PD: Zgjedhjet do t’i bëjmë me këtë Kod

Replikon opozita: Eshtë njëlloj si të mos kesh kod fare

Partia Demokratike është e gatshme të hyjë në zgjedhje me Kodin e vjetër zgjedhor që ndërkombëtarët, por edhe ajo vetë e ka kritikuar aq shumë. Por PS deklaron se nuk merr pjesë fare në zgjedhje, nëse Kodi nuk ndryshon. Reagimet mes palëve PD-PS që në 30 gusht nënshkruan bujshëm një marrëveshje mirëkuptimi, vijnë pas bllokimit të vazhdueshëm të komisionit për reformën zgjedhore.
“Asgjë dhe askush nuk do të mund të pengojë mbajtjen e zgjedhjeve në Shqipëri, pasi është një nga elementët fillestar të funksionimit të një vendi demokratik”, tha dje Nishani i PD, duke lënë të kuptohet se zgjedhjet nuk do të shtyhen nga qëndrimi i të majtëve dhe zgjidhja e vetme në këtë rast është përdorimi i Kodit të vjetër zgjedhor.
“PS-ja nuk mund të hyjë në zgjedhje me Kodin e vjetër. Të hysh në zgjedhje me Kodin në fuqi, është si të hysh në zgjedhje pa Kod. Kodi Zgjedhor që kemi ka skaduar në shumë elementë”, - replikoi bashkëkryetari socialist, Ben Blushi. Madje deputeti socialist tha se nuk mund të hyhet në zgjedhje, për sa kohë që nuk është zbatuar marrëveshja mes partive politike e nënshkruar në 30 gusht.
Bllokimi
“Opozita po bllokon punën e komisionit dhe njëkohësisht dhe realizimin e reformës zgjedhore. Ne kemi arritur të miratojmë amendamentin për bërjen e listës së zgjedhësve, por që fatkeqësisht për shkak të synimeve bllokuese oportuniste të opozitës, nuk po kalon për miratim në seance plenare si procedurë detyruese”, -akuzoi Nishani. Por Blushi i rikujtoi se duhen zgjidhur të gjitha pikat e marrëveshjes njëherësh. “Marrëveshja mes partive politike, e cila parashikon zgjidhjen e çështjes së listave që nuk është zgjidhur ende, çështja e KQZ-së dhe e bordeve të medias, që ishin tre kushtet tona për të hyrë në zgjedhje dhe për sa kohë asnjëra prej tyre nuk është vënë në funksion, sigurisht që ngrihen pikëpyetje të mëdha mbi vullnetin e kësaj qeverie për t’ju përmbajtur marrëveshjes që bëmë”, - theksoi socialisti.
Ndryshimet
Si PD-ja ashtu edhe PS-ja kanë firmosur për të ndryshuar Kushtetutën për shtimin e dy anëtarëve në Komisionin Qendror të Zgjedhjeve dhe për të zgjatur mandatin e të zgjedhurve vendorë, por asnjë s’merr përsipër të formulojë amendamentin. “Në momentin që ndryshimet në Kushtetutë miratohen nga 3/5 e Parlamentit, që në këtë moment, ne si përfaqësues të maxhorancës në komision jemi të gatshëm që brenda afateve të limituara të miratojmë amendamentin për ndryshimin e Kodit ekzistues”, - tha Nishani. “Ne nuk mund të marrim iniciativa për ndryshimet në Kushtetutë, pasi jemi në minorancë dhe kemi më pak numra se maxhoranca dhe sigurisht asnjë iniciativë e jona nuk mund të miratohet, përderisa nuk ka një vullnet nga shumica”, - tha Blushi.