Sytë e tij të kaltër dhe vështrimi i ëmbël, me sa duket i bindën regjisorët hollivudianë se ai mund të ishte një aktor i mirë. Dhe ndoshta pikërisht për këtë arsye i dhanë mundësinë, që qysh në adoleshencë të luante në krah të një prej emrave më të mëdhenj të ekranit, Robert de Niro. Një përvojë që, siç do të pohonte më vonë, do ta ndihmonte shumë bukuroshin, Leonardo Di Caprio, për të mbijetuar në botën e egër të filmit. Dhe vetëm 4 vjet më vonë, ai arriti të shënonte një hyrje të fuqishme në kinema si protagonist në një prej filmave më të vlerësuar të atyre viteve, “Titanic”. Por si u rrit Di Caprio dhe ëndrra e tij? Hap pas hapi me sfidat dhe arritjet profesionale e personale të Leonardos, pas daljes së filmit të tij më të ri, “The Departed”.
Biografia
Emrin ia ka vendosur e ëma, një grua me origjinë gjermane, e cila gjatë shtatzënisë në momentin kur ndjeu goditjen e parë të fëmijës në bark ishte duke vështruar një pikturë të Da Vinçit në Uffizi. Një vit pas lindjes së tij, ajo dhe bashkëshorti i saj italian George u divorcuan. Leo u rrit në Echo Park, në atë kohë një e zonë e Los Angelesit, dominuar nga droga. Në moshën 5-vjeçare u paraqit në shfaqjen televizive të preferuar “Romper Room”, por rrezikoi të largohej prej aty për sjellje të keqe. Pas disa rolesh në filma komercialë si (“Mickey’s Safety Club”) dhe në disa serialë televizivë mori një rol debutues në “Critters 3” (1991), ndërsa në filmin “This Boy’s Life” (1993) në krah të Robert De Niros me rolin e Toby-t, karriera e tij shënoi një ngjitje të dukshme.
Çmimin e parë akademik dhe nominimin për “Globi i artë” i mori për rolin e vështirë të Arniet në filmin “What’s Eating Gilbert Grape” (1993). Ai do të krijonte impakt të jashtëzakonshëm me një rol shumë bashkëkohor tek “Romeo + Juliet” (1996), ndërsa hyrjen e fuqishme në botën e kinemasë do ta shënonte me filmin më të madh “Titanic” (1997), që u vlerësua me disa nominime në “Academy Awards”, ndonëse vetë Leo nuk mori ndonjë çmim. Performanca e tij në “The Man in the Iron Mask” (1998/I) nuk shënoi ndonjë arritje e po kështu edhe “The Beach” (2000/I), ndërsa në vitin 2002 mundi të rikthehej potent me “Catch Me If You Can”.
Filmi i ri
Filmi më i ri që ka për protagonist Leonardo Di Caprion dhe që mban titullin “The Departed” është prezantuar pikërisht këto ditë tetori. Ky produksion kinematografik shënon bashkëpunimin e tretë midis Leonardos dhe drejtorit Martin Scorsese. Dy bashkëpunimet e para, “Gangs of New York” dhe “The Aviator” arritën të merrnin 21 nominime në “Academy Award nominations”.
Skenari i filmit në të cilin luan aktori 32-vjeçar është shkruar nga William Monahan dhe bazohet në filmin “Infernal Affairs”. Ngjarja e vendosur në Boston, që paraqet përplasjet midis policisë shtetërore të Bostonit dhe mafies irlandeze, sjell historinë e dy policëve: njëri i infiltruar në organizatën mafioze për llogari të policisë dhe tjetri një polic që realisht punon për mafien. Loja e maces me miun bëhet gjithmonë e më intensive në përpjekje për të zbuluar identitetin e njëri-tjetrit.
Rikthim në suksesin e “Titanic”
Performanca në filmin “Titanic” do t’i jepte mundësinë Leonardo Di Caprios dhe partneres së tij, Kate Winslet, të shtrinin krahët drejt suksesit, çmimeve dhe pasurisë. Sot, nëntë vjet më pas ata i rikthehen këtij suksesi, por me partnerë të ndryshëm. Shumë shpejt filmat e tyre, përkatësisht “The Departed” dhe “Little Children” do të jenë nëpër kinematë botërore. Në bashkëpunimin me të njohurin Martin Scorsese dhe aktorët Matt Damon e Jack Nicholson, Leo pret një nominim për filmin më të mirë, ndërsa Kate do të hapë festivalin e filmit në New York sonte në mbrëmje.
Projektet që do të shpëtojnë botën
Leonardo Di Caprio është i kujdesshëm, dhe jo vetëm në fushën e filmit, modës, të parave, etj. Ai tashmë po tregon kujdes edhe për mjedisin. Dhe për të treguar se çfarë është në të vërtetë raca njerëzore, Di Caprio po tenton të shpëtojë botën përmes dy filmave dokumentarë me metrazh të shkurtër, të titulluar “Water Planet” dhe “Global Warming”. “Ngrohja globale nuk është vetëm problemi kryesor ambientalist i ditëve të sotme, por edhe çështja më e madhe me të cilën duhet të përballet njerëzimi”, është shprehur aktori. Këto ditë Leo do të fluturojë drejt Romës, ku më 15 tetor do të prezantojë filmat, të cilët trajtojnë argumente shumë të rëndësishme: të drejtën për ujë që deri më sot u është mohuar miliona njerëzve dhe ngrohjen e tokës. Këto tema aktori i ka shumë për zemër, nisur edhe nga kujdesi i tij për ambientin dhe bashkëpunimi me “Green Cross International”. Më pas, në mbrëmje Di Caprio do të prezantojë edhe filmin “The Departed”.
Fama e pengon të krijojë miqësi
Leonardo Di Caprio mund ta ketë botën nën këmbë, por aktori ka bërë të ditur se është i lodhur nga njerëzit që i qëndrojnë pranë dhe ka nisur të bëhet cinik ndaj statusit të tij si njeri publik, sidomos pas famës që fitoi me filmin “Titanic” në vitin 1997. Ai ka bërë të ditur se ndjehet kaq i bezdisur, saqë nuk dëshiron të ketë miq të tjerë. Leo, 32, vjeç, që pak kohë më parë u shkëput nga një lidhje me supermodelen, Gisele Bundchen, pas një stuhie spekulimesh nga ana e medias ka bërë të ditur se ndodhet në një betejë të vërtetë midis jetës që ai bën dhe kërkesës për ta futur veten në punë. “Nuk është aspak e këndshme të takosh njerëz, të cilët janë të gatshëm që në mendjen e tyre të përcaktojnë se kush je ti”, citon gazeta “Sun” fjalët e aktorit.
“Këta nuk janë tipi i njerëzve me të cilët unë dua të shoqërohem, madje nuk më intereson as të bisedoj me ta”, ka shtuar. “E vërteta është se unë nuk kam më nevojë për shokë. Kam miqtë e mi. Por takoj njerëz dhe nëse ata janë dikush dhe ndiej një lidhje me ta, nuk u them: “Edhe unë jam po kaq i famshëm dhe skeptik”, deklaron aktori. “Por kam një grup të madh njerëzish rreth vetes dhe gjithë këto situata më kanë bërë më të ngushtë me ta”, përfundon. Leo, i cili luan me Jack Nicholson, Matt Damon, Martin Sheen në filmin e ri të Martin Scorsese, ”The Departed”, ka pohuar se suksesi i “Titanic” i ndryshoi jetën.

