4,tetor,2006
U dorëzua 2005, policia e liroi se duhej denoncim

Në pranga minorenit që vrau në Greqi

Kishte vrarë në Greqi dhe ishte dorëzuar në policinë shqiptare që një vit më parë, por për shkak të provave të pamjaftueshme ajo e kishte lënë të lirë. Por 17-vjeçari Erid Hoxha është prangosur sërish së fundi nga organet e policisë, pas të dhënave që kanë mbërritur nga Greqia. Policia zbatoi një vendim të Gjykatës së Faktit në Durrës, sipas të cilit ndaj 17-vjeçarit Erid Hoxha është vendosur masa e sigurisë arrest me burg pa afat për veprën penale të vrasjes me paramendim dhe të armëmbajtjes pa leje. Kjo është një histori e cila ndodhi me datën 19 gusht të vitit që shkoi, në qytetin e Janinës në Greqi. Në këtë qytet Erid Hoxha, lindur në Vlorë e banues në qytetin e Durrësit, ishte vendosur së bashku me familjen e tij disa vjet më parë. Mbrëmjen e 18 gushtit 2005 ai ka qenë i ftuar në banesën e 35-vjeçarit Marinos Manjati, i cili ishte oficer në pension. Atë natë Hoxha e ka vrarë grekun me një thikë dhe më pas është larguar nga banesa. Djali i ri e ka mbajtur frymën në Shqipëri dhe ka shkuar te gjyshja e tij në Vlorë. Pas disa ditësh ai është paraqitur në policinë e Durrësit dhe është dorëzuar, duke u vetë denoncuar si autor i vrasjes në Janinë. Policia dhe Prokuroria vitin që shkoi vendosën që të mos e arrestojnë atë, përderisa në duart e tyre nuk kishte asnjë dokument zyrtar nga pala greke. Gjatë kësaj kohe organi i Prokurorisë së Durrësit me anë të një letër porosie, i kërkoi homologëve të tij grekë dokumentet për këtë vrasje. Para disa kohëve pala greke solli në Durrës të plotë dosjen hetimore për këtë vrasje. Atë natë djali vlonjat i kishte ngulur grekut 40 thika në trup. Në hetuesi ai ka deklaruar se kjo vrasje ngjau pasi greku kishte nisur përdhunimin ndaj tij. Vetëdorëzimi në polici, deklarata e tij si dhe skeda greke për viktimën, janë në ndihmë të djalit të ri.

                                                Pergatiti: Arbi Hoxha: Arbi_1999@hotmail.com