Valencia, interes për K. Ronaldon

Valencia duket se është gati të hidhet në sulm gjatë verës për të blerë mesfushorin portugez të Mançester Junajtid, Kristiano Ronaldo. Valencia do të ofrojë 17 milionë stërlina (29.5 milionë dollarë) për të riun, kur merkato të hapet sërish. "Dua që Valencia të bëjë gjëra të mëdha në Ligën e Kampioneve dhe Kristiano Ronaldo do të ishte perfekt për këto plane. Do të bisedojmë me Mançester Junajtid", tha presidenti i Valencias, Huan Soler, për një gazetë britanike.

Fabregas: Reali? Nuk di asgjë

Çeks Fabregas ka thënë se është i gëzuar që një klub si Reali i Madridit është interesuar për të. Mesfushori spanjoll javën e shkuar debutoi me përfaqësuesen e Spanjës. "Unë të shkoj te Reali i Madridit? Di vetëm nga ato që kam lexuar. Kam një kontratë deri në vitin 2011, por nuk mund ta hedh poshtë faktin se interesimi i Realit të Madridit më mbush me krenari. Eshtë një klub që njihet në të gjithë botën". Mesfushori tha gjithashtu se, nëse largohej, atëherë Milani do të ishte një tjetër skuadër interesante për të.

Bekham: Nuk dua të bëhem trajner

Kapiteni i Anglisë, Devid Bekham, ka thënë se nuk është i interesuar për t'u bërë trajner, kur ta përfundojë karrierën e tij si futbollist. 30-vjeçari i Realit të Madridit shpreson që të përfshihet më shumë me futbollin e të rinjve dhe ka në plan të kalojë më shumë kohë me familjen. "Nuk më ka interesuar asnjëherë. Nuk kam dëshirë të bëhem trajner, tha mesfushori. Më pëlqen shumë të jem futbollist. Roli i trajnerit nuk do ishte një pasion për mua."

Vise: Sikur të fshihesha nën tokë

Minuta numër 88-të e ndeshjes së jetës në Champions League kundër Juventusit. Mrekullitë e bëra, siç nuk mund ta imagjinonte kur u thirr për të zëvendësuar të gjorin Rainke (i detyruar, ndoshta, për të braktisur futbollin), u duk sikur ishin tepër për Tim Visen. "Ishte e tmerrshme, tregon ai. Do të doja të futesha nën tokë për atë që bëra. Patjetër që ishte momenti më i keq i karrierës time. Ç'mund të them tjetër? Ishte një budallallëk i madh. Tani duhet ta hedh prapa krahëve dhe të vazhdoj të kërkoj punën time".

Përgatiti: Arbi Hoxha