Tetor 8, 2006

Debatet e ashpra në parlament rreth rrëmbimit të avionit “Turkish Airlines” nga një shtetas turk, që sot e gjithë ditën lë shumë pikëpyetje për mënyrën sesi nisi dhe përfundoi e tërë historia kanë tejkaluar caqet e ashpërsisë konfliktuale pozitë-opozitë. Në mënyrë të pashpejgueshme deputetët, përfshirë edhe ndonjë ministër morën arratinë nga objekti i debatit duke rrahur ujë në tavan përmes teorive absurde. Për turpin tyre të madh intolerancën vazhdojmë ta gjejmë në mesin e politikëbërësve, pushtetarëve dhe shtetarëve, të cilët marrin kurajon të kacafyten dhe nën efektin e urrejtes patologjike ndaj njëri –tjetrit gërvishtin tema të dëmshme, të cilat më pas bëhet vonë për t’i korrigjuar.
Ndërsa bëhej fjalë për një çështje shumë të ndjeshme dhe të kushtueshme për imazhin e vendit , e cila ka ndjeshmëri të theksuar edhe në aspektin global deputetët e maxhorancës dhe të opozitës treguan shkoqur së nuk kanë haber nga real politika, nga gjeopolitika dhe aq më pak nga religjioni. Ishte e dhimbshme mënyra sesi u zhvillua replika dhe kundërreplika mes Ben Blu**** dhe Besnik Mustafajt, dy figurave që konsiderohen të moderuara dhe larg proviniencave me mentalitet regresiv. Ishte çmendurisht i pajustifikueshësh etiketimi alla Mustafaj kundrejt deputetit socialist: “unë nuk e kuptoj këtë njeri, më bën shumë përshtypje urrejtja e tij ndaj myslimanëve” u hakërrye Ministri ynë i Jashtëm. Ec e merre vesh se kujt i shërben kjo akuzë!. Sikurse ishte krejtësisht pa vend shqetësimi i Blu**** i cili tha se “ndaj bindjen, ashtu si 90 për qind e qytetarëve se jam qytetar evropian dhe se nuk jam shtet islamik”, për shkak se nuk ka asnjë dilemë se Shqipëria është shekullare dhe ka orientim të përcaktuar evropian, që shoqëria multifetare përqafon vlerat kombëtare më shumë sesa ato fetare.
Nga kjo pikëpamje, parlamenti shqiptar, pa asnjë hezitim mund të përkufizohet si oazë e intolerancës dhe amoralitetit dhe lajthitjeve politike, si ambjent ku dallohet qartazi inflacioni intelektual, si strehëz ku mbillet urrejta patologjike ndaj kundërshtarit, si arenë luftërash të pafundme, si plantacion ku kultivohen antivlera. Është thuajse mision i pamundur që një seancë e parlamentit shqiptar t’i hapë dhe mbyllë punimet pa prodhuar konfliktualitet dhe i pa shoqëruar me retorika irracionale. Dhe për të shfajësuar këto veprime, justifikimin shumëkush e ka në majë të gjuhës: tranzicioni është shkaktari kryesor i fatit tragjikomik të parlamentit shqiptar. Mirëpo, në kushtet kur politika dhe parlamenti nuk zbatojnë as minimumin e tolerancës së shoqërisë shqiptare me përkatësi multifetare, që nuk marrin parasysh as statusin themeltar të shtetit të bazuar në identitetin kombëtar , shenjat bëhen më alarmante. Në këtë kuptim, seanca e ditës së enjte duhet të shuhet nga kujtesa e shqiptarëve për faktin se intoleranca dhe injoranca politike mund të bëhen shkak për lëkundje sizmike të identitetit kombëtar, madje duhen injoruar në mënyrë sistematike çdo divergjencë me karakter dyshues për orientimin e shqiptarëve.
