Avokati i njohur, deputeti i PD-s, Spartak Ngjela, u shpreh dje pro hapjes së dosjeve të komunizmit dhe vendosjes së moralitetit në trajtimin e kësaj çështjeje.

Ngjela kërkoi pajtim kombëtar, pasi kemi njohur defektet e moralitetit të historisë shqiptare. Gjithashtu ai tha se kërkohet kurajë qytetare që të hapen dosjet për të parë njëri-tjetrin në sy normalisht dhe të mos lejojmë politikën që të shpifë. Ngjela akuzoi deputetë të Kuvendit, duke u shprehur se “punistët në sallë po tentojnë t’i japin pafajësi të dënuarve të regjimit të komunizmit”. Avokati i njohur kërkoi nga Parlamenti dhe historia që për ish të përndjekurit e regjimit të mos përdoret termi “viktimë”, pasi sipas tij ata janë fitimtarët që përmbysën të parët regjimin komunist. “Ka ardhur koha të diskutojmë në një sens tjetër. Nuk është normale dhe nuk duhet lejuar që në diskutime, në përkrahje hapur në libra, të mbahet fjala “viktimë e komunizmit”. Absolutisht! Unë kam eksperiencën time dhe nuk ka pasur fare viktima, por luftëtarë të vendosur kundër komunizmit, që janë rreshtuar për nder të popullit të tyre, janë rreshtuar kundër me falangat e mëdha antikomuniste që drejtonin betejat e mëdha në një rrugë 50-vjeçare, që nga Roma deri në Uashington, që nga Boni në Uashington dhe janë krenarë se nuk janë viktima, por janë bashkuar me forcën më të madhe të demokracisë liberale dhe kanë fituar”, tha Ngjela. Avokati i njohur demokrat e cilësoi trajtimin e deritanishëm të kësaj shtrese të shoqërisë si lëmoshë. “Kurse këtu ka 15 vjet që humbësit, të humburit në një betejë vijnë dhe trajtojnë si viktima fitimtarët. Eshtë i pari Parlament në botë që fitimtarët i trajton si viktima. Jo!”, u shpreh Ngjela. Sipas avokatit, “Demokracia liberale ende nuk është vendosur në Shqipëri dhe një nga arsyet pse nuk është vendosur është se i humburi ka dalë si fitimtar”. “Ç’është kjo lëmoshë për viktimat? Absolutisht! Ky është një detyrim që i munduri duhet t’i japë fitimtarit, pasi është mundur në luftë, kurse këtu i munduri vjen dhe kërkon t’i japë lëmosha fitimtarit. Ky është ekuacioni që duhet ndërruar në këtë sallë dhe do ta ndërrojmë”, tha Ngjela.

Lustracioni
Diskutimi i avokatit të njohur, si një nga vuajtësit e regjimit komunist, ishte i vetmi në këtë frymë ndër të gjithë deputetët e maxhorancës. Ngjela kërkoi zbardhjen e të gjitha krimeve dhe personave përgjegjës të krimeve të komunizmit. “Jam dakord se në Shqipëri nuk është bërë lustracioni, i cili kërkon moral për ta bërë. “Ky proces, duhet të bëhet, siç u bë lufta e klasave, ashtu siç e kanë përdorur ndonjëherë në këtë Parlament. Jo zotërinj! Lustracion do të thotë moralitet! Që të vendosësh lustracion, duhet të njohësh më parë defektet që i ke shkaktuar shoqërisë, qoftë dhe në një masë të vogël dhe jo në një masë kaq të madhe që nuk mbaron vetëm me të përndjekurit politikë që kanë vuajtur nëpër burgje”, tha Ngjela. “Është shumë më e gjatë, shumë më e thellë dhe shumë më e rëndë se kaq, ai që unë me të drejtë e kam quajtur terror shtetëror dhe që herë pas here i them piramidë e Enver Hoxhës ose e punizmit. Ajo nuk është më një gjëmë e vogël, një gjëmë ose një fatkeqësi e një shtrese, ajo është një tragjedi e madhe kombëtare, e cila për të krijuar frikën terrorin, punën e detyruar si në piramidat e Egjiptit duhej të persekutonte ata që e kundërshtonin regjimin me verbin e tyre”, përfundoi avokati.

