Berisha për Ramën: Bashkëpunim me klanet e drogës

 

Rrëmbimi, Moisiu mbledh krerët e sigurisë

Rusmali, merr lajmin në kokteilin e ambasadës

Presidenti thirri mbrëmë në një takim të veçantë, krerët e lartë të administratës së shtetit, që janë përgjegjës për çështjen e sigurisë në vend.
Menjëherë pas kësaj ngjarjeje, në zyrën e presidentit zbriti Bahri Shaqiri, kreu i SHISH-it, Bajram Ibraj, Drejtor i Përgjithshëm i Policisë dhe drejtues të tjerë të shtetit. Reagimi i kreut të shtetit erdhi në mënyrë të rrufeshme, kur kryeministri i vendit nuk ndodhej në Shqipëri, por në Strasburg dhe kur zv.kryeministri gjendej së bashku me zyrtarë të tjerë të lartë në Ambasadën Gjermane në një kokteil për festën kombëtare.
Burimet nga Presidenca bënë të ditur se Moisiu ka ndjekur me vëmendje të gjithë situatën e mbrëmshme, sapo është njoftuar për situatën e publikuar edhe në mediat shqiptare e të huaja. Fillimisht, Moisiu ka pritur një e nga një personalitetet që përgjigjen për sigurinë, ndërsa ka pritur deri në orët e vona të mbrëmjes që ata të ktheheshin nga aeroporti i Rinasit, prej nga ishte nisur edhe avioni që u mor peng.
Qeveria
Ministrat e qeverisë “Berisha”, dhe vetë zv.kryeministri Ilir Rusmali që për një ditë të tërë kishte marrë në dorë kompetencat ekzekutive për shkak të mungesës së kreut të qeverisë, kanë qenë në ceremoninë e organizuar në Ambasadën gjermane me rastin e festës kombëtare të Gjermanisë, ndërsa janë njoftuar kur kanë qenë aty në lidhje me ngjarjen e ndodhur. Sipas të pranishmëve në ceremoni, prezent ishte ministri i Jashtëm Besnik Mustafaj i shoqëruar nga bashkëshortja si dhe zv.Kryeministri Rusmali, i cili mësohet se është larguar rreth orës 19:00 nga ceremonia, ndërsa ministri i Drejtësisë, Aldo Bumçi ka mbërritur në ceremoni rreth kësaj ore. I pari që është larguar pas njoftimit ka qenë sekretari i përgjithshëm i misionit të Bashkimit Evropian në Tiranë, Karlo Natale. Burimet bëjnë të ditur se kreu i PS-së Edi Rama nuk ka shkuar në ceremoni, pasi ka qenë i zënë duke komunikuar me deputetin e partisë së tij, Sadri Abazi, që ndodhej në avion. Në lidhje me ngjarjen u ngrit menjëherë një komision ndërministral, i kryesuar nga zv. Kryeministri Ilir Rusmajli. Ndërkohë, Kryeministri Berisha ndodhet në Strasburg, por sipas burimeve nga Kryeministria, ka qenë gjatë gjithë kohës i informuar për gjithçka ka ndodhur me avionin e rrëmbyer.