Dy ditë do të kenë në dispozicion kandidatët për të depozituar kërkesat e tyre në fakultete. Më datë 11 dhe 12 tetor, sekretaritë do të jenë hapur për ata që paraqesin kërkesë për t’u futur në shkollë të lartë.

Këta do të kenë edhe shansin të fitojnë statusin e studentit. Ministria e Arsimit ka pranuar më në fund pasditen e djeshme propozimin e ri të rektorëve të universiteteve. Ata kërkuan që vendet e mbetura bosh, pas raundit të fundit të seleksionimit, të plotësohen nga ata kandidatë që janë poshtë vijës së kuqe dhe që do të depozitojnë kërkesë pranë fakultetit, ose degës ku ata janë regjistruar, por ku deri tani nuk kanë mundur të shpallen fitues. Këtë propozim edhe MASH e ka mirëpritur me idenë që edhe pse ka kuota të lira, ato sërish i përkasin universiteteve. Sot do të përcaktohen pikat përfundimtare të udhëzimit i cili do t’u përcillet universiteteve.

DYNDJE NE SEKRETARI
Dyndje në dyert e Ministrisë së Arsimit dhe fakulteteve. Shumë prindër dhe kandidatë kanë kërkuar që të depozitojnë kërkesat e tyre për t’u regjistruar në degën ku kanë konkurruar, por nuk kanë fituar. Dyert e sekretarive kanë qenë të mbyllura për regjistrimet dhe sekretaret jo vetëm që nuk kanë pranuar kërkesat e kandidatëve, por u kanë thënë që me këtë punë do të merret Ministria e Arsimit. Të shqetësuar për fatin e fëmijëve të tyre ata janë drejtuar edhe në Ministrinë e Arsimit, ku çdo ditë pas orës 13:00 mund të konsultohen me një prej specialistëve të arsimit të lartë në këtë drejtori. Por as këtu s’kanë gjetur mirëkuptim. “Nuk na thonë asgjë. Nga fakulteti po vijmë dhe na thonë që duhet të shkojmë në degën e fakultetit për t’u interesuar. Ne kemi ardhur nga Skrapari. Djali im ka mbaruar me mesatare 8.5 në shkollë ekonomike dhe nuk mund të regjistrohet akoma në fakultetin Ekonomik”, thotë një prind.
Plot 350 kuota bosh kanë mbetur të lira në degët e fakulteteve të Universitetit të Tiranës edhe pas raundit të fundit të shpallur nga Ministria e Arsimit. Shuma kandidatë janë çregjistruar nga një degë dhe kanë kaluar në një degë tjetër të preferuar ku edhe u ka dalë emri për t’u shpallur fitues, ndërsa të tjerë janë regjistruar në degët që deri tani kishin mbetur të papreferuara.

FILLIMVITI AKADEMIK
Pjesa tjetër e studentëve të vitit të parë kanë nisur dje vitin e ri akademik. Vetë kryeministri Berisha dhe ministri i Arsimit Genc Pollo morën pjesë në ceremoninë e hapjes së Universitetit Publik “Aleksandër Moisiu”, në Durrës. Universiteti i Durrësit pret në vitin e parë akademik të tij 1030 studentë nga qytete të ndryshme. “Dua t’i siguroj se qeveria do të bëjë çdo përpjekje për suksesin e reformës së arsimit të lartë. Qeveria është e vendosur të dyfishojë në 4 vjet buxhetin, në mënyrë që të shkëputemi me shpejtësi nga ai degradim që arsimi njohu në regjimin kleptokratik, regjim i cili përgjysmoi buxhetin për arsimin e lartë dhe arsimin shqiptar në tërësi”, tha Berisha. Sipas tij, nga 2.1 që ishte në vitin 2005, sot buxheti për arsimin arrin në 3.3 të prodhimit të përgjithshëm të vendit. “Asgjë nuk do na ndalojë ne pa kaluar në 4 dhe mbi 4 për qind të prodhimit të përgjithshëm të vendit”, tha Berisha..

Korçë, 350 vende bosh

KORÇE - Dita e djeshme ka shënuar fillimin e mësimit edhe në Universitetin “Fan S.Noli” në Korçë. Këtë vit akademik në auditorët e tij do të ulen 4200 studentë, prej të cilëve 850 në vitet e para të katër fakulteteve të tij: Mësuesi, Agronomi, Ekonomik dhe Shkollën e Lartë të Infermierisë. Drejtuesit e këtij universiteti gjatë ceremonisë së fillimit të vitit të ri akademik kanë bërë të ditur se regjistrimet në këtë tempull të dijes do të vazhdojnë edhe gjatë javës së parë të fillimit të mësimit. Kjo për faktin se, sipas tyre, janë ende edhe 350 vende të paplotësuara në të gjitha fakultetet e këtij universiteti. Fakulteti më i preferuar si edhe në vitet e kaluara mbetet ai i Mësuesisë, ku ka pasur edhe dyndje më të madhe studentësh, shumica e të cilëve vajza. Po edhe këtu ka kuota të paplotësuara. Vende të lira ka edhe në tre fakultetet e tjerë. Bëhet e ditur se në këtë universitet punojnë 100 pedagogë të përhershëm dhe 160 të tjerë me kohë të pjesshme. j.gj.

Shkodër, mësim edhe natën

SHKODER - Universiteti i Shkodrës hap dyert për rreth 11 mijë studentë, ku nga këto 7 mijë të sistemit të ditës, ndërkohë që në të ndjekin studimet edhe 4 mijë të tjerë me kohë të pjesshme dhe korrespondencë. Për herë të parë në auditorët e këtij universiteti do të ulen 1800 studentë. Gjithsej universiteti i  Shkodrës “Luigj Gurakuqi” ka 6 fakultete dhe 22 degë. Sipas rektorit të këtij universiteti, Mahir Hoti, ky vit, duke parë edhe sfidat e konkurrencën e universiteteve të tjera, ishte një provë për Universitetin e Shkodrës. Sipas rektorit Hoti: “Fakti që sivjet janë regjistruar 200 studentë më shumë se një vit më parë, tregon se ne kemi fizionominë tonë”. Mungesa e ambienteve do të jetë mesa duket një problem që do ta shoqërojë sërish Universitetin e Shkodrës. Tre fakultete këtë vit do të bëjnë mësim me turne. Zhvillimi i mësimit pasdite deri në orën 20:30  ka bërë që rektorati i universitetit të kërkojë nga drejtuesit e KESH-it furnizimin pa ndërprerje me energji elektrike.

vlore, Çel dyert universiteti
Janë çelur dje dyert për fillimin e vitit të ri akademik, 2006-2007, edhe në universitetin "Ismail Qemali". Në fjalën e tij rektori, Bilal Shkurtaj, ka uruar studentët për një vit të mbarë, si dhe u ka uruar mirëseardhjen për herë të parë të 1682 studentëve të rinj, të cilët kanë fituar statusin e studentin, duke e çuar në total numrin e studenteve të cilët e frekuentojnë atë me kohë të plotë në 6530 studentë. Sipas Shkurtajt, në sistemin me kohë të pjesshme janë rreth 1012 studentë më tepër se një vit më parë dhe këto janë ambiciet për zgjerimin e universitetit, i cili me plotësimin e vendeve të mbetura bosh në disa degë dhe njëkohësisht me studentët që do të shtohen në vazhdim me degët e dyta, apo edhe part time-in numri në total i studentëve mund të shkojë në rreth 10 mijë studentë.