Bashkitë e mëdha, PS projekton kandidaturat

Partia Socialiste ka nisur garën elektorale për kandidaturat e pushtetit vendor.

Ndërsa ende nuk janë miratuar udhëzimet dhe kriteret e kandidatëve, të cilët do të garojnë në zgjedhje, kandidatët socialistë, të paktën për 12 bashkitë e mëdha të vendit, duket se janë përcaktuar nga vetë strukturat e PS-së. Me gjysmë zëri shqiptohen vetëm ato bashki për të cilat po punohet për të pasur disa alternativa më bindëse për rezultatin e zgjedhjeve. Drejtuesit vendorë të disa degëve nuk pranojnë të prononcohen në ato raste kur kandidaturat e piketuara nga shoqëria civile, me tepër reputacion në komunitetin lokal, ende nuk kanë dhënë pëlqimin për të garuar me ngjyrat e PS-së.

Sfidat
Kryesfida e zgjedhjeve lokale mbetet Bashkia e Tiranës. Kryetari i PS-së, Edi Rama, do të jetë kandidatura e opozitës së bashkuar për bashkinë më të madhe vendit. Burime në selinë rozë shprehen se nëse nuk do të dalë ndonjë kandidaturë tjetër bindëse nga PS-ja për këtë bashki, kandidati për ta rimarrë atë do të jetë kryetari aktual i saj, Edi Rama, i cili do tentojë mandatin e tretë të tij. Deri tani nuk ka asnjë kandidaturë tjetër nga ana e PS-së për Bashkinë e Tiranës, vetëm në rast se vetë Rama do të vendosë për ndonjë figurë publike të shoqërisë civile, i cili do të marrë mbështetjen e plotë të PS-së dhe partive opozitare. Duket se Rama ka marrë mbështetje të plotë dhe nga drejtuesit e partive opozitare për të rimarrë superbashkinë e vendit. Në disa deklarata si të kreut të PSD-së, Gjinushi, ashtu dhe të LSI-së, Ilir Meta, është lavdëruar puna e kryebashkiakut në dy mandatet e tij në krye të bashkisë dhe është hedhur ideja e rikandidimit të tij si personi fitues në këtë bashki. Por lista e gjatë e kandidaturave nxjerr në pah një dukuri, atë të rikandidimit në masën 50 për qind të kryetarëve aktualë të bashkive që drejtohen nga socialistët. Edi Rama, Lefter Koka, Shpëtim Gjika, Fadil Nasufi, Flamur Bime, Baftjar Zeqo, janë emrat socialistë që drejtojnë aktualisht bashkitë e qyteteve të tyre nga votat e 2003. Duket se këta bashkiakë, pjesa më e madhe e të cilëve kanë dalë nga drejtimi i degëve lokale të PS-së, gëzojnë mbështetje të plotë në anëtarësinë e partisë, madje dhe të kryesisë socialiste në qendër. Ata vazhdimisht kanë qenë në mbështetje të PS-së në bazë dhe në qendër gjatë aksioneve politike, si zgjedhje, apo reforma të ndryshme. Dy “prurjet” e reja për kandidatë, Qazim Sejdini në Elbasan dhe Niko Peleshi në Korçë, janë aktualisht kryetarët e degëve të qytetit. Janë pikërisht këta që do t’i rikthejnë bashkitë e humbura PS-së nga zgjedhjet e vitit 2003, kryesisht për shkak të luftës së brendshme mes grupimeve të socialistëve. Të dy kandidaturat vijnë pas një karriere si prefektë para korrikut 2005.

Aleatët
Bashkitë e qarkut, më të mëdhatë e vendit, të cilat kanë dhe një peshë të madhe elektorale, do administrohen nga Partia Socialiste. Por gjatë kësaj periudhe para fushate është shprehur ambicia edhe nga partitë aleate, veçanërisht LSI-ja, për të pasur të paktën dy nga bashkitë e mëdha të vendit. Kjo do të jetë dhe pika më e brishtë e tryezës së partive opozitare nga do të dalin dhe kandidaturat e përbashkëta të opozitës së bashkuar siç kanë deklaruar dhe vetë krerët e tyre.

• Koalicioni
  Socialistët ende nuk kanë vendosur për dy bashki të veriut, atë të Shkodrës dhe Lezhës, të cilat duket se do t’u lihen partive të koalicionit opozitar. Por kjo do të vendoset në tryezën e përbashkët të krerëve të partive opozitare për përcaktimin e kandidaturave.
  
