Angazhimi për të zbardhur krimet e rënda dhe identifikimi i autorëve të tyre e kanë bërë pesimist vëllanë e Zyhdi Myderrizit nga Konispoli.

Fiqiriu, prej 17 muajsh kërkon zbulimin e vrasjes së të vëllait, i cili u gjet i masakruar, me trup të ndarë nga koka, por deri sot nuk dihet zyrtarisht se kush e ka kryer krimin. “Ashtu si u zbulua masakra e Zall Herrit, të zbulohet edhe masakra e Konispolit. Shteti shqiptar vuri një shpërblim prej 50 mijë eurosh për informatorin, madje nuk nguroi të thërriste edhe ekspertë të FBI-së. Por një masakër e ngjashme, madje edhe më e lehtë për t’u zbuluar, se njihet viktima, duket se është lënë në harresë nga organet e kriminalistikës dhe prokurorisë”, thotë ai. Bëhet fjalën për masakrën te “Burimi i Vasilikoit”, ndodhur më 12 tetor të vitit 2005 në Konispolin e largët, ku 45-vjeçarin Zihni Myderrizi, e kanë masakruar me mjete të mprehta. Ka qenë një nga vrasjet më të bujshme që ka tronditur gjithë opinionin publik, jo vetëm vendas, por edhe atë të huaj, të informuar nga media. E vetmja ndihmë që iu ofrua në këtë kohë policisë së Sarandës ishin disa efektiva të ardhur nga Drejtoria e Policisë së Vlorës, por asgjë nuk u zbulua. “Asnjë shpërblim për informatorin, madje asnjë publikim nga ana e Ministrisë së Brendshme në faqen e internetit, ashtu sikundër u bë për identikitin e kufomës së Zall-Herrit”, pohon Fiqiri Myderrizi. Policia e kishte edhe më të lehtë të zbulonte autorin, pasi kufoma njihej se kujt i përkiste, madje shumë bashkëfshatarë ndoshta e njohin autorin por heshtin, ndërsa familjarët bëjnë thirrje se pas vrasjes së tij, fshihet linja e trafikut të drogës Shqipëri-Greqi. “Më vjen keq nga ky shtet kur për një vajzë adoleshente, ngjarjen e Zall-Herrit, u hodhën 50 mijë euro për atë që jep informacion për autorin dhe për këtë unë nuk jam kundra. Por të gjenden autorët e çdo krimi që bëhet, ndërsa për vëllanë tim, që i prenë kokën, nuk shqetësohet kush qoftë nga shteti, por edhe nga organet e specializuara për të gjetur autorin”, shprehet vëllai i viktimës. Ai është interesuar prej 1 viti e gjysmë per hetimet që po kryhen, por ndonëse i është thënë se po punohet shumë, sipas tij nuk ka asgjë konkrete. “Krimi ndodhi në 10 të paradites dhe shumë persona janë dëshmitarë, megjithatë, Prokuroria nuk ka fajësuar askënd. Kam 1 vit e gjysmë që unë nuk jam thirrur nga askush, vetëm se kam trokitur vetë në dyert e policisë. Kam shkuar edhe te Krimet e Rënda në Tiranë, më kanë thënë se nga data 15 shtator do të vinin në Sarandë, por edhe sot e kësaj dite nuk po duken. Në polici më thonë fjalë të mira por konkretisht kam gur në trastë. Ndërsa në Prokurori kam hyrë e kam dalë por kot, asgjë konkrete nuk kam marrë prej tyre”. Fiqiri Myderrizi tregon sërish se ai dyshon për ngjarjen te dy grupe, të cilët mund ta kenë ekzekutuar vëllanë e tij pasi ka qenë dëshmitar i një skene që nuk u ka interesuar autorëve. Banorët e Konispolit thonë, se ky nuk është rasti i vetëm i vrasjeve makabre në këtë zonë. Në fillim të viteve ‘90, një të moshuari në malet e Konispolit, pasi u vra iu nxorrën sytë, ndërsa në vitin 1998, polici Vladimir Bejdo, u gjet i masakruar në një pus të fshatit. Të trija këto ngjarje mbeten ende të pazbuluara.