Kryesia e vogël e PD-së shqyrton kandidaturat. Olldashi, më i preferueshmi për garën me Ramën

PD, Olldashi për Bashkinë e Tiranës
Ministri i Brendshëm konsiderohet si kandidatura më e fortë

Sokol Olldashi pritet të jetë kandidati i demokratëve për Bashkinë e Tiranës.

Ministri i Brendshëm i ka të gjitha shanset për t’u “shpallur” kandidat për kryetar bashkie për Tiranën. Kryesia e vogël e demokratëve, e cila përbëhet nga kryetari Sali Berisha, dy nënkryetarët, Bamir Topi dhe Jozefina Topalli, zv.kryeministri, Ilir Rusmali, vetë ministri Sokol Olldashi, Sekretari i Përgjitshëm Bode etj kanë biseduar mbi kandidaturën kryesore për kryeqytetin, që do të dalë përballë kandidatit socialist, ku deri më tani përflitet emri i kryesocialistit, Edi Rama. “Kupola” e demokratëve, sipas burimeve, ka qenë më tepër në favor të kandidaturës së Ollda**** në këtë post, nisur dhe nga puna që ka kryer deri më tani ministri i Brendshëm, si dhe nga fakti se ai është kryetar i degës së PD-së për Tiranën. “Kupola” ka diskutuar edhe mbi disa kandidatura të tjera, përfshirë ministrin e Transportit, Lulëzim Basha. Sipas burimeve, gjatë analizës së fakteve që kanë zhvilluar kokat drejtuese të PD-së është vendosur që me 90 % të mundësive, ministri i Brendshëm është kandidatura kryesore për Bashkinë e Tiranës. Kjo për shkak se demokratët kanë vendosur që të dalin në zgjedhje me një kandidaturë të fortë nga radhët e PD-së. E vetmja rezervë e Berishës në këtë moment është një kandidat nga jashtë radhëve të PD-së, ide që ka pak gjasa të realizohet.

Olldashi
Ndërkohë që, sipas burimeve pranë PD-së, Olldashi, edhe nëse caktohet si kandidat për këtë post, mund të mbajë dhe postin e ministrit të Brendshëm dhe gjatë votimeve. Por ndërkohë atij i duhet të dorëzojë mandatin e deputetit të PD-së, në të cilin ka dalë direkt nga zona e Shijakut. Nëse Olldashi mund t’i humbasë zgjedhjet, do të vazhdojë të jetë përsëri si ministër i Brendshëm. Demokratët kanë tashmë përgatitjet e tyre për përzgjedhjen e kandidaturave, duke diskutuar paraprakisht ndërmjet “forumeve” të vogla partiake, përpara se ata të diskutohen në kryesinë e PD-së. Për Tiranën si kandidaturë më e favorizuar ishte gjatë kohës ministri i Transportit, Lulzim Basha, por ai tashmë nuk është më favorit për këtë sfidë. Ndonëse vetë Olldashi kohë më parë në media është shprehur se nuk kishte ambicie për këtë post, duket se zgjedhjet për këtë çështje kanë vetëm një, nëse “kupola” e lartë e PD-së vendos atë si favoritin kryesor për betejën e madhe të Tiranës. Vetë ministri i Brendshëm e pati cilësuar si kandidaturë të mirë ministrin e Transportit, Basha për bashkinë e kryeqytetit. Demokratët synojnë të rimarrin drejtimin e kësaj bashkie, e cila ka qenë në drejtimin e socialistëve prej më shume se shtatë vitesh. Kësaj radhe demokratët hyjnë në zgjedhje si parti në pushtet. I fundit që ka pasur drejtimin e bashkisë nga demokratët ka qenë Albert Brojka. Për dy mandate radhazi kjo bashki është drejtuar nga ana e Edi Ramës. Gjatë zgjedhjeve vendore të mëparshme të vitit 1998 dhe në 2003 demokratët kanë kandiduar Besnik Mustafajn dhe Spartak Ngjelën.

Precedenti, Rama ishte ministër Kulture në 2001
Ministrat nuk i pengon Kushtetuta

Kushtetuta e Republikës së Shqipërisë nuk i pengon ministrat e qeverisë që të kandidojnë në zgjedhjet lokale, duke ushtruar njëkohësisht dhe postin qeveritar. Ministrit, nëse është deputet, i duhet të dorëzojë mandatin e deputetit, por si ministër ai mund të vazhdojë të qëndrojë në detyrë ekzekutive. Ndërkohë që Shqipëria ka njohur një precedent të tillë kohë më parë, kur një ministër qeverie ka kandiduar për kryetar bashkie, duke mbajtur njëkohësisht dhe detyrën në qeveri. Një gjë e tillë ndodhi në vitin 2001, kur ministri i Kulturës i asaj kohe, Edi Rama, kandidoi nën siglën e PS-së për postin e kryetarit të Bashkisë së Tiranës. Por Partia Demokratike, në atë kohë në opozitë, protestonte për një fakt të tillë, për shkak se nuk mundej që një ministër të kandidonte njëkohësisht për zgjedhjet e pushtetit vendor, pasi kjo do sillte një ndikim të qeverisë në këto votime.

Deklarata
Topi: Basha, jo për Tiranën

Kryetari i grupit parlamentar të PD-së, njëkohësisht dhe nënkryetar i kësaj partie, Bamir Topi, ka qenë i pari nga zyrtarët e lartë të PD-së, që ka kundërshtuar emrin e ministrit të Transportit, Lulzim Basha, si kandidat për Bashkinë e Tiranës. Sipas tij, për Tiranën PD-ja duhet të ketë dalë me një kandidaturë të fortë politike, me eksperiencë, si dhe që ka aftësi administrative. Topi ka hedhur poshtë mundësinë e daljes në këto votime me një kandidaturë nga shoqëria civile. Demokratët, sipas tij i kanë të gjitha shanset që të rimarrin drejtimin e pushtetit vendor në Tiranë.

• Presidenti: Data e zgjedhjeve, më 15 nëntor
  Presidenti i Republikës, Alfred Moisiu, gjatë vizitës së tij në Korçë ka bërë të ditur për gazetarët se do të vendosë më 15 nëntor për datën e zgjedhjeve të ardhshme vendore. “Deri në 15 nëntor, kur parashikohet dekretimi i datës së zgjedhjeve, ka ende kohë”, deklaroi kreu i shtetit për median.
  
• Gjinushi: Nuk ka lojë me një skuadër
  Kryetari i PSD-së, Skënder Gjinushi, u shpreh dje se presidenti nuk mund të deklarojë datë zgjedhjesh pa u garantuar standardet. “Deklarimi i datës nga Berisha është vetëm presion ndaj presidentit”, tha Gjinushi, duke shtuar se loja nuk mund të bëhet vetëm me një skuadër. Gjinushi deklaroi se opozita nuk do të marrë pjesë në zgjedhje, ku nuk garantohet një proces i lirë dhe i ndershëm.
  
• Vasili: PD do të manipulojë zgjedhjet
  “Maxhoranca do të zhvillojë zgjedhje tërësisht të manipuluara dhe të vjedhura”. Kështu është shprehur dje sekretari i Përgjithshëm i LSI-së, Petrit Vasili. “LSI, duke vlerësuar kritike situatën e krijuar dhe rrezikimin e plotë të mbajtjes së zgjedhjeve të ardhshme vendore kërkon zhbllokimin e menjëhershëm të komisionit të Reformës Zgjedhore, të mbajtur peng nga maxhoranca”, tha Vasili.