Të gjithë jemi të përgjegjshëm dhe koishientë dhe askush nuk duhet të ketë dilema për orientimin perëndimor dhe evropian të shqiptarëve në të gjitha hapësirat ballkanike. Sikundër, në asnjë rrethanë shqiptarët nuk duhet të kenë dilema rreth bërthamës së orientimit perëndimor, si në rrafshin kulturor, ashtu edhe në atë politik dhe shtetëror, packa se të tjerë rrotull nesh përpiqen të na njollisin si islamikë të thekur. Në këto kushte, parlamentarët, politikanët dhe ministrat tanë të bëhen vetë administrues të emocioneve dhe irracionalitetit deri në lajthitje të pashpjegueshme politike , sepse kohezioni i brendshëm ndërfetar është më i rëndësishëm sesa etja për pushtet, më crucial është imazhi i vendit në botën e qytetëruar sesa orekset për të poshtëruar kundërshtarin politik. Të paktën, ata të mos bëhen pjesë e shtrembërimeve të fakteve historike, apo e devijimeve nga shtrati i orientimit. Fundja, Shqipëria krahas harmonisë së bashkëjetesës ndërfetare, praktikisht ka treguar se prioritet i veçantë është çështja kombëtare. Bie fjala,sëse do të shikonim konfliktet më të fundit të ndodhura në hapësirat shqiptare(Kosovë dhë Maqedoni), gjithkush do të konstatonte se thelbi i konfikteve ishte me karakter kombëtar dhe aspak fetar. Në Shqipëri të tria fetë kryesore janë trashëgimi kombëtare ,e për rrjedhojë ballkanike dhe evropiane. Politikanët tanë duhet të kuptojnë në thelb se Shqipëria nuk mund të jetë peng i polarizimeve që vijnë nga papërgjegjshmëria e tyre, por ata të gjejnë moralin e humbur dhe kurajon e munguar dhe të pohojnë sa herë që nevojitet se Shqipëria është vend shekullar dhe vetëm në këtë prizëm duhet trajtuar shoqëria jonë, se shqiptarët pavarësisht nga përkatësitë fetare e përkufizojnë identitetin e tyre , lidhur kryekëput me atë kombëtar. Për të parandaluar ngjarje të rrëmbimit të avionit “Turkish Airlines “apo dukuri të tjera që shfaqen në gjithë globin duhet kooperim i të gjitha forcave politike dhe hallkave shtetërore. Jo vetëm kaq. Parlamenti dhe politika shqiptare duhet t’i kushtojë më shumë rëndësi shpjegimit të dilemave që shfaqen aty këtu nëpër botë lidhur më Shqipërinë si vend islamik.Asnjë efekt pozitiv nuk vjen nga zhurma që shkaktohet nga vetë z. Mustafaj në parlament, përfshirë edhe deputetët e gjithë spektrit politik , të cilët bëjnë mirë t’i lënë cic- micet në sallën e parlamentit dhe t’u dëftojnë në mënyrë të argumentuar të gjithë skeptikëve evropianë se Shqipëria, pavarësisht se ka përqindje më të madhe myslimane, megjithatë islamizmi shqiptar është paqësor dhe aspak agresiv dhe nuk ka asnjë lidhje me veprimet dhe aktet terroriste në Lindjen e Mesme, përkundrazi është në luftë të përjetshme dhe të pandërprere kundër terrorizmit. Të thuhet troç se statuti themeltar i shtetit i njeh dhe i respekton në mënyrë të barabartë të tria besimet fetare dhe ndryshe nga vende të tjera me përkatësi myslimane ka si etalon identitetin kombëtar dhe orientimin perendimor.
Meqë bëhet fjalë për një çështje shumë të rëndësishme që ka të bëjë me fatin e kombit shqiptar, me progresin dhe rrugën e tij drejt familjes së madhe evropiane, paralamentarët, politikanët dhe veçmas Ministria e Jashtme e përfaqësuar nga z.Mustafaj të lënë mënjanë përplasjet pa asnjë sens logjik, apo lajthitjet e momentit dhe të nisë një tjëter betejë, atë të afirmimit të vlerave perëndimore të shqiptarëve në cdo cep të globit. E pra Shqipëria nuk ka kohë për të humbur si pasojë e deformimeve të realiteteve apo propagandës për të marrë një grusht vota më shumë në zgjedhjet lokale.