6,tetor,2006

Mesfushori i kombëtares italiane ka thënë se suksesi i "axurrëve" në botëror është harruar shumë shpejt     06-10-2006


"Ne jemi ata që kanë fituar botërorin." Kanë qenë këto fjalët e Rino Gatuzos. Mesfushori "axurr" është paraqitur i karikuar, si zakonisht, dhe thuajse e ka ngritur peshë një mjedis të tërë, i cili duket se është shtypur nga pesha e polemikave që e rrethojnë. Ukraina është një etapë thelbësore për kualifikimin në Euro 2008 dhe Gatuzo e di mirë. Renditja është shqetësuese dhe i vë në vështirësi "axurrët", një situatë që i detyron të luftojnë, ta nxjerrin në pah grintën dhe krenarinë, sikurse nënvizon vetë Gatuzo. Ndaj Ukrainës, të shtunën në Romë, janë në lojë shpresat "axurre" të kualifikimit në Euro 2008 dhe mesfushori i Milanit është i ndërgjegjshëm se nuk mund të gabohet. "Na presin dy sfida kyçe, por ne duam vetëm të tregojmë se jemi ata që kanë fituar kampionatin botëror. Renditja është e frikshme, kështu që do të jetë e vështirë. Por mund t'i fitojmë të dyja ndeshjet. I kemi mundësitë për të bërë kthesë dhe jemi të vetëdijshëm se mund të paraqitemi mirë."
Fakti që do të përballen me ukrainasit, të cilët i mundën në çerekfinalet e botërorit në Gjermani, mund të jetë një avantazh për djemtë e Donadonit, edhe pse "Ringio" u druhet dhuntive teknike të Shevçenkos me shokë, të cilët ndërthurin cilësinë me dhuntitë e mira fizike. Në Gjermani, "axurrët" e patën të lehtë të fitonin dhe vazhduan rrugën e tyre drejt triumfit, dhe Gatuzo u ndal pikërisht te fitorja e Berlinit: "Ajo që më ka goditur, është se fitimi i botërorit është harruar. Në futboll rëndësi kanë vetëm tri pikët, nuk ka rëndësi loja e bukur. Pas ndeshjes ndaj Lituanisë, të gjithë na kritikuan, por në të vërtetë luajtëm mirë. Nuk është e vërtetë se fitohet gjithnjë ndaj skuadrave të vogla. Ndryshe nga një muaj më parë, tani jemi në formë dhe duhet të fitojmë. Donadoni po na përgatit që të luftojmë 90 minuta në fushë." Ishte i pashmangshëm një koment për trajnerin e ri "axurr", i cili ka mbi shpinë trashëgiminë e madhe të Marçelo Lipit: "Skuadra ka besim tek ai, përfshi edhe mua. Me Lipin mbeten marrëdhëniet shumë të mira, por me të është kënaqësi të takohem jashtë fushave të futbollit, pasi t'i kem hequr veshjet e futbollistit." Së fundi, diçka edhe lidhur me fanellën nr.10, të cilën nuk dihet se kush do ta veshë tani që nuk është Toti: "Mendoj se për Françeskon po bëhen shumë polemika të kota. Ai nuk është mirë fizikisht, nuk ka asnjë problem me trajnerin dhe nuk besoj se është i gëzuar që nuk po vjen. Edhe për fanellën nr.10 po bëhet një polemikë absurde. Po të ma jepnin mua, do të ishte një fyerje për futbollin: e kam veshur vetëm një herë në Gllasgou, por ndoshta atë ditë trajneri kishte pirë më shumë birra se ç'duhej."

                                                        Pergatiti: Arbi:  Arbi_1999@hotmail.com