Vesa Luma edhe në klip me shumë kile të tepërta

Një tjetër etheiste po shfaqet në tregun muzikor shqiptar dhe kjo është e ëmbla Vesa Luma, e cila për fatin e saj të mirë apo të keq, gjithmonë ka qenë prezent në gazetën tonë me komentet e shumta për të. Së fundi ne po e shohim Vesën me një videoklip të ri, ku femra e vetme në atë grup masiv meshkujsh është ajo. Si gjithmonë Vesa është e qeshur dhe shumë mirë profesionalisht. Megjithëse kishim shumë dëshirë ta shihnim këtë punë të komentuar nga kolegët e saj, paramenduam se Vesa do të ishte treguar më e kujdesshme në eliminimin e kilogramëve të tepërt, të cilat në këtë videoklip evidentoheshin goxha falë fustanit të saj të shkurtër. Por përderisa Vesa nuk ka bërë fare kujdes që kjo pjesë të eliminohej, tregon se ndjehet mirë me këtë performim dhe në këtë peshë. Megjithatë dihet se Vesa kurrë nuk ka pasur problem për ti fshehur kilogramët e tepërt, e aq më shumë për tu përpjekur ti mbulojë ato, pasi kjo peshë gjithmonë është konsideruar si shumë normale për shijet e saj.



Artiola Toska me një baladë interesante

Artiola e vogël, por me nuhatjen e një tiranaseje, ka ditur të sjellë bukur një baladë dashurie, e cila nuk ka fare lidhje me stilin popullor të këngëtares së talentuar. Kjo baladë është mjaft e ndjerë dhe notat e larta tregojnë se Artiola di ta mbajë mirë edhe këtë stil të kënduari, megjithëse është pak larg versionit të këngës popullore tiranase të aplikuar më parë me shumë sukses prej saj. Kjo këngë është provë e një përgatitjeje të mirë teknike e vokale të Toskës. Balada falë zërit të Artiolës ka shumë ngrohtësi në interpretim, por mbart edhe vështirësi teknike, të cilat ajo i përballon me sukses se alternimi i stileve të tjera muzikore (gjë që për shumë këngëtarë popullorë mund të jetë tabu) mbart edhe frikën e dështimit e për rrjedhim largimin e fansave, si dhe rënien e albumit. Kjo frikë bën që shumë këngëtarë të mos e aplikojnë eksperimentin, por të sjellin versione të provuara dhe të gatshme për të qenë në rregull si me tregun, por dhe me veten e tyre. Por me Artiolën e vogël ndodhi ndryshe, pasi ajo mundi ta përballojë me sukses këtë provë dhe të ketë në albumin e saj të fundit edhe një baladë dashurie ndryshe nga këngët e tjera të servirura prej saj. Pas kësaj kënge, Toska demonstroi se nuk di të sjellë bukur vetëm këngën popullore qytetare, por edhe një baladë të thjeshtë, një alternativë e re kjo e vokalit të saj dominues.



E dini se si argëtohet Zaimina?

Si mendoni se argëtohet bukuroshja tronditëse e ish-imazhit të vajit Fjol, Zaimina Vasjari?!... Kësaj pyetjeje ju mund tia merrni përgjigjen nëse jeni frekuentues të rregullt të jetës së natën, por nëse keni shansin ta rastisni në një nga pub-et ku ajo zbavitet me miqtë e saj. Gjithsesi edhe nëse nuk jeni të pranishëm atje, ne do të përpiqemi tu tregojmë se si i kalon orët e zbavitjes Zaimina, që gjithmonë të surprizon.
Pija është një nga format antistres, e cila jo vetëm nuk del kurrë nga moda, por përkundrazi pranon rreth vetes anëtarë të rinj dhe të vjetër të larguar, të cilët nën ndikimin e saj çlirohen dhe stimulojnë alegrinë e dëshiruar nga të gjithë. Pikërisht me gotat e pijes në tavolinë, Zaimina dhe miqtë e saj shpenzojnë orë të tëra, duke pritur agimin e kthjelltësisë së tyre. Ne që kemi pasur mundësinë ta shohim këtë show, jemi zbavitur, pasi në grupin e tyre krijohet një atmosferë gëzimi dhe gare midis ish-Miss-it dhe mikeshave tw saj se cila nga vajzat e mban më shumë alkoolin. Kjo është një nga kënaqësitë dhe argëtimet e fundit që bukuroshja jonë ka preferuar të bëjë në pub-et, apo klubet e Tiranës. Fillimisht e gjitha nis si një lojë, deri në momentin kur dikush ua prishi qetësinë për ti ofruar një pije Bacardi di Cola, të cilën Zaimina e ka pijen e saj të preferuar, për të vazhduar me kërkesa pa fund të gotave deri në momentin e shpalljes së fituesit, që natyrisht i takon Zaiminës, por tashmë të bërë tapë... Ja që stërvitja e gjatë dhe sistematike dha edhe frutet e saj, jo vetëm një argëtim, por edhe me trofe Pas trofeut mund të vijnë edhe të tjera të mira, pasi duke e ditur se Zaimina është dashamirëse e rregullt e këtyre pijeve, po komentohet se ajo mund të jetë imazhi i ri i njërës prej tyre. Fundja të gjitha kushtet i plotëson për të qenë një imazh.Pse të mos i konvertohet në para kjo zbavitje, pasi nuk është pak që të hedhësh nokaut mikeshat më të stërvitura.



