Shumë përdorues grekë të internetit kanë ngelur të shtangur, ndërsa kanë pritur të hapet faqja që kanë kërkuar. Në vend të saj kanë parë të hapet një flamur shqiptar dhe të dëgjohet Himni i Shqipërisë. Sipas gazetës greke “Elefterotipia”, janë dhjetëra faqe në internet të firmave greke si dhe të disa organizatave të ekstremit të djathtë që janë bërë objekte sulmi nga një organizatë, e cila deklarohet nga Shqipëria dhe që kanë tërhequr vëmendjen jo vetëm të përdoruesve të internetit, por edhe të Shërbimit Kombëtar të Informacionit (EYP).
Sipas të dhënave të deritanishme, grupi i cili godet sitet e firmave greke në internet, quhet “Albanian Security Clan”, dhe vepron që prej gjashtë muajsh. Në qendër të sulmeve të tij, ky grup ka vënë kryesisht faqe me përmbajtje tregtare dhe biznesi dhe në plan të dytë janë faqet me përmbajte kulturore apo politike, siç është ajo e partisë “LAOS” të Karaxhaferit, kanale televizive dhe së fundi edhe faqen zyrtare greke të Eurovizionit.
Në plan të parë, në faqen e goditur del një flamur shqiptar dhe shprehja “Shtypni punëtorët shqiptarë dhe ne do të shqyejmë të gjitha sitet greke”. Dhe të tjera si “fuck Greeks, fuks Greeks”, ndërkohë që në shumicën e siteve të goditura dëgjohet edhe Himni Kombëtar shqiptar.
Deri tani policia dhe shërbimi sekret grek nuk kanë ndonjë bazë nga ku mund të fillojnë kërkimet për kapjen e grupit, i cili ka shumë mundësi që të veprojë nga brenda Greqisë. Por ajo që shqetëson më shumë shërbimet greke, derisa të fillojnë hetimet - ndërkohë që sulmet sa vijnë e shtohen nga e njëjti grup- është rreziku që këta hakerë të shkallëzojnë sulmet e tyre në sisteme kompjuterike më të rëndësishme me interesa të mëdha publike, siç janë: OTE (Rrjeti Telefonik Grek); DHEI (Ndërmarrja Elektroenergjetike); EYDHAP (ujësjellësi); sistemi i metros etj.
Të gjitha duken si skenarë filmi fantastiko-shkencorë, por autoritet greke kanë filluar të marrin masa. Kështu është riaktivizuar sistemi i sigurisë dhe mbrojtjes nga sulmet elektronike të sistemeve me interesa publike, i cili u ngrit dhe u përdor në Greqi gjatë kohës së Lojërave Olimpike “Athina 2004”.
Gjithsesi, specialistë të sigurisë së internetit thonë së faqet e goditura nga “Albanian Security Clan” janë site, të cilat shfaqin dobësi për sa i përket sigurisë në internet dhe se edhe një person me pak njohuri mund t’i dëmtojë.