Ushqimet që konsumohen nga konsumatorit shqiptar në shumë raste paraqiten të rrezikshme për shëndetin.

Ministri i Bujqësisë, Ushqimit dhe Mbrojtjes së Konsumatorit në një intervistë për “Shekulli” sqaron se puna që po bëhet për të vendosur rregull në këtë treg është shumë e vështirë, dhe ka shumë biznese të cilat nuk plotësojnë standardet e kërkuara. Gjana shprehet se “vetëm 2 për qind e bizneseve që merren me prodhimin e mallrave ushqimore janë të certifikuara”.

Ministri ka bërë të ditur sesi po punohet mbi problemet aktuale të tregut, që janë bruceloza dhe mos lejimin e importeve jashtë standardeve. Zoti Ministër, opinioni publik shqiptar kohët e fundit është i shqetësuar nga të dhënat për përhapjen e sëmundjes së brucelozës. Çfarë po bën dikasteri juaj për të kufizuar përhapjen, në mos për ta ndaluar atë? Trajtimi i sëmundjes së brucelozës është neglizhuar për vite me radhë te ne, prandaj edhe ajo ka marrë shtrirje të gjerë.

Fondet për vaksinim jo vetëm kanë qenë të pamjaftueshme, por ka munguar matrikulimi (regjistrimi) i bagëtisë së imtë. Për gjedhin filloi matrikulimi për 70 mijë krerët e parë, pastaj ai u ndërpre. Përpjekjet tona janë përqendruar për ta rivendosur nën kontroll këtë sëmundje.

Këtë po përpiqemi ta bëjmë nëpërmjet kontrolleve të rrepta dhe procesverbaleve për cilësinë dhe kushtet e tregtimit të qumështit, si dhe të plot artikujve të tjerë ushqimorë. Duhet të dimë të gjithë se në tetë vitet e fundit, me qindra biznese nuk janë kontrolluar kurrë për sigurinë ushqimore.

Ne nuk gjetëm asnjë procesverbal apo aktkontrolli nga inspektoratet e kësaj ministrie. Fjalnaja se nuk na kanë pranuar bizneset për të ushtruar kontroll, është një justifikim i turpshëm, i cili kërkon të mbulojë pazaret vetjake të një pjese të kontrollorëve me një pjesë të biznesit, si dhe fjetjen gjumë të pjesës tjetër të kontrollorëve. Gjykoj se kontrollet periodike dhe profesionale (duke ulur mundësinë e abuzimit dhe falsitetit të tyre) janë mjeti më i mirë për të detyruar bizneset të zbatojnë standardet e kërkuara. Dhe zbatimi i standardeve, kusht që na e kërkon me insistim Bashkimi Evropian, është rruga e vetme për të zotëruar sëmundjen e brucelozës.

Sekuestrimi i disa boteve me qumësht jashtë standardit solli në vëmendjen e njerëzve shkallën e lartë të rrezikut që ushqimet e pakontrolluara mund të përmbajnë. Sipas jush, sa rrezikohet jeta shqiptarëve nga ushqimet që importohen apo prodhohen këtu dhe që sfidojnë rregullat e lojës? Mjafton të dimë se vetëm 2 për qind e bizneseve që merren me prodhimin e mallrave ushqimore janë të certifikuara, për të kuptuar gjendjen e rëndë të sigurisë ushqimore te ne.

Ministria jonë po punon me përparësi për të forcuar kontrollin në vendosjen dhe respektimin e standardeve. Biznesi duhet të kuptojë përfundimisht se është përballë inspektorësh, kontrollorësh, ekspertësh dhe specialistësh me të cilët të gjitha raportet do të ndërtohen mbi ligjin dhe vetëm mbi ligjin. Nuk mund të tallemi me 3 milionë konsumatorë shqiptarë dhe fëmijët e tyre! Askush nuk duhet të guxojë më të bëjë pazare dhe fitojë para me thasë në kurriz të cilësisë dhe standardeve.

