4,tetor,2006
Socialistët insistojnë që të ngrihet komisioni për hetimin e pasurisë së Kryeministrit

PS: U vërtetuan shifrat tona për pasurinë e Berishës

 

 

Partia Socialiste ka qenë “e kënaqur” dje, që vajza e Kryeministrit Berisha ka vërtetuar shifrat e bëra publike nga kjo parti për pasurinë e saj. Zëdhënësi Saimir Tahiri u shpreh se “shqiptarët panë e dëgjuan se PS-ja ka thënë të vërtetën dhe vetëm të vërtetën në lidhje me pasurinë e familjes Berisha, e cila sipas vetë Zonjës Berisha, është plot 1 milion e 51 mijë dollarë”. Sipas Tahirit, vajza e Kryeministrit Berisha “pranoi çka PS-ja ka thënë me kohë; faktin se pasuria e familjes Berisha është mbi 1 milion e 51 mijë dollarë. E vetmja e re që morëm vesh dje, është se ministri Lulzim Basha paska qenë një pjesëtar aktiv i lëvizjes demokratike të viteve ’90". Zëdhënësi ka sqaruar më tej se PS-ja do të këmbëngulë për ngritjen e komisionit hetimor për pasurinë e familjes Berisha. Sipas tij, kjo parti disponon të tjera fakte dhe dokumente që kërkojnë verifikim të detajuar në lidhje me pasurinë e Kryeministrit dhe të familjes së tij. “Ritheksojmë se këtë hetim nuk mund ta bëjë kurrsesi Z. Nishani apo kushdo tjetër nga ushtarët e Z. Berisha”, - tha zëdhënësi i PS-së. Socialistët janë të bindur se këtë hetim duhet ta bëjë vetëm opozita, në bazë të së drejtës që i garanton Kushtetuta e vendit. “Partia Socialiste nuk do të tolerojë shmangien e paprecedent të Kryeministrit Berisha nga hetimi parlamentar i opozitës, sikurse nuk do të tolerojë asnjë shkelje të ligjit dhe Kushtetutës që synon fshehjen e të vërtetave të hidhura në lidhje me Z. Berisha dhe bashkëpunëtorët e tij”, - thuhet në deklaratën e zëdhënësit të PS-së. Gjatë muajit të kaluar, PS-ja ka denoncuar faktin se si familja e Kryeministrit dhe veçanërisht vajza e tij ka arritur të vërë gjithë këtë pasuri, që e thënë në shifra sipas PS-së rezultonte që përveç shtëpive dhe trojeve, të kishte edhe një depozitë parash kesh rreth 800 mijë euro. Megjithatë, këto ishin deklaruar nga vajza e Kryeministrit në deklaratën zyrtare të pasurisë pranë Inspektoratit të Deklarimit dhe Kontrollit të Pasurive. Po kështu, me skema të ndryshme, PS-ja ka denoncuar edhe emërime nepotike të Kryeministrit Berisha në administratën publike. Prandaj, edhe nisur nga këto fakte, deputetët e partisë më të madhe të opozitës po kërkojnë që prej ditësh një hetim të veçantë për Kryeministrin Berisha.

          

                                                              Pergatiti: Arbi Hoxha: Arbi_1999@hotmail.com