6,Tetor, 2006

Me kërkesë të Prokurorisë, togat e zeza kanë caktuar masën e sigurisë ndaj ish-kreut të Aviacionit Civil

Gjykata, Dibra të mos dalë jashtë vendit

Vendimi i djeshëm detyron edhe pezullimin nga detyra

Ish-drejtori i Aviacionit Civil, Gazmend Dibra ndalohet të dalë jashtë kufijve të vendit deri në përfundimin e plotë të hetimeve të nisura ndaj tij. Ky ka qenë vendimi i Gjykatës së Tiranës, i cilësuar si masë sigurie ndaj Dibrës, i cili tashmë është i pandehur për dosjen "Albatros". Burime të Gazetës janë shprehur se vendimi i gjykatës ka ardhur pas kërkesës së bërë nga prokuroria. Sipas këtij vendimi, Gazmend Dibra nuk ka të drejtë të dalë jashtë kufijve të vendit deri në përfundimin e plotë të hetimeve të nisura ndaj tij. Kjo do të thotë që pasaporta e Dibrës duhet të qëndrojë e bllokuar. Për zbatimin e këtij vendimi ngarkohen strukturat e policisë kufitare, të cilat tashmë emrin e Dibrës e kanë të shënuar si person që nuk mund dalë jashtë shtetit. Në të njëjtin vendim, Gjykata ka përcaktuar edhe pezullimin e Dibrës nga detyra, edhe pse ky veprim u bë në mënyrë të vullnetshme nga vetë Dibra një ditë pas marrjes së tij si person i pandehur. Ende nuk dihet nëse këto masa shtrënguese ndaj Dibrës janë marrë në bazë të ndonjë informacioni konkret, apo thjesht janë masa alternative sigurie të parashikuara nga ligji. Vendimi i Gjykatës së Tiranës për masat e sigurisë ndaj Dibrës duket se janë marrë në fshehtësi dhe nuk dihet nëse vetë ai ka qenë i pranishëm gjatë seancës gjyqësore apo është përfaqësuar nga avokati mbrojtës.
Akuzat
Prokuroria e Tiranës rreth nëntë ditë më parë i ka komunikuar zyrtarisht Gazmend Dibrës akuzat e shpërdorimit të detyrës dhe korrupsionit pasiv. Ngritja zyrtare e akuzave ka ardhur rreth dy javë pasi prokuroria nisi kryesisht hetimet, pas publikimit të bisedës së përgjuar mes tij dhe drejtuesve të shoqërisë ajrore "Albatros". Gjatë bisedës ka momente ku ngrihen dyshime të forta, sipas të cilave, Dibra në cilësinë e Drejtorit të Aviacionit Civil ka pezulluar aktivitetin e shoqërisë Albatros, në mënyrë që pronarët e saj, që janë edhe nipat e Presidentit Alfred Mosiut, të ndikonin te kreu u shtetit që të firmoste sa më parë shkarkimin e kryeprokurorit Theodhori Sollaku. Pikërisht për këto dyshime, Dibrës i është komunikuar akuza e korrupsionit pasiv. Ndërsa akuza tjetër, ajo e shpërdorimit të detyrës ka të bëjë me procedurat e pezullimit të aktivitetit të shoqërisë ajrore "Albatros". Verifikimet e kryera nga organi i akuzës kanë konstatuar se Drejtoria e Aviacionit Civil nuk mund të pezullojë aktivitetin e një shoqërie ajrore për shkak të borxheve që ajo i ka subjekteve me të cilat ka lidhur kontratë.

                    Pergatiti: Arbi: Arbi_1999@hotmail.com