Është e dashuruar, por për fat të keq “bukuroshi” nuk di asgjë për ndjenjat e saj. Hygerta Sako po përjeton vuajtjet e ëmbla të një dashurie dhe është gati të braktisë gjithçka për djalin që po i robëron ndjenjat. Për momentin është jetime kjo dashuri pasi edhe AI,(personi me të cilin është dashuruar ) ende nuk e di që është i zgjedhuri i saj i zemrës. E dashuron, aq sa për revistën “Spektër” thotë se braktis gjithçka për të, por që tani ka vendosur të presë. Ashtu si ato vajzat lozonjare, Hygerta nuk ka ndërmend t’ia thotë vetë e para dashurinë e saj megjithëse kjo është një vuajtje e vërtetë për bukuroshen. “Vuaj por dua të lë çdo gjë në duart e rastësisë, megjithëse ditët pa të nuk shtyhen”,-thotë Hygerta duke treguar se nuk di asgjë për rrëmbyesin e zemrës së saj. Me një filozofi që të lë të kuptosh se më shumë se dashuria asgjë tjetër nuk ka rëndësi në jetë, Miss Albania ndihet e lumtur me këtë mënyrë të dashuruari.Të tjerat për të nuk kanë rëndësi. “Më intereson të ndihem kështu si tani për një kohë të gjatë. Zyrtarizmat nuk më interesojnë”,-tregon Hugerta rreth dashurisë së saj e cila duket se e ka çuar në qiellin e shtatë. “Është një njeri për të cilin nuk di asgjë rreth tij dhe që pres të më rikthehet nga dita në ditë. Nuk kam ndërmend t`ia bëj të ditur dashurinë time por vetëm do të pres”,-thotë bukuroshja. Megjithëse deri tani fatkeqe në dashurinë e saj, kjo nuk e ka penguar aspak në realizimin e projekteve të mëtejshme. Përkundrazi, duket se kjo vuajtje e ëmbël i ka dhënë krah në rrugën e saj. Po interpreton në dramën “Stinë e Mërzitshme në Olimp”, të Kadaresë me regji nga Gëzim Kame. Këtë e quan një eksperiencë të veçantë, sepse është hera e parë që po ushtron profesionin për të cilin është diplomuar. Eksperiencën e “Stinës së mërzitshme” kërkon ta çojë më tej tek thotë se dëshiron të mbetet gjatë në artin skenik. Pse jo do t’i pëlqente të intepretonte edhe në kinematografi dhe nuk do të refuzonte ftesën e një regjisori filmi. Por ndërkohë nuk lë mënjanë ekranin dhe sidomos xhirimet në reklamat fitimrurëse. Po punon në xhirimet e reklamës së re të “Gërvisht dhe Fito”. Më pas ka ndërmend të rikthehet në ekranin e vogël me një spektakël të saj. Po ashtu ka dhe një kontratë me agjencinë “Spring’ në Itali, e cila kujdeset për njerëzit e spektaklit. “Tani për tani jam duke vlerësuar ofertat më të rëndësishme që më janë bërë nëpërmjet kësaj agjencie por s’mund të flas pa vendosur ende”, –thotë Hygerta e cila pas dy javësh do “fluturojë” drejt Gjermanisë ku do të prezantojë disa koncerte që do organizohen nga këngëtarët kosovarë. Kështu ndërmjet një dashurie të fshehtë dhe karrierës, Hygerta thotë se “Është një miss i rastësishëm, një prezantuese që do të vdesë e tillë dhe një aktore e diplomuar”. Tregon se është më e butë se ç’duhet, ambicioze, por pa shkelur rregullat e altruizmit- “S’dua të shkel asnjë duke formuar karrierën time”, –dhe pikërisht rrugën e karrierës në Shqipëri nuk e sheh të fortë, por spekullative.
