Tiranë- Kryeministri Berisha ka ndjekur dhe po vazhdon të ndjekë politika të universiteteve private, në ato qytete ku një vit më parë u mohoi shkollat e larta publike të rinjve. Kjo është parë dukshëm në qytetin e Durrësit, por fenomeni po njeh shtrirje të vazhdueshme. Madje, kjo politikë u përvijua po kaq dukshëm edhe në maturën shtetërore të këtij viti dhe sidomos koeficientët dhe formulat e llogaritjeve që ministria e Arsimit përzgjodhi si kriter për pranimin. Koeficientët e llogaritura në maturën shtetërore u përdorën për reklamë të shkollave të mesme private. "Ngatërresat" e bëra pikërisht me këto koeficientë nga ana e ministrisë së Arsimit ndodhën vetëm për gjimnazet e përgjithshme, ndërsa për gjimnazet private koeficientët u llogaritën ashtu si duhej. Në këtë mënyrë, këto shkolla të mesme private do të kenë mundësinë që në pjesën e publicitetit të tyre për të afruar sa më shumë nxënës që të studiojnë në to, të shtojnë edhe numrin e gjithë maturantëve të pranuar në universitete. Koeficientët e "ngatërruar" gjatë llogaritjes së pikëve në mënyrë të ndarë për nxënësit e shkollave të mesme të përgjithshme dhe atyre private, e sidomos moskthimi i këtyre llogaritjeve tregon në mënyrë të qartë se në këtë biznes të favorizimit të shkollave private është e përfshira e para ministria e Arsimit.

Tiranë- Kryeministri Berisha ka treguar sërisht anën e tij skandaloze dhe qesharake në të njëjtën kohë, në ditën e fillimit të vitit akademik për shkollat e larta. Bashkë me ministrin e tij të Arsimit, Genc Pollo ai ka inaguruar dy ditë më parë, pikërisht të njëjtin universitet që një vit më parë mori vendim për ta mbyllur. Universiteti i Durrësit është shembulli i shiritave falso të inagurimeve të prera nga kreu i qeverisë. Të gjithë studentët dhe sidomos ata të regjistruar një vit më parë në universitetin "Aleksandër Moisiu" e kujtojnë se si qeveria Berisha mori vendim për ta mbyllur këtë universitet, vetëm pak ditë përpara se ky të fillonte nga puna, për të pritur gjithë kandidatët e rinj. Këta të fundit jo vetëm që ishin regjistruar, por kishin paguar edhe tarifën që nuk iu kthye asnjëherë mbrapsht. Përvec kësaj, universiteti ishte përgatitur edhe me stafin pedagogjik dhe godina ishte bërë gati. Por kryeministri e kundërshtoi hapjen e "Aleksandër Moisiu" në Durrës, vetëm sepse ky ishte një vendim i qeverisë socialiste dhe kjo mjaftoi për Berishën që ta quante si një element fushate të saj. Atëherë kreu i qeverisë deklaroi se nuk kishte ndërmend që të lejonte hapjen e një "koteci". Në fakt, edhe pas një viti, kur Berisha kishte në dorë gërshërët e inagurimit, asgjë nuk ka ndryshuar nga ky universitet. As godina e përcaktuar për të, as stafi pedagogjik dhe madje as numri i pranimeve dhe as degët. "Podiumi" nga ku Berisha po bënte premtimet e rradhës për liberalizim të universiteteve dhe për shtim të fondit të arsimit është po i njëjti "kotec" që i tillë ishte vetëm një vit më parë, kurse këtë vit ishte "një ngjarje e madhe për kombin".