Braçe me bustin e Berishës në Kuvend

Deputeti socialist, Erjon Braçe, gjatë fjalës së tij në Parlament ka deklaruar se kryeministri, Sali Berisha, nuk ka të drejtë morale që të diskutojë mbi krimet e komunizmit pasi, sipas tij, ka qenë një përfaqësues i komunistëve. “Këtë debat e ka iniciuar një përfaqësues i regjimit punist, një përfaqësues i lartë i pushtetit të sotëm, që tashmë i ka ardhur koha të ikë. Punistët vazhdojnë ende të japin mëshirë”, deklaroi Braçe. Ai bëri të ditur se dëgjoi diskutimin e kryeministrit në mbledhjen e grupit parlamentar të PD-së dhe se u habit nga sulmet e tij ndaj përfaqësuesve të dhjetorit ’90, Ilir Meta dhe Edi Rama. “Rrugës po ecja dhe papritur pashë një njeri që shiste bustin e kryeministrit, kushtonte një mijë lekë. Pas rrëzimit të perdes së hekurt të komunizmit është i vetmi kryeministër në Evropë që të ketë një bust të tillë. Eshtë turp që kryeministri i Shqipërisë mbart mbi vetë atë që demortizohet. Pra, ai që ka lënë rininë që e mori partia dhe që u kujdes si doktor për partinë, ka moral të vijë dhe të bëjë debat këtu”, deklaroi Braçe. Deputeti socialist në fjalën e tij i ka kërkuar ndjesë deputetit demokrat, Spartak Ngjela, për sulmet që ai ka ndërmarrë në adresë të tij gjatë botimeve të shkrimeve.

Anëtari i kryesisë së PS kërkoi të hapen dosjet e politikanëve dhe funksionarëve

Dokle: Të hapen dosjet e krimit komunist
“Qeveria e sotme po drejton me të njëjtin mentalitet si Hoxha”

Partia Socialiste kërkoi dje në Parlament hapjen e dosjeve të krimeve të komunizmit dhe të politikanëve e funksionarëve të lartë të shtetit. Anëtarët e kryesisë, Namik Dokle dhe Erjon Braçe, i konsideruan këto dy çështje shumë të rëndësishme dhe duhet të futen në dokumentin përfundimtar të Kuvendit. “Ka disa kërkesa që duhen vlerësuar në mënyrë të veçantë, p.sh. pika 4 dhe pika 5 e këtij dokumenti, kërkon të hapen arkivat sekrete të krimit komunist dhe dosjet për politikanët, drejtuesit e institucioneve kushtetuese, drejtues të mediave kombëtare, audiovizive dhe të shkruar. Kjo është tashmë një domosdoshmëri, nëse duam të ndahemi nga e kaluara duhet ta njohim në thellësi këtë të kaluar”, tha Namik Dokle dje, gjatë seancës parlamentare kushtuar rezolutës për krimet e komunizmit. Sipas Dokles, kjo kategori duhet të bëhet transparente, pasi ka ndikuar negativisht në egërsimin e komunizmit në vend. “Për këtë çështje është diskutuar shpesh në Kuvendin tonë, janë përmendur fakte dhe ngjarje, janë përmendur dhe pseudonime deputetësh, të cilët duke qenë shërbëtorë të komunizmit dhe në mënyrë të veçantë të pjellës së tij, sigurimit të shtetit, kanë ndikuar dhe kanë luajtur një rol shumë negativ në përshpejtimin dhe egërsimin e këtij genocidi”, tha Dokle. Sipas deputetit socialist “tani këta nuk janë në Parlament, por gjithsesi diku gjenden, a janë ambasadorë, a janë shefa zyrash, apo drejtorë agjencish kombëtare menaxhimesh, kjo është për t’u verifikuar”. Dokle nuk hezitoi që t’i kërkojë kësaj kategorie njerëzish që të ndjekin shembullin e Grassit. “Unë nuk jam në gjendje t’i dizenjoj tani se cilët janë ata, veçse në qoftë se ndonjërit prej tyre do t’i bjerë në mend ajo që bëri Gynter Grassi, i cili pasi fitoi çmimin Nobël deklaroi se ka qenë pjesë e trupave fashiste të Hitlerit”, tha Dokle.

pseudonimet

Koromane
Qershia
Plepi
Daja
Demoni
Qukapiku
Kali i shalës
Poli i veriut

Parlamenti përfshihet për 6 orë në debate të forta për krimet e komunizmit. Shtyhet miratimi i rezolutës

Hapja e dosjeve, shtyhet vendimi
Berisha: Do të dalin të gjithë, nga “Cigarja” deri tek “Raketa”

Hapja e arkivave të periudhës së komunizmit dhe të dosjeve të spiunëve shtyn miratimin e projektrezolutës për dënimin e krimeve të regjimit komunist në Shqipëri.

