Një vrasje e vetme e kryer për gjakmarrje që nga fillimi i vitit. Kjo shifër, krahasuar me 7 të një viti më parë, sipas kryepolicit të Shkodrës, është një arritje e madhe në forcimin e rendit dhe sigurisë publike.

Pas analizimit të të dhënave 9-mujore, komisar Ahmet Prençi, tregon në një intervistë për gazetën çfarë është bërë nga institucioni që ai drejton: shifrat e regjistruara të krimit, autorë të arrestuar e deri te sakrifikimi i policëve të inkriminuar.

Gjatë analizave të bëra mbi punën e policisë jeni shprehur se Shkodra është qytet me rend dhe siguri publike në parametra normalë. Ku bazoheni për këtë?
Mjafton t’u hedhësh një sy vetëm shifrave të këtij 9-mujori për ta pasur situatën mëse të qartë. Po kështu, një konkluzion i tillë ka ardhur edhe nga kontaktet e ndryshme me përfaqësues të pushtetit lokal në Shkodër, të shoqërisë civile, të përfaqësive të huaja që operojnë këtu, pa harruar edhe përfaqësues të biznesit, të cilët e ndiejnë realisht një klimë të tillë pozitive. Nga këto takime është marrë mesazhi se është rritur besimi i publikut te Policia e Shtetit. Këtë 9-mujor vërejmë, se krahasuar me të njëjtën periudhë të vitit të kaluar, kemi një forcim të rendit e të sigurisë publike. Gjatë kësaj kohe është shënuar vetëm një rast vrasjeje për gjakmarrje, nga 7 të vitit të shkuar. Po kështu edhe numri i të vrarëve nga 12 që ka qenë në të njëjtën periudhë të vitit 2005, këtë vit viktimat janë 7. Rihapja e dosjeve të vjetra, si dhe kapja e 166 personave në kërkim, 20 prej të cilëve kërkohen për vrasje, tregojnë më së miri se policia e Qarkut Shkodër ka bërë një punë të mirë dhe në rritje.

Si e shpjegoni faktin se kohët e fundit vërehet gjithnjë e më shumë rritja e besimit të qytetarëve ndaj policisë, kur më parë ky veprim ishte tabu?
Them se populli i Shkodrës, gjithnjë e më shumë po e kupton se policia, e vetme, nuk arrin ta përballojë siç duhet të gjithë situatën. Tashmë ata janë bindur se policia është në shërbim ë tyre dhe jo mjet dhune e diktature siç mund të ketë qenë dikur.
Efektivët e policisë, me veprimet dhe punën e tyre kanë bërë që kjo situatë e dikurshme të përmbyset, pasi të dy palët janë të ndërgjegjshme se vetëm me bashkëpunim të dyanshëm mund të arrihen rezultatet që dëshiron secili për familjet e tyre. Numri i madh i personave të kërkuar, të arrestuar nga policia, ka sjellë dhe rritjen e besimit të popullsisë ndaj uniformave blu. Që nga fillimi i vitit, në sallën operative janë bërë 1630 telefonata ose 55 % më shumë se vjet, ku janë dhënë informacione për ngjarje dhe autorë të veprave penale. Vetëm ditën e sotme, (dje) kanë qenë dy telefonata nga qytetarët, informacioni i të cilëve bëri të mundur arrestimin dy personave për armëmbajtje pa leje. Njëri është kapur në banesën e tij, ndërsa tjetri qarkullonte në rrugë.

A ka pasur gjatë kësaj periudhe konstatime për punonjës policie të inkriminuar dhe si është vepruar me ta?
Gjatë periudhës së tranzicionit, të jemi të sinqertë, në radhët e policisë kanë hyrë shumë persona, të cilët nuk e meritojnë të punojnë aty. Por ne jemi munduar që në punën tonë të jemi transparentë, të saktë dhe veprimet tona duhet të jenë të bazuara në fakte konkrete. E për rrjedhojë vetëm gjatë kësaj periudhe është bërë arrestimi në flagrancë i 4 agjentëve, pasi, sipas provave të grumbulluara, është mësuar se ata kanë dekonspiruar aksionet e policisë. Ndërkohë që janë përjashtuar nga radhët e saj edhe 26 oficerë nga policia e Qarkut Shkodër, të cilët kanë kryer thyerje të rënda të disiplinës në punë. Por krahas këtyre masave ekstreme është bërë dhe shpërblimi financiar në 150 raste për ata policë që janë dalluar në kryerjen me përpikmëri të detyrave që u ngarkon ligji, shpërblime këto që janë bërë me 1-2 rroga mujore.

