të mos vendosen më detyrime doganore të reja për importet ose eksportet, ose tarifa të reja me efekt të njëjtë me to dhe nuk rriten as ato që zbatohen tashmë në tregtinë ndërmjet Komunitetit dhe Shqipërisë. Që nga kjo datë do të bëhet pezullimi i masave kufizuese të reja në tregtinë ndërmjet Shqipërisë dhe KE-së.
  
• Ulja
  Ulja graduale e tarifave doganore pritet të zgjasë për një periudhë pesëvjeçare. Masa e reduktimit do të fillojë me 80%, derisa sa të bëhet zero pas 5 vjetësh. Tarifat doganore do të fillojnë të reduktohen në masën 80% të taksës bazë që në datën e hyrjes në fuqi të marrëveshjes, dhe me 1 janar të vitit të pestë pas hyrjes në fuqi të marrëveshjes, tarifat e mbetura të importit do të hiqen.
  
• Industriale
  Gjatë negocimit mbi shkallën e liberalizimit të produkteve, është ndjekur një logjikë e tillë negocimi. Produktet industriale janë ndarë në dy kategori: jo sensitive – tarifat doganore të importit bëhen menjëherë 0%; mesatarisht sensitive – tarifat doganore reduktohen në mënyrë të përshkallëzuar për një periudhë pesëvjeçare.
  
• Makinat
  Për makinat e reja do të fillojë reduktimi i taksës doganore, duke përfituar nga MSA-ja, që i njeh të drejtën autoveturave të reja që vijnë nga BE-ja të kalojnë me tarifa zero doganën shqiptare. Ndërkohë që nuk do ta kenë këtë fat makinat e vjetra që do t’u duhet të paguajnë 15 për qindëshin e taksës doganore.
  
• Bujqësia  
  Produktet bujqësore ndahen në produkte primare bujqësore dhe produkte të përpunuara bujqësore. Ato janë grupuar në tre kategori: jo sensitive – tarifat doganore të importit bëhen menjëherë 0%; mesatarisht sensitive – tarifat doganore reduktohen në mënyrë të përshkallëzuar për një periudhë pesëvjeçare; shumë sensitive - tarifat doganore nuk ndryshojnë. Përqindja e liberalizimit për produktet e përpunuara bujqësore, është afërsisht 93 %.