Për 6 orë deputetët kanë debatuar në lidhje me rezolutën e Asamblesë së KE-së për “Domosdoshmëria për dënimin ndërkombëtar të krimeve të regjimeve totalitare komuniste”. Debati më i ashpër ka qenë ai ndërmjet kryeministrit, Sali Berisha dhe kreut të grupit parlamentar të PS-së, Pandeli Majko. Kryeministri ka akuzuar socialistët si pasues të Partisë së Punës, duke shtuar gjithashtu se të majtët kanë frikë që të hapin dosjet e spiunëve të sigurimit të shtetit dhe arkivat e shtetit. “PPSH u shndërrua me një dokument, nuk u shkri si të gjithë partitë e tjera komuniste të lindjes, për t’u rithemeluar. Emrin tuaj jua përmbysa, ju përmbysa ju dhe etërit tuaj. Etërit jua përmbysa në vitin 1992, përmbysa bijtë etërve në 2006 dhe jam i gatshëm ta bëj përsëri”, tha në fjalën e tij kryeministri. Duke iu drejtuar socialistëve, ai theksoi se “çfarë kanë vuajtur do të dalë e gjitha në shesh”. “Ju që këndoni për Hitlerin duhet të bëni aktin e ndarjes nga trashëgimia, nga 24 maji. Atë që e shpallët ditë feste, shpalleni dite zie. T’i bëjmë një dënim kapital regjimit komunist. Bëhuni racionalë të dënojmë Enver Hoxhën si kryekriminelin e asaj kohe”, deklaroi Berisha. Gjithashtu kreu i PD-së ka sulmuar dhe liderin e PS-së, Edi Rama. “Ju jeni qumështorë. Po s’hapët dosjet do të keni imponime të forta për ta bërë. Kemi mundësi të bashkëpunojmë. Do të dalin të gjithë që nga “Cigarja” deri tek “Raketa”. Ftoj opozitën të ngrejë një komision Hetimor për dosjet dhe të mos merret me komisione hetimore për borderotë. Ashtu siç vratë Mustafa Gjinishin, ashtu ekzekutuat edhe Azem Hajdarin. Ju jetoni në kompleksin e turpit, ju s’keni pendesë, sepse po të ki**** pendesë do të shkrinit partinë dhe do të themelonit një tjetër. Ju zgjodhët kryetar të partisë njeriun që ndjehet i qetë kur fle në shtratin e Myslym Pezës. Ju nuk i përkisni as viteve ‘40, as viteve ’50, as terrorizmit të viteve ‘70, por ju s’shkëputeni dot nga ajo kohë”, theksoi Berisha. Ndërsa Majko ka reaguar, duke theksuar se “Konferenca e 24 majit të Përmetit kishte një vendim, i cili nuk lejonte kthimin e mbretit Zog në Shqipëri. Kur ti ishte president zoti Berisha dhe drejtoje qeverinë, mbretin Zog nuk e le të shkelte Rinasin dhe e ktheve. Atëherë kush e zbatoi vendimin e Konferencës”. Ndërsa Berisha ka replikuar me shprehjet se “Majko po mbron trashëgiminë e datës më të zezë si 24 maji”. “Mos ki merak, çështjen e datës do ta zgjidh, që nesër ajo hyn në ditën më të zezë”. Ndërsa deputeti socialist, Taulant Balla, në diskutimin e tij në emrin të grupit të PS-së, nxori një teserë të vjetër të PPSH-së, e cila sipas tij ishte e Sali Berishës. “Ai nuk ka të drejtë që të më akuzojë mua si komunist, pasi unë isha 13 vjeç kur u rrëzua komunizmi. Ja ku e ka teserën e tij PPSH-së, kryeministri, i cili ka paguar kuotat për 25 vjet”, tha Balla. Pas gjashtë orë debatesh, Kuvendi shtyu miratimin e rezolutës për një seance të ardhshme, pas përpunimit të draftit të rezolutës të paraqitur nga grupi parlamentar i PD-së.

