6,tetor,2006

TIRANE / Vjedhjet e bizhuterive bëheshin me dhunë
Zbulohet banda e grabitjeve, arrestohen katër anëtarë

TIRANE – Arrestohen nga policia e kryeqytetit dy autorët e vjedhjes me dhunë të bizhuterive, të dyshuar si pjesëtarë të një grupi të dhunshëm grabitësish. Efektivat e komisariatit nr.2 të policisë së Tiranës kanë prangosur të dyshuarit Erjon Cërriku, 21 vjeç dhe Ervin Aliko, 21 vjeç, të dy banues në Kombinat. Arrestimi i këtyre dy personave, sipas burimeve zyrtare të policisë së kryeqytetit është bërë pasi ata dyshohet se në bashkëpunim me njëri-tjetrin rreth orës 22:15 të datës 2 tetor 2006, kanë vjedhur me armë bizhuteritë e një gruaje. Nga hetimet mësohet se ngjarja ka ndodhur në rrugën “Margarita Tutulani” dhe personi i dëmtuar nga grabitja e dhunshme është Liljana Andonanji, banuese në Tiranë. Grabitësit i kanë marrë asaj një varëse floriri, duke vënë në përdorim forcën dhe keqtrajtimet fizike. Policia filloi hetimet menjëherë pas kallëzimit të personit të dëmtuar, duke arritur të arrestojë të dyshuarit për ngjarjen. Gjatë arrestimit të të dy personave, policia u ka gjetur atyre edhe një motor, me të cilin largoheshin nga vendi i ngjarjes, pasi kryenin grabitjet me forcë. Nga hetimi mbi aktivitetin kriminal të personave të arrestuar, policia tha se ka zbuluar implikimin e Ervin Alikos në vjedhjen e argjendarisë «Lika», të ndodhur disa muaj me parë në Kombinat. Burimet policore thanë se i dyshuari Arvin Aliko e ka realizuar vjedhjen e argjendarisë në bashkëpunim me vëllanë e tij, Dorjan Aliko. Ky i fundit është arrestuar pothuajse në të njëjtën kohë me vëllanë e tij. Policia tha se Dorjan Aliko, 20 vjeç është kapur bashkë me të dyshuarit Elis Mata, 23 vjeç dhe Jeton Abazi, 21 vjeç, në bashkëpunim me Ervin Alikon kanë vjedhur në mënyrë të përsëritur argjendarinë që ndodhet në rrugën “Haki Stërmilli” në Tiranë. Nga këto grabitje të dhunshme policia tha se pronarit të argjendarisë i është shkaktuar një dëm prej 2 milionë lekësh të reja. Dy vjedhjet e kësaj argjendarie, sipas policisë, kanë ndodhur përkatësisht në datat 26 nëntor 2005 si dhe 17 mars 2006.

                                 Pergatiti Arbi Hoxha:   Arbi_1999@hotmail.com