Universiteti i Tiranës, 447 vende të lira. Zhvendosja sipas rendit zbritës

Regjistrimet, nesër dita e fundit
Të hënën studentët nisin vitin akademik

Në degët e fakulteteve të Universitetit të Tiranës ka sërish vende të lira, plot 447 kuota bosh. Shumë kandidatë janë çregjistruar nga një degë dhe kanë kaluar në një degë tjetër të preferuar, ku edhe u ka dalë emri për t’u shpallur fitues, ndërsa të tjerë janë regjistruar në degët që deri tani kishin mbetur të papreferuara. Spostimet e listave vazhduan edhe dje në Universitetin e Tiranës, deri në orën 15:00. Regjistrimet do të vazhdojnë deri më 8 tetor, një ditë para se të fillojë viti i ri akademik do të ketë regjistrime. Shpallja e vendeve bosh është bërë menjëherë pas përfundimit të orarit zyrtar. “Për vendet e mbetura bosh, regjistrimet do të vazhdojnë në datat 7 dhe 8 tetor nga ora 09:00 deri 15:00. Për secilën nga këto ditë, në përfundim të orarit të regjistrimeve, fakultetet do të shpallin kuotat e paplotësuara”, thanë burimet nga Ministria e Arsimit. Ky dikaster nëpërmjet zëdhënëses për shtyp uu bën thirrje të gjithë kandidatëve të ndjekin këto ditë me kujdes çdo zhvendosje të listës së të regjistruarve, në mënyrë që të regjistrohen brenda afatit. Regjistrimet kanë vazhduar dy ditë më parë deri në orën 19:00 të pasdites në të gjitha fakultetet, duke respektuar udhëzimin e Ministrisë së Arsimit. Sipas burimeve nga Ministria e Arsimit, gjatë dy ditëve në vazhdim do të ketë raunde të tjera regjistrimesh për kandidatët në universitet sipas rendit zbritës të pikëve, sipas sugjerimit të rektorëve dhe dekanëve të universiteteve.

Regjistrimet tek Mjekësia, radhë në Qytetin Studenti

Zvarritet procesi i regjistrimeve në konviktet e studentëve të Fakultetit të Mjekësisë dhe Inxhinierisë. Mosafishimi i listave për vitet e ndërmjetme në konvikte, është bërë shkak për radhë të gjata pritjesh edhe në krye të një jave regjistrimesh. Studentët ankohen se nuk kanë asnjë informacion në lidhje me godinat ku do të strehohen për këtë vit akademik. Dhjetëra të rinj kanë kryer pagesat në bankë siç parashikon vendimi i drejtorisë së Qendrës së Trajtimit të Studentëve nr.2, ndërkohë që procesi i regjistrimeve nuk ka përfunduar ende. Ndërkohë që mbeten edhe pak ditë nga fillimi i vitit të ri akademik, dhjetëra studentë kanë mbetur të paregjistruar dhe kjo për shkak se drejtoria e hotelerisë nuk ka publikuar ende listat e studentëve dhe godinat përkatëse se ku ata do të strehohen. Një tjetër problem sipas studentëve, ka qenë edhe ndarja e tyre nëpër dhoma, ku ndryshe nga vitet e shkuara, akomodimi është kryer mes të rinjve të viteve të ndryshme dhe të të njëjtit vit, siç ka ndodhur edhe më parë.

Regjistrimet

Dega Kuota 6.10.2006 Kuotat bosh
Histori 117 59 58
Gjeografi 118 102 16
Gjuhë-Letërsi 116 85 31
Anglisht 195 168 27
Biologji-Kimi 116 78 38
Informatikë 66 40 26
Gazetari 88 54 34
Punë Sociale 126 75 51
Fil.-Sociologji 126 114 12
Psikologji 126 84 42
Shkenca Politike 126 64 62
Drejtësi 356 347 9
Mjekësi 226 226 -
Stomatologji 71 71 -
Farmaci 71 69 2
Infermieri 411 398 13
Ekonomiku 1088 1062 26
TOTALI 3543 3096 447