Dua të sigurohem që të gjithë shqiptarët ta kuptojnë se Amerika e di që ju ekzistoni dhe gjendeni përballë zgjedhjesh të vështira

Intervistoi: Andi Bejtja, TV Vizion Plus

Zoti President, fillimisht ju falënderoj për mundësinë që më dhatë mua dhe publikut
shqiptar me këtë intervistë. Cila është arsyeja që kësaj radhe përf****ë Shqipërinë në turin tuaj evropian?

Është një pyetje interesante. Në radhë të parë dua të sigurohem që të gjithë shqiptarët ta kuptojnë se Amerika e di që ju ekzistoni dhe gjendeni përballë zgjedhjesh të vështira, për të forcuar shoqërinë tuaj të lirë. Unë vij si një dashamirës i lirive në një vend ku njerëzit i dinë të mirat e lirisë. E dyta, më kanë bërë përshtypje udhëheqësit tuaj. Kam takuar liderët tuaj në kohë të ndryshme.

Ju kanë bërë përshtypje, në çfarë sensi?

Në sensin që janë të vendosur për të njëjtat ideale, si edhe SHBA-ja, besojnë në disa liri të caktuara. Njerëzve duhet tu jepet mundësia të jetojnë në një shoqëri të lirë, dhe kështu mesazhi im është: ne e mirëpresim miqësinë tonë, jam shumë krenar për punën e madhe që keni bërë dhe jam veçanërisht mirënjohës që jam i pari President në fuqi që vizitoj Shqipërinë.

Vizitë historike! Shqipëria po shpreson të marrë një ftesë në samitin e ardhshëm për tu anëtarësuar në NATO në vitin 2008. Sa realiste është kjo shpresë për Shqipërinë?

Mesazhi im për qeverinë shqiptare dhe popullin shqiptar është ky: së pari, faleminderit për interesin tuaj për tu anëtarësuar në NATO. Sikurse u kam thënë edhe vendeve të tjera që janë në këtë fazë të procesit, ka një hartë të caktuar që duhet respektuar, ka një rrugë për tu ndjekur, disa detyrime që duhet të përmbushen. Këshilla ime e vetme është: punoni sa më shumë për të arritur standardet që do ti shtynte vendet anëtare të NATO-s të pranonin kërkesën e Shqipërisë.

Le të kalojmë tek pika më e nxehtë, Kosova. Në fillim të javës ju morët një telefonatë nga Presidenti rus, Vladimir Putin. Ratë dakord për të ridiskutuar të ardhmen e Kosovës përsëri. Shqiptarët janë të shqetësuar për këtë. A prisni të bëni ndonjë kompromis të mundshëm me rusët, që mund të prekë planin Ahtisari ashtu siç është tani?

Le të qartësojmë atë që bisedova me të.

Se të gjithë shqiptarët janë të shqetësuar për këtë...
Po, janë të shqetësuar, sigurisht, por është një çështje e vështirë. Por nuk duhet të shqetësohem për pozicionin tim. Unë e kam bërë të qartë se mbështes planin e Ahtisarit dhe këto janë udhëzimet që i kam dhënë sekretares së Shtetit, Rais. Ajo është shumë dakord me mua. Këto do jenë udhëzimet që do u japim Kombeve të Bashkuara. Unë nuk di si mund të komentohet telefonata ime me Vladimir Putin, por siç i thashë edhe atij në telefon: Shiko, ne shpresojmë të evitojmë një konflikt të madh në rajon. Por ne besojmë se plani i Ahtisarit është rruga e duhur për të ecur përpara dhe ky është pozicioni i SHBA-së.

Në rast se Rusia përdor veton e saj muajin e ardhshëm në Këshillin e Sigurimit, a ka SHBA-ja një plan "b" për Kosovën?

Plani "a" është që të mundohemi që plani "a" të funksionojë.

Dhe nëse plani "a" nuk funksionon?

E di çfarë, ti po më kërkon të hamendësoj, meqë ra fjala kjo ndodh edhe me shtypin amerikan. Ata thonë: "nëse diçka nuk ndodh", puna ime është që pikësëpari kjo të ndodhi. Ne po mundohemi të bindim të gjithë anëtarët e Këshillit të Sigurimit të Kombeve të Bashkuara, që të mbështesin planin e Ahtisarit dhe po parashtrojmë shpjegimet tona se pse ky plan është i arsyeshëm dhe si ky plan do të vendoste paqen. Gjithashtu, ne shpresojmë që Komuniteti Evropian dhe NATO-ja do të vazhdojnë të bashkëpunojnë me Serbinë, që të ndihmojnë edhe ata të ecin përpara. Tju japë edhe atyre një mundësi që të jenë pjesëmarrës në disa struktura evropiane. Dhe në rastin e NATO-s, një mundësi për tu anëtarësuar në NATO, me SHBA-në si partner.

Më lejoni të jem i sinqertë. Të jemi të ndershëm, në rajon është shumë e lehtë të gjesh një qeveri pro-amerikane, por nuk është po kaq e lehtë të gjesh opinion publik pro amerikan. A ka SHBA-ja ndonjë strategji që ta ndryshojë këtë trend, në mënyrë që politika amerikane të jetë më efikase në planin afatgjatë?

Pikë së pari, njerëzit më pyesin për popullaritetin, qoftë brenda qoftë jashtë kufijve. Një lider smund të marrë vendime duke u përpjekur të fitojë popullaritet. Vendimet merren për hir të së drejtës. Unë kam marrë vendime, për të mirën e SHBA-së, ndonjëherë ato ma rrisin popullaritetin, ndonjëherë bëjnë efektin e kundërt. Popullariteti shkon e vjen, por disa parime duhet të jenë të qëndrueshme. Unë besoj se SHBA-ja duhet të përballet me tiraninë, sëmundjet dhe urinë. Besoj se SHBA-ja duhet të sigurojë territorin e saj nga sulmet e tjera. Dhe unë do të ndërmarr veprimet e nevojshme për këtë. Shpresoj që të tjerët ta kuptojnë pse. Dua që njerëzit ta kuptojnë arsyen e vendimit. Dua që njerëzit ta respektojnë vendin tim dhe të pëlqejnë amerikanët, dhe shumica i pëlqejnë amerikanët. Ndonjëherë e pëlqejnë Presidentin amerikan, ndonjëherë nuk e pëlqejnë. Unë do të bëja pyetjen "a do të vazhdoje të merrje vendime mbi parime të forta?" dhe përgjigjja është: absolutisht po.

Dhe më lejoni tju bëj një pyetje fëminore. Është hera juaj e parë në Shqipëri dhe çdokush pyet veten, çfarë i shkon në mendje Presidentit Bush kur dëgjon fjalën Shqipëri?

Një bregdet i bukur, histori interesante, njerëz myslimanë që mund të jetojnë në paqe, kjo më vjen në mendje. Mezi pres të vij. Të them të drejtën, mendova edhe për kohët e errëta të komunizmit, kur shoqëria ishte një shoqëri e mbyllur. Kam takuar shumë shqiptarë që janë të gëzuar që jetojnë në një shoqëri të lirë. Mezi pres të vij në vendin tuaj. Kam dëgjuar gjëra shumë të mira për të dhe do jetë një udhëtim interesant për mua dhe për Laurën.

Faleminderit shumë zoti President dhe jeni i mirëpritur!
Faleminderit!