REZOLUTA E PD PER KRIMET E KOMUNIZMIT

Kuvendi i Shqiperise i referohet Rezolutave te Asamblese Parlamentare te Keshillit te Europes dhe konkretisht, Rezolutes 1096 (1996) “Masat për të çrrënjosur trashëgiminë e sistemeve totalitare komuniste” dhe Rezolutes 1481 (2006) “Domosdoshmeria për dënimin ndërkombëtar të krimeve të regjimeve totalitare komuniste”.

Kuvendi i Shqipërise KëRKON:

Dënon:
Dhunimin masiv të të drejtave të njeriut të kryer nga ana e regjimit totalitar komunist të Enver Hoxhës në Shqipëri dhe shpreh respekt, mirëkuptim e mirënjohje për viktimat e genocidit komunist.
Figurën e diktatorit Enver Hoxha si ideatori, frymëzuesi, drejtuesi dhe ekzekutuesi i sistemit më të egër diktatorial komunist në Europën Lindore.
· Figurën e diktatorit Enver Hoxha si hartues dhe zbatues të një politike antikombëtare.

Kërkon:
Heqjen e të gjithe titujve dhe dekoratave të diktatorit Enver Hoxha të dhëna nga regjimi komunist.
Rishikimin e datave historike te cilat janë simbole të sistemit komunist dhe shenojne instalimin e diktaturës komuniste në Shqipëri.
Heqjen e këtyre datave nga protokolli zyrtar shtetëror.

Fton:
Të gjitha partitë komuniste ose post-komuniste në Shqipëri, që të rikonsiderojnë historinë e komunizmit dhe të kaluarën e tyre, të distancohen qartësisht nga krimet e kryera nga regjimi totalitar komunist dhe nga figura e diktatorit Enver Hoxha dhe t’i dënojnë ato pa asnje mëdyshje.

Inkurajon:

Institucionet përkatëse për të përshpejtuar kompensimin material të shtrësës së të persekutuarve politikë që për dekada me radhë vuajti nën diktaturën më të egër të Europës Lindore.

Akademikët, historianët dhe ekspertët e pavarur që të vazhdojnë kërkimet e tyre me qëllim përcaktimin dhe verifikimin objektiv të gjithçkaje ka ndodhur gjatë diktaturës komuniste në Shqipëri.
Organizimin e nje konference kombetare me pjesemarrjen e perfaqesuesve te parlamentit, qeverise, partive politike, shoqatave të të persekutuarve, akademikeve, historianeve si dhe eksperteve te OJQ-ve, per krimet e kryera nga regjimet totalitare komuniste.
Fillimin e nje fushate kombetare per ndergjegjesimin rreth krimeve te kryera ne emer te ideologjise komuniste duke perfshire
rishikimin e librave shkollore,
organizimin e nje dite memoriale per viktimat e komunizmit,
hapjen e muzeumeve,
ngritjen e memorialeve në nderim të viktimave të regjimeve totalitare komuniste.

• Topi: Hapja e dosjeve, e rëndësishme
  Unë mendoj se hapja e dosjeve është me rëndësishme. Të gjitha gjërat që janë thënë këtu janë boshe, nuk kanë vlerë, janë fjalë dhe vetëm fjalë. Gjë tjetër që është e rëndësishme është përcaktimi i skemës së dëmshpërblimit të ish të përndjekurve politikë. Kush kërkon të mbetet peng i historisë le të mbetet, të mos merremi me fjalë boshe.
  
• Balla: Berisha, në PPSH më 8.11.1968
  Mua kryeministri më akuzon si komunist, në një kohë që kam qenë 13 vjeç kur u rrëzua regjimit i Enver Hoxhës. Kam këtu një teserë partie që është e Sali Ramë Berishës, e lëshuar më 8 nëntor 1968, kuota që ka paguar për 25 vjet rresht është 1.9 lekë, në një kohë që e ka pasur rrogën mujore 950 lekë në muaj. Me aq lekë sa ka paguar ndër vite si kontribute, mund të dëmshpërblinte një ish-përndjekur.
  
• Ceka: Komunistët, jo në poste të larta
  Unë kërkoj që t’i lemë retorikat boshe, pasi në qeverinë aktuale janë 20% e përfaqësuesve të komunizmit. Nëse doni ta luftoni realisht komunizmit hajde të ndryshojmë Kushtetutën dhe të vendosim që asnjë komunist nuk do të lejohet në postet e larta drejtues, që nga presidenti, kryeministri, kryetari i Kuvendit, gjykatës dhe në të gjitha institucionet shtetërore, të mos marrin pjesë në asnjë drejtim të shtetit.