Trajneri i "Luanëve" flet pas barazimit me Maqedoninë: Futbollistët janë të zhgënjyer aq sa unë     09-10-2006

Trajneri i Anglisë, Stiv Meklaren, kritikoi performancën e ekipit dhe tha se barazimi 0-0 me Maqedoninë i bëri lojtarët të zbresin me këmbë në tokë. Anglezët gabuan shumë në pasime dhe u mungoi autoriteti në mesfushë apo ngacmimet në sulm, përpara një stadiumi të mbushur plot që ka fishkëllyer kombëtaren në pjesën e parë. "Të gjithë jemi të mërzitur dhe të zhgënjyer, tifozët, të gjithë që panë ndeshjen, të gjithë që janë anglez, por veçanërisht lojtarët dhe stafi, - u shpreh Meklareni në konferencën për shtyp. - Nuk u ngjitëm në standardet tona. Morëm një pikë, por nga ne pritet që t'i fitojmë ndeshjet ndaj ekipeve si Maqedonia ose të paktën të shënojmë në ndeshjet brenda në shtëpi, por këtë nuk e bëmë". Sundimi i Meklarenit filloi pas Kupës së Botës me disa fitore euforike kundër Greqisë në miqësore dhe kundër Andorrës në eliminatore, para se të arrinte një fitore të ngushtë 1-0 kundër Maqedonisë në Shkup, muajin e kaluar. Ky barazim e bën edhe më të vështirë ndeshjen kundër Kroacisë në transfertë për Meklarenin dhe të besuarit e tij që do të luajnë pa Stiven Xherrard, i pezulluar pas kartonit të verdhë të shtunën. Duke parë në perspektivë, Meklareni tha: "Duhet të tregojmë karakter dhe vendosmëri. Zhvilluam tri ndeshje të mira, por duhet pranuar që këtë radhë dhamë shumë më pak se mundësitë tona reale. Maqedonia na bëri të shohim realitetin siç është". Meklareni tha për ndeshjen të mërkurën se pritet të kthehet mbrojtësi Rio Ferdinand që mungoi të shtunën nga një dëmtim në shpinë.
Uejn Runi - Trajneri anglez shpreson te forca e karakterit të Uejn Runit, që ta ndihmojë sulmuesin të rigjejë formën. Me një eliminatore të vështirë kundër Kroacisë pas barazimit pa nivel 0-0 ndaj Maqedonisë, Meklarenit tani më shumë se kurrë i vlen që Runi të tregojë aftësitë e vërteta me bluzën e Anglisë. I pyetur nëse ishte i shqetësuar për mungesën e formës së 20-vjeçarit në ndeshjet e fundit, Meklareni u përgjigj: "Duket që nuk është në formë optimale. Por ai është lojtar i shkëlqyer dhe askush nuk është më i mërzitur sesa Runi. Ai e di që është larg paraqitjeve të dikurshme, por zotëron vendosmërinë dhe karakterin që ne duhet të tregojmë si ekip". Pyetjes pse e zëvendësoi me Xhermein Defonë në minutën e 74-t, Meklareni nuk është "zbuluar" shumë. "Thjesht u përpoqa të fitoja një ndeshje futbolli, - tha ai. - Xhermein Defo ka shënuar gola për ne dhe ishte në formë në Maqedoni. Na duhej një gol dhe një ndryshim në sulm, kështu që futa një sulmues". Ndeshja të mërkurën në Zagreb do të jetë një test i freskët për Runin që ka mbi dy vjet që nuk shënon për Anglinë në takime kompetitive. Duke iu kthyer paraqitjes së ekipit, Meklareni deklaroi: "Pres një lojë më të mirë se ajo. Gjithmonë e kam thënë se nëse fitojmë ndeshjet brenda dhe marrim barazim jashtë me ekipet më të forta, atëherë do të kualifikohemi. E dimë çfarë duhet të bëjmë dhe shanset tona për kualifikim nuk janë kompromentuar".

Maqedonia: Katanec, i lumtur...
Trajneri i Maqedonisë, Sreçko Katanec, deklaroi: "Jam i gëzuar me rezultatin. Luajtëm shumë mirë taktikisht dhe fitoren do ta kërkojmë të mërkurën kundër Andorrës. I pyetur nëse ekipi i tij mund të ishte larguar nga Anglia me 3 pikë, ai tha: "S'duhet të kalojmë caqet e optimizmit. Para ndeshjes isha shumë i lumtur me një pikë. Prisja që Anglia të ishte më agresive. Të mos harrojmë se ata patën disa raste për shënim. Barazimi ishte rezultati më i drejtë".