Jeta e natës, meny e re në Tiranë

TIRANË - Përbëjnë modën më të fundit të jetës së natës në kryeqytet, por jo pse mbajnë kapele firmato “Desquared” apo xhinse “D&G“. Sjellin përtej tendencave në look, edhe stilin e festave-disko. Bëhet fjalë për të DJ-të e huaj, animatorët e rinj të klubeve të natës në Tiranë. Pas balerinave të huaja, tani duket se konkurrenca mes diskove dhe pabeve në kryeqytet konsiston edhe në organizimin muzikor me Dj të huaj. Vijnë zakonisht nga Italia, por jo vetëm. Alex G është njëri prej tyre dhe gjendet këtë fundjavë në Tiranë për të pestën herë, kësaj radhe për të animuar netët kryeqytetase të “Grand Place” te “Tirana International Hotel”, i ftuar nga një DJ shqiptar, por që punon në Itali, Korita DJ. Risia që sjell në Tiranë Alex G është folësi i diskos, i cili siç rrëfen ai, nuk mungon më prej kohësh në Italinë e ngopur me jetë nate. Një lloj animatori ose zëri të diskos, kështu e quan veten Alex, duke shtuar se megjithatë, në thelb është një DJ. Një shëtitës-nate nëpër diskot e të gjithë botës nga Ibiza deri në Shqipëri, ai rrëfen tendencat e jetës së natës dhe befasimin me Shqipërinë, një vend i cili, sipas tij, është i etur për argëtim, ndryshe nga vendi i tij, Italia, e cila, siç rrëfen, është pak e lodhur nga daljet e vona tashmë.
“Sidoqoftë, nuk mungojnë festat e mëdha dhe të shfrenuara, të cilat tanimë nuk i lenë asgjë rastësisë, por organizohen deri në detajin më të imët. Kjo përbën edhe ndryshimin me diskotekat shqiptare, të cilat ende nuk kanë programe dhe organizim të mirëfilltë. Megjithatë, diçka ka filluar të ndryshojë dhe këtë e tregon edhe fakti përse ne jemi këtu”, - tregon DJ Alex, i cili ka punuar për pesë vjet në një diskotekat më të mëdha italiane që është “Divina e Follia”, ndërsa thotë se bën animatorin dhe DJ prej 14 vjetësh. Mjek dhe Dj njëkohësisht, ai tregon se edhe muzika është një lloj terapie tingujsh. Sidomos kur është “house”, rryma e tij e preferuar. Edhe pse i pëlqejnë festat që organizohen në Tiranë, thotë se shpesh përzierjet muzikore që bëhen janë të papërshtatshme. Sa i përket muzikës që pëlqehet në botë, ai thotë se 3-4 vjet më parë nuk flitej për gjë tjetër veçse për “House”, por tani më e përhapur është muzika elektronike. Shumë të komercializuara, Alex G flet për krizën e të ashtuquajturave maksi-diskoteka. “Tanimë dallohen qartë festat cilësore nga ato të masës, të cilat ndryshojnë shumë nga njëra-tjetra. Kanë nisur të pëlqehen gjithnjë e më shumë festat e vogla dhe në ambiente më intime”, - thotë ai.
Ndërsa të gjithë janë në kërkim të gjërave të reja, pasi njerëzit janë të lodhur dhe disi të mërzitur ngaqë gjejnë pak motive të reja në lokalet e natës, Dj italian shprehet se përparësia e një vendi si Shqipëria është se ka shumë dëshirë të eksperimentojë gjëra të reja. “Si në çdo vend ka gjëra të mira dhe të këqija, por e rëndësishme është se ka shumë dëshirë për t’u zbavitur”, - thotë ai, ndërsa Dj. shqiptar, Adi Korita, i cili punon në diskotekat italiane prej 13 vjetësh, rrëfen se në Shqipëri ka zbuluar gjithashtu lokale shumë të bukura dhe të realizuara edhe nga pikëpamja e stilit në arkitekturë. Ai ka tre vjet që është kthyer në Shqipëri dhe thotë se po përpiqet të ofrojë në mënyrë muzikore të lokaleve në Shqipëri muzikën ‘house’ që është gjithashtu e preferuara e tij, por shton se klientela e kësaj lloj muzike këtu është e kufizuar. “Këtu dëgjohet shumë muzikë ballkanike, por ka gjithashtu Dj shumë të mirë, të cilët kanë edhe kreativitet personal. Problemi i vetëm është që shpesh janë të detyruar të dëgjojnë pronarët për shijet muzikore. Unë jam i vendosur të mos e bëj këtë, ndërkohë që po bëj edhe muzikë në bashkëpunim me disa këngëtarë si Redon Makashi, Ingrid Gjoni, Sajmir Çili etj.”, - thotë Dj shqiptar me eksperiencë italiane, duke përfunduar se po përpiqet t’i qëndrojë frymës së re edhe në muzikën që bën përveç asaj që rrotullon në disko.