Gazetari: Njoftova me mesazh policinë për pengmarrjen

Ka qenë shpëtimtari i një pengmarrjeje që askush nuk dinte sesi mund të përfundonte. Profesioni e ka bërë që të nuhasë në ajër se bëhej fjalë për një udhëtim nga Durrësi drejt Tiranës jo të zakonshëm.

“Drejtor, në autobusin Durrës-Tiranë ka një njeri me granatë. Jemi paralel me antenat e Fllakës”. Këtë mesazh ka shkruar gazetari i njohur i Durrësit, Naim Hoti, me qëllim dërgimin në telefonin celular të kreut të policisë së qarkut. Ndërsa me shpejtësi kërkonte numrin e Nikolin Balës në skedën e telefonit, sms-ja ka përfunduar në telefonin e kreut të Prokurorisë së Durrësit, Nasip Naçe. Me urgjencë, kryeprokurori ka lajmëruar forcat e policisë, të cilat janë vënë në aksion. Ja si e tregon ngjarjen Hoti, kryeredaktor i gazetës lokale “Bulevard”.

Nëse ju kujtohet, kur hipi pengmarrësi në autobusin tuaj?
Autobusi u nis rreth orës 13:05 nga Durrësi me rreth 25 vetë. Më pas ai ndaloi edhe dy herë të tjera për të marrë udhëtarë të tjerë. Isha ulur në një nga ndenjëset e fundit dhe pranë meje ishte edhe një burrë i moshuar, ndërsa autobusi thuajse ishte mbushur plot. Ai që më vonë u bë pengmarrësi ynë ka hipur në ndalesën e fundit të autobusit, besoj rreth 2 km larg Durrësit, pranë NISH-Tullës.

A vutë re ndonjë shenjë shqetësuese te ky pasagjer?
Mbaj mend se sapo u ngjit në autobus u përball me fatorinon, i cili kërkonte biletat. Nuk e kuptova se çfarë folën, pasi isha krejtësisht i painteresuar, por menjëherë pas kësaj fatorinoja i kërkoi shoferit që të mbyllte dyert dhe të nisej. Personi iu drejtua pjesës së përparme të autobusit, por ndërkohë e kisha fiksuar se ishte rreth 25-30 vjeç, i veshur me pantallona dhe xhaketë xhinse, i parruar dhe i paqethur. Shikimi i tij që fiksohej në një pikë dhe thuajse nuk thoshte asgjë. Edhe ai vetë shumë pak e hapte gojën, por mesa duket fatorinoja dhe më pas shoferi, të cilit iu afruan së bashku po i bindeshin. Në atë kohë fatorino kërkoi që të mbylleshin perdet dhe njerëzit filluan të trembeshin. Paniku filloi kur disa nga njerëzit në radhët e para vunë re se ai mbante në dorë një granatë. Disa fëmijë filluan të qanin, ndërsa të tjerët kërkonin zgjidhje, ndonjëherë edhe duke bërtitur.

Ku ndodhe**** në ato momente?
Autobusi ndërkohë kishte ecur edhe disa kilometra të tjera dhe ndodhej përballë antenave të radiostacionit të Fllakës, pranë mbikalimit. Në këtë kohë unë kam shkruar mesazhin telefonik. Kur udhëtuam dhe rreth 200 metra, autobusi ndaloi në pikën e karburantit pranë Sukthit dhe shoferi zbriti. (Më vonë mësova se shoferi e kishte bindur autorin që të furnizonte autobusin se nuk kishte karburant”.
Më pas ai u ngjit prapë në autobus dhe eci edhe 15 metra të tjera përpara, pikërisht aty ku fillonte përsëri rruga e superstradës. Ndaloi përsëri dhe doli nga dera e tij.

Si ishte ndërkohë gjendja e pasagjerëve?
Në kohën kur shoferi ishte jashtë, dera e parë e udhëtarëve u hap papritmas dhe njerëzit pranë saj filluan të dalin. Pengmarrësi fillimisht u turr pas tyre, pastaj u kthye krejtësisht në të kundërtën dhe vrapoi në pjesën e pasme të autobusit. E pashë kur kaloi pranë meje. Kishte një granatë ofensive në dorë, por nuk kishte siguresë. Nga njohuritë që kam arrita ta njoh granatën me kuadrate të vogla. Gjatë kohës që po tentonte të dilte autori rrëshqiti dhe ra. Nuk e kuptova se çfarë i ndodhi, por pikërisht në këtë çast edhe unë u turra te dera e parë. Kur dola jashtë, pashë se pasagjerët kishte dalë të tërë dhe ishin të tronditur.