• LSI
  Lëvizja Socialiste për Integrim është shprehur se Bashkia e Durrësit, por dhe ajo e Beratit dhe ndoshta e Korçës do t’i përkasë kandidatit të saj. Kjo deklaratë është bërë nga nënkryetari i saj, Brokaj, por dhe nga anëtari i kryesisë, Braho.

kandidaturat e ps

1-Tiranë Edi Rama
2-Durrës Lefter Koka
3-Elbasan Qazim Sejdini
4-Korçë Niko Peleshi
5-Vlorë Shpëtim Gjika
6-Fier Baftjar Zeqo
7-Gjirokastër Flamur Bime
8-Lushnjë Fatos Tushe
9-Lezhë Koalicioni opozitar
10-Kukës Shoqëria civile
11-Shkodër Koalicioni opozitar
12-Dibër Muharrem Rama
13-Berat Fadil Nasufi

PS, sondazh për kandidaturat
Partia Socialiste do të zhvillojë një sondazh zgjedhor në qytetet më të mëdha të vendit. Në datën 9 tetor, kryetari i PS-së, Edi Rama, pret një grup ekspertësh të huaj në fushën e sondazheve publike, të cilët do të përcaktojnë pyetësorin e shkurtër dhe të qartë, bashkë me modalitetet e tij për zhvillimin e një sondazhi publik. Ky sondazh, i pari i këtij lloji në Shqipëri, kërkuar nga një parti politike para zgjedhjeve, do të përfshijë qytetet kryesore, bashkitë e të cilave kanë peshë elektorale me rëndësi. Konkluzionet e sondazhit do ta ndihmojnë kreun socialist për të pasur një gjykim sa më real të kandidaturave, që do të mbërrijnë në kryesinë socialiste pas procesit të propozimit dhe seleksionimit nga baza socialiste. Subjektivizmi i vënë re në përzgjedhjet e mëparshme dhe klientelizmi në përzgjedhjen e kandidaturave, veçanërisht ato të pushtetit vendor, kanë detyruar kreun socialist të ketë dhe një statistikë të tijën ballafaquese për të përzgjedhur kandidatin më të votuar dhe pranuar nga komuniteti lokal. Por përfundimin e këtij sondazhi Rama kërkon ta përdorë dhe në ballafaqimin e kandidaturave socialiste përkarshi atyre të partive aleate të koalicionit opozitar në fazën e fundit të përzgjedhjes së kandidatëve të përbashkët nga tryeza opozitare.

Kreu socialist bën bilancin e një viti drejtimi të PS-së
Rama: Ua ktheva partinë socialistëve të thjeshtë

Kreu socialist, Edi Rama, një vit pas marrjes së drejtimit të partisë, shprehet se nga një parti të shkëputur nga anëtarësia dhe njerëzit, e ka kthyer atë në parti të anëtarit dhe të udhëheqësve. “Para një viti mora drejtimin e një partie të dëshpëruar, e një partie që vinte pas një humbjeje traumatike, e një partie të shkëputur nga anëtarësia dhe nga njerëzit, e një partie që jetonte brenda një të majte të përçarë. Në një vit drejtoj një parti që ka vendosur anëtarin në qendër të vëmendjes dhe të aksionit të saj, një parti, e cila reformohet përditë, duke krijuar brenda saj një model të shoqërisë së nesërme, një partia, e cila sot është epiqendra e një të majte të bashkuar”, tha Rama. Kreu socialist shpjegon përpjekjet e tij për bashkimin e së majtës shqiptare. “Kërkova ndjesë në emër të Partisë Socialiste për gjithçka që ajo nuk arriti të bënte, apo bëri keq gjatë qeverisjes së saj. Një ndjesë e detyruar ndaj atyre qindra mijëra socialistëve, të cilët nuk e meritonin të kalonin nën thundrën e Sali Berishës dhe kësaj qeverie pushtuesish dhe nënvizova se e vetmja rrugë për t’u kthyer sërish në qeverisje dhe për të ndërtuar një Shqipëri të re është bashkimi i së majtës, duke kapërcyer të gjitha arsyet që kishin shkaktuar çarjen, përçarjen dhe konfliktin fatal brenda saj. Dhe e arrita”, tha Rama. Kryesocialisti shpjegoi dhe filozofinë e tij për modelin e PS-së, duke thënë se “socializmi im kërkon qytetarë të angazhuar dhe qytetarët mund të jenë të angazhuar nëse pyeten, dëgjohen dhe përfshihen në vendimmarrje”.