Dy ndeshje pezullim Fabio Grosos dhe një Zllatan Ibrahimoviçit. Dy turne pezullim edhe për Sinisha Mihajlloviçin. Kanë qenë këto masat e marra nga komisioni disiplinor i UEFA-s ndaj dy lojtarëve të Interit, të cilët u ndëshkuan me kartonë të kuq në ndeshjen e Ligës së Kampioneve ndaj Bajernit të Mynihut më 27 shtator, dhe për zëvendësin e Roberto Mançinit, i cili ishte protagonist i një përplasjeje të fortë verbale me drejtuesin e klubit gjerman, Uli Hënes, pas kartonit të kuq të Grosos. Kështu që Interit do t'i duhet të bëjë si pa Groson, ashtu edhe pa Ibrahimoviçin në takimin e ardhshëm në Champions, atë të brendshëm ndaj Spartakut të Moskës, më 18 tetor. Ndërsa mbrojtësi zikaltër, që mori karton të kuq për faullin ndaj Vili Sanjolit, do të mungojë edhe në sfidën e mëpasme në fushën e rusëve, më 31 tetor. Kundër këtyre vendimeve është e mundur të paraqitet ankesë brenda dhe jo më pas 24 orëve të ditës së nesërme. Së bashku me Mihajlloviçin është pezulluar për dy turne edhe Uli Hënesi, zv.presidenti i këshillit ekzekutiv të Bajernit. Gjatë sfidës së ndeshjes së dytë të Championsit, që të dy kishin dalë nga kufiri i stolave dhe ishin ndëshkuar me karton të kuq nga drejtuesi i takimit dhe kështu që mund t'i shikojnë vetëm nga tribuna dy ndeshjet e ardhshme të klubeve të tyre në Europë. Në fakt, e kanë të ndaluar të hyjnë në dhomat e zhveshjes, në tunel ose në stol, as para dhe as gjatë ndeshjes, dhe nuk mund të kontaktojnë në asnjë mënyrë me skuadrat përkatëse.