Po autori, ku ndodhej?
Personi që kishte granatën në autobus pashë se ndodhej në mes të she**** dhe kishte të njëjtën pamje të çoroditur. Ai qëndronte me shikimin e fiksuar diku dhe nuk lëvizte. Në atë kohë kishin mbërritur disa makina policie, forcat e së cilës e rrethuan dhe tentuan t’i hiqnin granatën nga duart. Njëri prej policëve iu afrua me kujdes dhe me një lëvizje profesionisti e mbërtheu me një dorë, ndërsa me tjetrën i bllokoi granatën. Më pas, me shpejtësi ai është prangosur dhe fut në furgonët e policisë. Bashkë me pasagjerët e tjerë na morën në pyetje për ngjarjen e më pas vazhduam rrugën me mjete të rastit. o.u

Shoferi: Më la siguresën e granatës në dorë

Gëzim Gjana, shoferi i autobusit, ndonëse ka qenë për minuta të tërë nën presion direkt të pengmarrësit, është munduar që të ruajë gjakftohtësinë. “Më la siguresën në dorë dhe vetë mbante granatën, duke më kërcënuar që ta çoja në Rinas, ndryshe do e shpërthente”, tregon Gjana. E vetmja zgjidhje e momentit që ka menduar për të fituar kohë ka qenë furnizimi i makinës me karburant. Ia ka mbushur mendjen autorit 25-vjeçar se sapo të furnizonte mjetin do e dërgonte në Rinas. “Nëse nuk do të arrinte në kohë policia të zgjidhte këtë situatë për të shpëtuar pasagjerët, do isha detyruar të plotësoja kërkesën e tij”.

Kryeministri Berisha përgëzon policinë

TIRANE - Menjëherë pas ngjarjes, kryeministri Berisha ka përgëzuar efektivat e Policisë së Shtetit për zgjidhjen pa pasoja të situatës së krijuar në autobusin e linjës Tiranë-Durrës. Sipas zyrës së shtypit, kryeministri vlerëson reagimin e menjëhershëm, profesional dhe kurajoz të drejtuesve dhe punonjësve të policisë, që bënë të mundur parandalimin e një ngjarje që mund të sillte pasoja tragjike. Kryeministri gjithashtu falënderon pasagjerët për informimin në kohë dhe bashkëpunimin me forcat e policisë.

pengmarrja 1

Në Lezhë
Më 8 shtator të vitit të shkuar, autobusi i linjës Tiranë-Shkodër u mor peng nga tre persona të armatosur e me maska, të cilët kishin si qëllim grabitjen e pasagjerëve. Autorët, ende të paidentifikuar hipën në autobusin me 50 pasagjerë në bord, në afërsi të fshatit Kallmet të Lezhës. Ata detyruan të gjithë pasagjerët që t’u dorëzonin paratë dhe sendet me vlerë që kishin me vete. Njëri prej grabitësve mbante një pistoletë në kokën e shoferit të autobusit, ndërsa dy të tjerët vepronin duke mbushur qeset me paratë dhe bizhuteritë e udhëtarëve. I detyruar nga pengmarrësit, autobusi devijoi nga rruga nacionale në një zonë të thellë të Lezhës. Aty, autorët kanë hedhur një granatë brenda në autobus dhe duke shfrytëzuar panikun e krijuar kanë mundur të dalin e të arratisen drejt malit. Një prej udhëtarëve kishte mundur të lajmëronte policinë me telefon disa minuta më parë dhe në drejtim të zonës ku u ndalua autobusi shkuan forca të shumta të rendit dhe të RENEA-s. Por megjithë kërkimet për autorët
nuk u arrit të bëhej identifikimi i tyre.

