4,tetor,2006

Qëlloi mbi të miturit kur ishte në shërbim
Vrasja, Prokuroria: Të dënohet me 25 vjet burg ushtari vrasës

TIRANE - Prokuroria i kërkoi gjykatës dënimin me 25-vjet burg për 20-vjeçarin Naim Avdia, ish-ushtarin i Xhenios, i cili ekzekutoi një vit me parë 16-vjeçarin Afrim Versula dhe plagosi shokun e tij Dashamir Gjoni. Në seancën e djeshme prokurori i çështjes, Blerim Tominaj, ka paraqitur në gjykatë konkluzionet përfundimtare të gjykimit, ku i ka kërkuar gjykatës shpalljen fajtor të 20-vjeçarit dhe dënimin me 25 vite burg. Sipas prokurorit, shkak për ngjarjen ka shërbyer vetëm një debat i rëndomtë midis viktimave dhe të pandehurit, i cili ka bërë që ky i fundit të zbrazë të gjithë karikatorin e automatikut të shërbimit mbi trupin e 16-vjeçarit, Afrim Versula, që mbeti i vrarë, ndërsa u plagos rëndë shoku i tij Dashamir Gjoni. Por megjithëse nga ana e 20-vjeçarit është pranuar autorësia e vrasjes, avokati i tij mbrojtës i ka kërkuar gjykatës gjatë seancave kryerjen e një ekspertimi psikik ndaj Avdisë, duke pretenduar se ky i fundit vuan nga çrregullime psikike. Sipas mbrojtësit ligjor të 20-vjeçarit, kjo ka qenë edhe arsyeja që klienti i tij ka reaguar në mënyrë ekstreme ndaj një debati të zhvilluar midis tij dhe viktimave. Por rezultatet e ekspertizës kanë nxjerrë se 20-vjeçari Avdia është normal dhe i ndërgjegjshëm për veprimet e kryera. Ndërkohë që në seancën e radhës pritet që mbrojtja të paraqesë pretendimet e saj në lidhje me akuzën. Ngjarja e rëndë, ku protagonist ishte 20-vjeçari kavajas, ka ndodhur në maj të vitit të kaluar në vendin e quajtur “Kafja e Rremës”, ku ndodhet edhe reparti ushtarak i brigadës së Xhenios. Ushtari Avdia, 20-vjeç, duke qenë në orar shërbimi në kullën e vendrojës, pas një grindjeje me disa adoleshentë që ndodheshin përballë tij, jashtë zonës ushtarake, ka hapur zjarr, duke vrarë Afrim Versulën 16 vjeç dhe plagosur Dashamir Gjonin, 18-vjeç.

                                         Pergatiti: Arbi Hoxha: Arbi_1999@hotmail.com