Më shumë parodi se kurrë në këngët tona

Sa e sa tituj këngësh ju kanë bërë që të qeshni kur i hasni në kanalet tona televizive!... Aleks Micka është një nga këngëtarët që njihet me këto lloj këngësh. Humori i dy pleqve të gjorë, të cilët grinden se me cilën parti janë, krijojnë situatën konfliktuale që në fillim të këngës, ndërsa refreni Partia Socialiste, Partia Socialiste janë lajtmotivet e kësaj kënge satirike, ku publiku ynë shkrihet me sfurkun e plakës dhe grushtin e plakut që bie pa mëshirë Ja një model i pleqërisë sonë të lumtur, e cila ia vlen të ketë si refren duetin e animuar midis partish. Tjetër këngë ku parodia është prezente është edhe kënga e kunatave, ku fabula është mjaft e thjeshtë, por në rastin konkret nuk kemi pleq që zihen, por kunata të cilat janë evidentuar dukshëm me titra, njëra si ferrë e tjetra si drizë dhe me grimasat e grindjeve të tyre, ato të sjellin ndërmend skenat e sherreve të familjeve tona të shëndosha. Për të vazhduar me klipin e Ermal Mamaqit, si dhe atë të këngëtarit Kujtim Shehu me këngën Ka dalë qejfi ashi qare, ku aktori vihet në pozitë përpara skenave të tundimit të sekretareve të talentuara për çështje të tjera. Do të vazhdojmë me duetin e Kastros, që bie nga fiku, si dhe gruas që godet burrin, i cili e sheh me komshien bukuroshe. Por pse vallë është kjo preferencë për këngë të tilla? Përgjigjet janë të shumta, ku opsinioni se i kërkon publiku, është më i përdoruri tek këta krijues.

Prapakuintat dhe misteret e divorceve të tyre

Kur bëhet fjalë për divorce dhe ndarje, ata që e kanë përjetuar përpiqen ta evitojnë këtë temë për arsye personale nga më të ndryshmet. Megjithatë, kur në mes janë figura të njohura të skenës dhe ekranit e kemi të pamundur të mos tregohemi pak kuriozë për të zhbiruar më tej. Iu rikthehemi dy emrave të njohur të ekranit. Pas divorcit të parë Silvana Braçe rigjeti dashurinë dhe lumturinë në një martesë të dytë. Bionden tipike të ekranit të Televizionit Shqiptar e kemi parë shpesh në këtë periudhë të tregohet e hapur për jetën private, familjen e re, ngrohtësinë që ka gjetur tek bashkëshorti dhe djali i saj Fajtoni. Nuk e ka aspak problem të flasë për faktin, që Agroni, njeriu që ajo ka zgjedhur për të kaluar jetën është disa vjet më i ri se Silvana. Për të kjo është një tabu e thyer. Dhe duket se e shkuara është hedhur pas krahëve. Silvana ka një jetë të re, një familje të re dhe nuk dëshiron ti kthehet së kaluarës, të paktën për të folur rreth saj. Megjithatë kohët e fundit i është dashur tu rikthehet dokumenteve të divorcit. Vetëm pak javë më parë ajo është parë në ambientet e Gjykatës së Tiranës ndërsa kërkonte dokumentet e divorcit. Edhe pse është përpjekur të mos bjerë në sy dhe të hyjë si çdo qytetare e thjeshtë Silvana Braçe nuk ka arritur të kalojë pa u vënë re dhe pa tërhequr vëmendjen. Sigurisht në gjykatë askush nuk mund të na thotë përse Silvana e kërkonte këtë dokument, pikërisht tani që martesa e saj e dytë po shkon në vijë të mbarë dhe gëzon një familje të shëndoshë.
Edhe aktorja e njohur e skenës shqiptare Elvira Diamanti pas divorcit dhe zgjidhjes së një martese disavjeçare e ka rigjetur veten dhe lumturinë. Në këtë rast jo me një familje të re, por me një pamje shumë më interesante, pse jo me sukses të ri artistik e mbi të gjitha tek prania e fëmijëve të saj. Drejtoreshën e Teatrit të Kukullave e kemi parë këto ditë të jetë një prej anëtareve të jurisë në Festivalin e Filmit Shqiptar. Edhe tek Elvira duket se nuk ka mbetur asnjë gjurmë apo shije e keqe e së shkuarës. Ajo vazhdon të jetë drejtoresha e Teatrit të Kukullave dhe një artiste simpatike. Për më tepër sipas vendimit të Gjykatës, nga ana financiare Elvira ka arritur të marrë gjysmën e pasurisë të vendosur në vite dhe që llogaritet në shuma të konsiderueshme për të dhe fëmijët e saj.