pengmarrja 2

Në Mirditë
Ka qenë data 8 shkurt kur një tjetër pengmarrje autobusi u shënua, pikërisht në linjën Kukës-Tiranë. Protagonistë u bënë dy vëllezërit Rifat e Ramiz Onuzi, të cilët kishin si qëllim bërjen e presionit ndaj shtetit për pronat në Kukës, por që shkaktuan dy persona të vrarë. Autobusi që u mor peng prej tyre me forcën e armëve dhe granatave mbeti i izoluar në Rrëshen për orë të tëra, bashkë me 19 pasagjerë që donin të udhëtonin drejt kryeqytetit. Gjatë kohës që pasagjerët të tmerruar kanë dashur të dalin, autorët kanë lëshuar një granatë, nga shpërthimi i së cilës vdiq njëri prej udhëtarëve dhe u plagosën të tjerë. Granata e dytë i mori jetën një punonjësi të policisë, Fran Kaçorrit, i cili me kolegët e tij u vu në ndjekje të autobusit ku ndodheshin grabitësit. Në vendngjarje kanë mbërritur forca policie të Rrëshenit, Lezhës dhe forca speciale të RENEA-s, të cilat kanë arritur të bëjnë neutralizimin e grabitësve duke përdorur granata tymuese. Vetëm atëherë është mundur që të futen në autobus pas disa orësh dhe pas prangosjes së autorëve, t’u japin ndihmën e parë pasagjerëve.

Kërcënon shoferin ta çojë në Rinas. Arrestohet pas 20 minutash 25-vjeçari nga Kamza

Durrës, merret peng autobusi
I çekuilibruari në polici: Doja të ikja në Itali

Me idenë fikse në kokë se mund të merrte fare lirshëm një aeroplan që do ta çonte në Itali, Adrian Sina nuk ka nguruar të marrë peng një autobus të mbushur me pasagjerë.

Për rreth 20 minuta, të 35 udhëtarët e nisur nga Durrësi për të shkuar në Tiranë kanë përjetuar çaste paniku, duke parë granatën pa siguresë në dorën e 25-vjeçarit kërcënues.
“Kam në dorë një granatë ofensive, drejtoje autobusin për në Rinas!” Zëri i fortë i 25-vjeçarit Adrian Sina ka dhënë alarmin te rreth 35 pasagjerët e autobusit me targë DR 7188 B, i cili kishte marrë drejtimin drejt Tiranës. Në autobusin e nisur nga Durrësi në orën 13:05 askush nuk e kishte vënë re një djalë të ri të ulur në rreshtin e parë me trup mesatar dhe të veshur me blue jeans. Djali me mjekër të dendur, ndonëse shfaqte shenja nervozizmi, nuk është dalluar për të paktën 8 km rrugë. Pikërisht teksa autobusi i kuq kishte përshkuar 15 minuta rrugë në autostradë, syri i mprehtë i shoferit Gëzim Gjana dallon nëpërmjet pasqyrës metalin e një granate ofensive në brezin e pantallonave të djalit enigmatik. Me një gjakftohtësi për t’u pasur zili, shoferi bën një parkim emergjent, duke u shpjeguar pasagjerëve se karburanti i autobusit është në nivelin zero. Truku duket se ka funksionuar, të paktën përkohësisht, deri në momentin kur një vajzë ka dalë furishëm nga autobusi, pasi ka parë granatën e mbuluar nga xhaketa xhins. Sipas dëshmitarëve okularë, në këto momente plani i Adrianit është dekonspiruar, ndaj pengmarrësit nuk i mbeti gjë tjetër, veçse të deklarojë hapur synimin e tij drejt Rinasit me granatën në dorë. Në këto kushte autobusi nuk është furnizuar me karburant, pasi nën kërcënimin e granatës shoferi është urdhëruar të vazhdojë udhëtimin. Kjo kohë e çmuar prej 2-3 minutash ka shërbyer për të dhënë alarmin në sallën operative të policisë së qarkut, pasi një prej pasagjerëve kishte njoftuar me anë të një mesazhi prokurorin e rrethit. Alarmi i kuq në Sukth perceptohet edhe në Shijak, qytezë nga e cila nisen dy furgonë policie. “Autobusi eci edhe 100 metra të tjera, ndërsa pengmarrësi kërcënonte me granatën, së cilës i kishte hequr siguresën. Djali me granatë qëndronte në këmbë duke terrorizuar pasagjerët dhe duke shfaqur shenja çekuilibri. Pasi sirenat e para të policisë u dëgjuan në kilometrin e tetë të autostradës, Adrian Sina braktis autobusin, duke synuar arratisjen në vendin e quajtur Ura e Fllakës”, deklaron për “Panorama”, një punëtor i karburantit “Anoil”, në të cilin u parkua autobusi. Pengmarrësi, në arrati e sipër tenton të fshihet në një bar të autostradës të quajtur “B and G”, por edhe aty diktohet. Sipas burimeve, pronari i lokalit së bashku me disa kamerierë kanë qenë personat e parë që bllokuan pengmarrësin duke e goditur me grusht. Në një mënyrë mjaft të sinkronizuar me punonjësit e lokalit ka ndërhyrë edhe Policia e Shtetit. Adrian Sina është neutralizuar nga veprime të bashkërenduara mes policisë dhe komunitetit. Në aksionin “blic” u angazhuan mbi 40 efektivë policie, të cilët i bllokuan pengmarrësit edhe granatën, pa siguresë që mund të shpërthente nga çasti në çast. Afro 30 minuta pas nisjes nga Durrësi pasagjerët, mes të cilëve ndodheshin edhe 4 fëmijë, kanë marrë frymë lirshëm, teksa kanë mësuar se pengmarrësi është prangosur. Në seancën e parë të pyetjeve, Adrian Sina ka deponuar përpara bluve të Durrësit se donte të shkonte në Itali përmes Rinasit. Ai ka nënvizuar se punësimi në Itali do të ishte zgjidhja e jetës së tij të mbushur me probleme ekonomike.