Nisur edhe nga fakti që Shkodra është zonë kufitare, si kanë qenë marrëdhëniet midis policisë së qarkut me ato të vendeve fqinje si dhe me ato të shërbimeve policore të rajonit?
Shërbimet tona të policisë vazhdimisht kanë pasur marrëdhënie korrekte në shkëmbimet e informacioneve për kapjen e personave në kërkim, për parandalimin e kontrabandës etj., si me policinë e Malit të Zi, ashtu edhe me Interpolin. Në rastin e shkëmbimeve me homologët tanë të Malit të Zi është bërë e mundur kapja e 5 personave të shpallur në kërkim, si dhe bllokimi i mallrave që është tentuar të futen kontrabandë, siç kanë qenë kapja e sasive të ndryshme të kafesë, pijeve alkoolike, cigareve dhe mallrave të ndryshëm. Ndërsa, në sajë të informacioneve që ne i kemi dhënë Interpolit për vendndodhjen e disa personave që janë të shpallur në kërkim nga drejtoria jonë është bërë e mundur gjetja dhe arrestimi i 16 personave të tillë të strehuar në vendet e Evropës Perëndimore, të akuzuar kryesisht për vrasje. Nga këta 7 persona janë ekstraduar, ndërsa 9 persona të tjerë janë në proces.

• 1 vrasje
  për gjakmarrje është shënuar në Qarkun e Shkodrës që nga fillimi i vitit, ndërsa në të njëjtën periudhë të 2005-ës ndodhën 7 ekzekutime
  
• 7 viktima
  janë regjistruar në 9 muajt e parë të vitit në Shkodër, mes të cilëve dhe një biznesmen dhe kreu i Policisë së Liqenit, vrarë për motive të dobëta
  
• 166 persona
  të cilët ishin shpallur në kërkim për vepra të ndryshme penale, janë arrestuar nga policia që nga janari deri në shtator, ku 20 kërkoheshin për vrasje
  
• 4 agjente
  të policisë së Shkodrës janë arrestuar që nga fillimi i vitit, pasi kanë rezultuar të implikuar në vepra penale ose kanë dekonspiruar operacionet

Vrasja e pazbuluar e Cafit

SHKODER – Ngjarja më e rëndë e fundit e shënuar në Shkodër është pikërisht vrasja e 33-vjeçarit Shkëlqim Cafi. I njohuri si i forti i qytetit, i dalë nga burgu disa muaj më parë, u ekzekutua më 19 shtator, në një nga rrugët kryesore të qytetit. Autori, i cili iu afrua makinës së Cafit me motor, e qëlloi për vdekje e më pas u largua pa mundur të ndalohet. Ende nuk janë zbardhur as motivet e kësaj vrasjeje, që, sipas policisë, lidhet me të kaluarën e Cafit.

Policia: Çalojnë marrëdhëniet me gjykatën

“Nëse me organin e Prokurorisë ne kemi pasur marrëdhënie korrekte institucionale, nuk ka ndodhur një gjë e tillë edhe me gjykatat. E kjo jo për fajin tonë”, i përgjigjet pyetjes për marrëdhëniet ndërinstitucionale drejtori i policisë, Prençi. “Duke studiuar disa vendime gjyqësore të dhëna nga gjykatat për eksponentë kryesorë të krimit në Shkodër, pa i paragjykuar këto vendime, mendoj se nuk është zbatuar mirë politika penale në dënimin e tyre. Këtu nuk bëhet fjalë për pafajësi, gjë që do të nxirrte në pah edhe punën e pamjaftueshme të policisë dhe të Prokurorisë, por kemi konstatuar se kemi dhënie fajësie nga gjykatat shqiptare me dënime minimale”. Sipas Prençit, ky fenomen është konstatuar në disa raste për persona të akuzuar për një ose më shumë vrasje, por janë dënuar nga gjykata me 2-5 vite burg. “Kjo ndodh në një kohë që gjykata në dhënien e vendimit të saj duhet të mbështetet edhe te rrezikshmëria e theksuar shoqërore e autorëve, si dhe veprave që kanë kryer, pasi faktet kanë treguar se pas kryerjes së dënimit ata kanë vazhduar veprimtarinë kriminale ose janë bërë shënjestër hakmarrjeje. Për të gjitha rastet e evidentuar ne kemi reaguar duke ndjekur rrugën institucionale dhe ligjore”, thekson kryepolici i Shkodrës.