6,tetor,2006

Ilir Kurti, kryeinspektori i ISHKNG-së: Këtë javë kontrolli do të shtrihet në të gjithë qarkun e Tiranës  

Bllokohen 5 karburante në Tiranë

Shkak, cilësia e ulët e karburanteve dhe dokumentacioni

Pikat e karburanteve në vend nuk janë të pajisura me dokumentacionin e duhur për të ushtruar aktivitetin e tyre. Përveç kësaj, shumë prej tyre mashtrojnë qytetarët për cilësinë e naftës që ato tregtojnë. Inspektorati Shtetëror i Kontrollit të Naftës dhe Gazit (ISHKNG) ka bllokuar dje 5 pika karburantesh, pasi nuk ishin të pajisura me dokumentacionin e duhur. Kontrolli mbi pikat e karburanteve do të vazhdojë në ditët në vijim për të gjithë qarkun e Tiranës.
“Ka filluar bllokimi i aktivitetit të jashtëligjshëm në fushën e tregtimit të karburanteve. Vetëm dje janë bllokuar 5 pika tregtimi karburantesh”, - pohon për “Gazeta Shqiptare” Ilir Kurti, kryeinspektori i ISHKNG-së. Sipas tij, të gjitha pikat e tregtimit që kanë mungesë dokumentacioni do të bllokohen, deri sa të përmbushin të gjitha kriteret e përcaktuara në ligj.
Cilësia
Ndërsa në pikat që konstatohen se ka shkelje të cilësisë së naftës, ndaj tyre do të merret masa e gjobës, e cila varion nga 300 mijë lekë në 500 mijë lekë. Gjatë një kontrolli të ushtruar nga ISHKNG-ja në qytetin e Fierit, ka rezultuar se shumë pika tregtimi kanë abuzuar me cilësinë e naftës. “10 pika karburantesh në qytetin e Fierit janë gjobitur me 300 mijë lekë, pasi kishin abuzuar me cilësinë e karburanteve që tregtonin”, - tha Kurti.
Po të hedhim një vështrim prapa, nuk është hera e parë që shoqëritë e tregtimit të karburanteve abuzojnë me cilësinë e naftës që ato tregtojnë. Edhe rreth një vit më parë kur çmimi i naftës pësoi rritje, ISKSHG-ja ushtroi kontroll në disa pika karburanti në Tiranë, nga të cilat 6 rezultuan që naftën “D2” e tregtonin si naftë të cilësisë “D1”. Nafta “Eurodiesel” ose në gjuhën teknike “D1” apo “EN 511”, që është naftë e cilësisë më të lartë, shpeshherë në pikat e karburanteve tregtohet për naftës “D2”.
Çmimi
Çmimi i arit të zi në bursat po shkon drejt rënies. Sipas mediave të huaja, një fuçi në bursat ndërkombëtare është kuotuar me 58 dollarë, nivel ky më i ulëti në këto muaj. Në më pak se dy muaj çmimi i naftës është ulur me 25 për qind. Vetëm në këto dy javët e fundit çmimi i arit të zi në bursat ndërkombëtare ka rënë me 4 dollarë për fuçi. Pavarësisht uljes së çmimit të karburanteve në tregjet ndërkombëtare, tregu ynë nuk ka pasur ndonjë reagim të ndjeshëm. Sipas konjuturës së tregut vendas, niveli i kuotimit të karburanteve në bursat ndërkombëtare duhet të reflektohet edhe në tregun vendas. Kjo, pasi mbi 80 për qind e karburanteve që tregtohet në vend importohet nga jashtë. Prodhimi vendas aktualisht përballon vetëm 10 për qind të kërkesës. Duke pasur parasysh konjukturën e tregut vendas, kur çmimi i naftës në bursa ulet, kjo rënie duhet të reflektohet edhe treg. Por ende nuk po shikohet një ndikim i tillë. Pikat e tregtimit të karburanteve brenda qytetit të Tiranës nuk i kanë ulur çmimet e karburanteve. Kështu, benzina tregtohet me 140 lek/litër, nafta D1 130 lek/litri dhe D2 me 120 lek/litri. Një ulje e lehtë çmimi vihet re vetëm në pikat e karburanteve jashtë qytetit të Tiranës, ku çmimi i benzinës është 130 lek/litri, D1 është 125 lek/litri dhe D2 me 115 lek/litri.

Të dhëna

• 58 USD për fuçi, çmimi i naftës në bursa
  
• 140 lek / litër çmimi i benzinës
  
• 130 lek / litër çmimi i naftës D1
  
• 120 lek / litër çmimi i naftës D2

                Pergatiti Arbi: Arbi_1999@hotmail.com