Të dhënat

Emri: Leonardo Wilhelm Di Caprio
Shkurtimi: Leo
Ditëlindja: 11 nëntor 1974
Vendlindja: Hollywood, California, USA
Gjatësia: 1.80 m
Shenja e horoskopit: Akrepi
Profesioni: Aktor

Filmi më futi në jetën reale të mafies

Bashkëpunimi i tretë me Scorsese duket se e ka bërë të ndjehet mirë Di Caprion dhe në pritje të suksesit, lidhur me këtë eksperiencë të re të një personazhi, krejt ndryshe nga të zakonshmit, aktori pohon: “Karakteret tona janë dy anë të së njëjtës monedhë, parë kjo në shumë aspekte. Ata vijnë nga ambiente të ndryshme, por do ta kishin më të lehtë të bënin zgjedhjen e karakterit tjetër, në varësi të rrethanave. Nuk jam shumë i familjarizuar me këtë formë dhune, por kjo është ajo që duhet të bëjë një aktor, të përshtatet. Dhe nëse nuk ke praktikuar kurrë gjëra të tilla në jetën tënde reale, atëherë shko të takosh njerëz që i kanë bërë vërtet këto lloj gjërash. Për mua ka qenë pjesë e punës udhëtimi deri në Boston dhe takimi me njerëz të tillë. Nuk kisha qëndruar kurrë më parë atje. Mësova mbi kulturën e fshehur të Bostonit, takova njerëz realë që e kanë jetuar fundin e viteve ’80-të dhe veçanërisht mora takim me disa djem nga jugu i Bostonit. Ky vend realisht është shumë interesant, pasi njerëzit dinë me se merren të tjerët. Eshtë si një mikrokozmos i vogël. Unë kisha lexuar disa libra, por që të mishëroja karakterin tim më duhej të takoja personalisht disa nga këta djem, për të hyrë thellësisht në mendjen e tyre”.

Në kërkim të dashurisë së vërtetë

Leo mund të jetë një mashkull i dëshirueshëm nga shumë fanse dhe mund të jetë konsideruar si mashkull tërheqës, por vetë aktori deklaron se është ende në kërkim të dashurisë. Ylli i kinemasë që ka arritur të joshë disa nga femrat më të bukura në botë, ende nuk është nënshtruar dhe pohon se është në kërkim të diçkaje reale. “Unë besoj te dashuria me shikim të parë, por personalisht nuk e kam takuar ende”, ka deklaruar ai për një gazetë britanike. “Nuk kam qenë kurrë një Romeo që takon një vajzë dhe bie në dashuri me të menjëherë. Eshtë një proces më i ngadaltë për mua. Unë gjithmonë startoj me ngadalë”. Pas suksesit të arritur te “Titanic” në vitin 1997, Di Caprio u lidh me modelen Kristen Zang, e më pas me supermodelet Naomi Campbell, Eva Herzigova dhe Helena Christensen. Lidhja e tij trevjeçare, gjithashtu me një modele, brazilianen Gisele Bundchen mori fund vitin e shkuar. Por nga ana tjetër, Leonardos nuk i pëlqen imazhi i playboy-t, që është krijuar për të dhe vazhdon të jetë në kërkim të dashurisë.