Familjarët e Ardian Sinës në polici: S’dinim asgjë për djalin
“Një javë më parë u nis për në Greqi, mori peng autobusin”

TIRANE – Në afërsi të Kodrës së Kamzës në fund të një rruge të ngushtë me banesa private në dy anët e saj, ndodhet banesa e Ardian Sinës, 25-vjeçarit që kërcënoi me granatë pasagjerët e autobusit të linjës Durrës-Tiranë. Familja Sina ka tri banesa në të njëjtin bllok ndërtimesh, ndërsa dy prej tyre nuk kanë shumë kohë që kanë përfunduar. Trokasim në portën e madhe prej hekuri dhe pak çaste më vonë në hyrje të oborrit shfaqet nëna e Ardian Sinës. Ajo refuzoi të fliste për ngjarjen edhe pas këmbënguljes për të mësuar diçka prej saj, për djalin 25-vjeçar që ishte arrestuar nga policia. Nëna e të akuzuarit nuk preferoi të bënte asnjë koment, duke thënë se deklarimet e saj i kishte dhënë për policinë vetëm pak çaste para se të mbërrinim aty. Pavarësisht se nuk dëshiron të flasë për mediat duke shprehur besimin e saj te policia, me mirësjellje nëna e Ardian Sinës na fton për një kafe në banesën e familjes Sina. Nuk i vjen mirë kur i themi se duhet të shkojmë, por gjithsesi na përshëndet dhe më pas mbyll derën e madhe prej metali të lyer me vishnje të errët. Banorët e zonës në afërsi të Kodër-Kamzës na thonë se policia kishte shkuar në shtëpinë e Ardian Sinës dhe kishte kontrolluar gjithçka. Më pas, vëllezërit dhe babai i 25-vjeçarit të arrestuar janë shoqëruar nga policia e Tiranës, ku janë marrë në pyetje deri në orët e mbrëmjes. Burime zyrtare të policisë së kryeqytetit kanë pohuar dje se të afërmit e të arrestuarit janë shprehur se Ardian Sina kishte një javë që ishte larguar nga shtëpia. Sipas policisë, të afërmit janë shprehur se 25-vjeçari ishte nisur për në Greqi dhe se janë habitur kur kanë mësuar se ai ishte autori i ngjarjes. Pyetjes së policisë përse ndodhej në Durrës Ardian Sina, të afërmit e këtij të fundit i janë përgjigjur se ata e dinin djalin në Greqi dhe se nuk kishin të afërm në Durrës.