4,tetor,2006

“Përgjegjësia për gabimin në certifikatë, bie mbi punonjësen e Gjendjes Civile dhe jo mbi arsisten”

"Inis Gjoni po sulmohet prej kohësh"

Avokati Terpo: Klientja ime nuk ka falsifikuar asnjë dokument

TIRANE

Inis Gjoni, sërish probleme me Drejtësinë. Por këtë herë, duket se balerina dhe këngëtarja e mirënjohur nuk do të jetë e dëmtuara, ashtu sikurse në rastin kur u publikua videoja intime e saj, por personi që do të hetohet "për falsifikim dokumentesh" dhe "falsifikim të akteve të Gjendjes Civile". Por faktin e falsifikimit të certifikatës personale, për të përfituar një pasaportë të dytë me të dhëna të rreme, ashtu sikurse ka bërë të ditur policia, e ka hedhur poshtë avokati mbrojtës i regjisores, Genci Terpo. Ai u shpreh për "Gazeta Shqiptare", se Inis Gjoni nuk ka bërë asnjë falsifikim dokumenti dhe ndaj saj nuk ka nisur asnjë procedim penal. "Si çdo qytetar tjetër, ajo vajti për të aplikuar për pasaportë. Por në momentin që po plotësonte formularin, Inisi ka vënë re se të dhënat në certifikatën që vetëm pak orë më parë e kishte marrë në Gjendjen Civile, nuk korrespondonin me ato të sajat. Për këtë fakt ka vënë në dijeni punonjësin e policisë dhe është larguar për t'u pajisur me një certifikatë të rregullt", - sqaroi Terpo. Sipas avokatit, në këtë rast kur një punonjëse e Gjendjes Civile bën një gabim apo lapsus nga shpejtësia, teksa plotëson të dhënat e certifikatës, atëherë përgjegjësia duhet të bjerë mbi të dhe jo mbi personin që është pajisur me certifikatë. "Inis Gjoni nuk kishte asnjë interes që të pajisej me një pasaportë me të dhëna të rreme, pasi nuk do të mund të udhëtonte më jashtë shtetit", - tha Terpo, duke saktësuar se ajo ka dokumente greke e të tjera viza në pasaportë. Përfaqësuesi ligjor i këngëtares dhe balerinës, e cila prej shumë kohësh ka qenë në qendër të skandaleve të shtypit dhe problemeve me Drejtësinë, u shpreh se klientja e tij po sulmohet të paktën që prej një viti. "Inis Gjoni u akuzua dhe si bashkëpunëtore e rrjetit të drogës "Kompas", megjithëse nuk kishte asnjë lidhje me të. Ajo ishte në momentin e gabuar", - deklaroi më tej ai. Një tjetër moment që ka tensionuar së tepërmi regjisoren e mirënjohur, ka qenë dhe publikimi i videos së saj intime, gjë për të cilën ajo akuzon Prokurorinë e Krimeve të Rënda. Edhe pse Prokuroria e Tiranës ka bërë të ditur se hetimet për këtë çështje janë mbyllur, një fakt të tillë e hedh poshtë avokati Terpo, i cili theksoi se në momentin që organi i akuzës pushon një çështje, duhet të vërë në dijeni palën e dëmtuar, gjë që s'e ka bërë ende. Nga ana tjetër, Gjoni ka paditur në gjykatë, organin e akuzës së Krimeve të Rënda, si institucioni që publikoi videon, duke kërkuar një dëmshpërblim prej 500 mijë dollarë. "E di që gjykatat shqiptare s'do të japin një vendim në favorin tonë, por çështja do të shkojë deri në Strasburg. Tek kjo gjykatë do të gjendet dhe e drejta", - theksoi mbrojtësi. Më tej ai u ndal sërish tek ngjarja më e fundit, ku Gjoni akuzohet se ka falsifikuar certifikatën, për të nxjerrë një pasaportë të re për jashtë shtetit, edhe pse të mëparshmes nuk i kishte skaduar ende afati.
Bëhet fjalë për rreth një muaj më parë, kur Inis Gjoni është paraqitur në Komisariatin numër 2 të Policisë së Tiranës, pranë kryqëzimit të 21 Dhjetorit, për t'u pajisur me pasaportë, por me të dhëna të tjera, ku mosha e këngëtares ishte ulur një vit. Sipas policisë, dyshohet se ajo ka bashkëpunuar me punonjësen e Gjendjes Civile të njësisë bashkiake Nr.7, Tatjana Male, për të bërë të mundur falsifikimin e certifikatës.

                                       Pergatiti: Arbi Hoxha : Arbi_1999@hotmail.com