Ndriçim Xhepa, në kërkim të një emri për djalin

Aktori i mirënjohur i skenës sonë Ndriçim Xhepa është në kërkim të një emri për trashëgimtarin e tij. U bënë më tepër se dy javë, që fëmija ka ardhur në jetë dhe vazhdon të thërritet ende thjesht bebi, sepse nga sa kemi dëgjuar Çimi po kërkon një emër të veçantë për vogëlushin dhe asnjë nga sugjerimet e deritanishme nuk ia ka mbushur mendjen. Dhe kështu, kur krejt rastësisht miqtë apo të njohurit e pyesin për emrin e djalit, Çimi u përgjigjet thjesht: akoma nuk po gjej një emër që të më bindë. Dua të jetë i bukur. Me sa duket edhe profesioni i artistit ndikon në këtë zgjedhje të Çimit, që është kërkues në këtë drejtim, sepse dëshiron një emër që të tingëllojë bukur, të ketë mundësi të shkurtohet dhe përsëri të mbetet i bukur, sikur të mos dojë që në të ardhmen i biri ta qortojë për emrin që do të mbajë. Nuk dimë nëse shijet e aktorit Xhepa janë për emrat shqiptarë apo të huaj, por bindemi që janë shumë selektive. Pinjolli i ri i familjes Xhepa ka ardhur në jetë dy javë më parë në maternitetin e ri të kryeqytetit, Kiço Glozheni. Ky është fëmija i parë i aktorit dhe bashkëshortes së tij Bardhës, e cila nuk ka asnjë lidhje me botën e artit, por punon në një bankë. Marrëdhënia e tyre nuk ka qenë shumë publike dhe mund të themi që pikërisht lindja e fëmijës publikoi edhe këtë anë të rëndësishme të jetës së Ndriçim Xhepës, për të cilin ishim mësuar të lexonim vetëm kronika që kishin të bënin me artin dhe sukseset e tij kinematografike.



Ermal Mamaqi, klienti i rregullt i Pro Credit

Ermal Mamaqi vazhdon të marrë kredi tek Pro Credit dhe të jetë klient i rregullt i kësaj banke. Është pikërisht një prej miqve të tij më të afërt ai, që në bisedë krejt pa dashur na zbulon këtë sekret të vogël të Ermalit. Në të vërtetë këngëtari dhe aktori i Portokalli kohët e fundit është përfolur shumë në faqet rozë të shtypit shqiptar për lidhjen e tij me bukuroshen dhe kolegen Amarda Toska. Janë fotografuar dhe janë parë së bashku në ambiente publike. Megjithatë çështjet financiare të Ermalit nuk janë përfolur. Ndoshta të shumtë mund të jenë ata, që ndërsa e shohin të kalojë rrugës me makinën e tij Peugeot 307 mund të mendojnë se gjithçka Ermali e ka arritur falë rrogës në Portokalli. Por në të vërtetë duket se ai ka filluar ti besojë jo vetëm emrit si aktor, por edhe aftësive të tij si sipërmarrës i lirë. Pas krijimit dhe ngritjes së një studioje muzikore Ermali po punon edhe për të hapur në kryeqytet një lokal, ku na thonë se nuk do të mungojë muzika live dhe ku shpesh vetë këngëtari do të jetë protagonist. Le të shpresojmë, që do të jetë i suksesshëm edhe në këtë drejtim.





Rishfaqja e Ilva Tares në rrugët e Tiranës


Ilva Tare është rishfaqur sërish në kryeqytet. Me pamjen tepër elegante, që e ka karakterizuar gjithmonë e shoqëruar nga një prej mikeshave të saj, e cila këtë radhë nuk ishte Rudina Xhunga, gazetarja e njohur Ilva Tare është parë dy ditë më parë në zonën e Bllokut. E veshur me një fustan të zi dhe flokët e krehur në mënyrë tepër ekstravagante, ajo tërhiqte vëmendjen e kalimtarëve. Dhe tani jo vetëm për faktin se është person publik, por për të kapur ndonjë ndryshim në lukun e saj pas martesës pak javë më parë me një biznesmen të huaj. Gazetarja në këtë mënyrë ka vendosur ti japë fund karrierës në mediat shqiptare dhe pas ceremonisë luksoze në Rogner është nisur drejt Londrës, ku ka vendosur të jetojë me bashkëshortin dhe të studiojë për një master.. Por me sa duket malli për familjen, apo ndonjë punë që kërkonte prezencën e saj, e ka rikthyer sërish Ilvën për disa ditë në vendlindje.