Që përkthehet po ashtu në kurriz të jetës së qytetarëve. Do të jetë detyrë numër një e jona që tregu shqiptar të mos vijojë të furnizohet më nga bodrumet e pista! Kemi përmirësuar një bazë të plotë e të gjerë ligjore pikërisht për t’u ardhur në ndihmë konsumatorëve. Brenda këtij viti do të fillohet nga puna për krijimin e Entit Kombëtar të Ushqimit. Të gjithë duhet ta dimë se menjëherë pas nënshkrimit të Marrëveshjes së Stabilizim Asocimit në Luksemburg me Bashkimin Evropian, faqet e para të negociatave janë plotësimi i detyrimeve për respektimin e standardeve në fushën e sigurisë ushqimore.

Ne do të jemi aleatë të biznesit serioz agroushqimor që plotëson standardet dhe nuk abuzon në treg. Informaliteti në standardet e cilësisë është dhe më i rëndë se informaliteti fiskal, pse godet drejt për së drejti edhe jetën e njeriut. Do te jemi aleatë me importuesin e produkteve me standarde dhe kundërshtarë të vendosur të atij që sjell falsitete dhe kërkon të mashtrojë konsumatorin shqiptar. Ju tregoj një shembull konkret.

Mishin ne kryesisht e importojmë nga Brazili. Drejtues të këtij sektori në ministri kanë udhëtuar deri në Brazil, ku kanë përcaktuar me marrëveshje stabilimentet nga do të furnizohemi. Të cilat furnizojnë edhe Bashkimin Evropian. Janë marrë certifikatat origjinale të mi**** nga Brazili, duke përcaktuar furnizim direkt nga Porti i Durrësit dhe jo me ndërmjetësim nga Pireu, sikurse ka ndodhur deri tani. Këtë do ta bëjmë edhe me Argjentinën dhe me çdo furnizues të madh të produkteve ushqimore në Shqipëri.

Zoti Ministër, në shtyp është folur ditët e fundit për një letër-skandal (kështu është cilësuar) që ju i keni dërguar drejtorit të përgjithshëm të FAO-s (Organizata Ndërkombëtare e Ushqimit). Si qëndron e vërteta?

Po, i kam dërguar një letër drejtorit të përgjithshëm të FAO-s, por ajo ka qenë një letër normale pune dhe s’ka asnjë lidhje me ndonjë skandal të vërtetë apo imagjinar. Më 31 mars të këtij viti, në një takim trepalësh me bashkëpunimin italian dhe me përfaqësuesit e FAO-s në Tiranë (organizata që zbaton fondet e bashkëpunimit italian), diskutuam mundësinë e orientimit të projektit në nivel kombëtar që ata kanë drejt marketingut bujqësor, pra ****jes së produkteve bujqësore. Ramë dakord që të rishikohej edhe stafi drejtues i projektit, për të rritur efikasitetin e projektit.

Deri tani përfaqësuesit e FAO-s e kanë zvarritur këtë veprim, me qëllim që të ruajnë status quo-në e stafit të tyre në projekt. Mirëpo kjo shkon e gjitha në dëm të rezultateve që presim nga projekti. Një përafrim të tillë, ministria jonë e ka dhe do ta ketë me çdo donator e agjenci zhvillimi që kontribuon për bujqësinë shqiptare.

Në radhë të parë, duhet të shohim se sa efikase paraqitet ndërhyrja dhe ndihma e dhënë. Ka ndodhur që një projekt i Bankës Botërore të ofronte blerjen e pajisjeve dhe logjistikës për kontrollin e farërave për fermerët, por me çmime dyfish më të shtrenjta se sa ato të tregut ndërkombëtar.

Këto gjëra nuk duhet të ndodhin më, pse janë tërësisht në dëm të taksapaguesve të huaj që i kanë dhënë këto para për Shqipërinë dhe në dëm të interesave të vetë ne shqiptarëve.