Profesori i fizikës do të hetohet edhe për abuzime ndaj nxënësve. Për këtë fakt ka vënë në dijeni Drejtoria e Policisë së Tiranës, e cila po heton dosjen e 40-vjeçarit Arben Sheqi. Megjithatë, kjo mbetet vetëm në kuadrin e dyshimeve, deri në formulimin e një akuze. Burimet nga grupi hetimor i Antikrimit Ekonomik bënë të ditur se për CD-të pornografike janë vënë në dijeni prej disa ditësh. Pas ngritjes së problemit nga ana e Drejtorisë Arsimore, prindërit e një vajze në shkollën "Eqrem Çabej" nuk janë bindur në të vërtetën e servirur nga drejtuesit e shkollës. Ata janë shtangur kur kanë parë teksa vajza e tyre hapte CD-në e mësimeve dhe në ekran janë shfaqur pamje pornografike. Sipas policisë, fillimisht nuk i kanë besuar as vajzës së tyre për këtë problem, por më pas kanë kuptuar se ky problem ishte edhe te bashkëmoshatarët e saj. Antikrimi Ekonomik ka marrë në dorë këtë dosje, duke e proceduar profesorin për ****je të materialeve pornografike te nxënësit e shkollës. Sipas të dhënave policore, pretendimi i profesorit ka qenë se ka rënë viktimë e këtyre pamjeve, pasi nuk ka pasur asnjë qëllim dashakeqës me nxënësit. Por, nga ana tjetër, nuk ka mundur të shpëtojë prej faktit të pamjeve "të nxehta" në CD-të e ****ura prej tij. Për sa i përket Antikrimit Ekonomik, grupi hetimor i këtij sektori e ka proceduar atë në lidhje me veprimet financiare të profesorit. Megjithatë, interesim për këtë çështje ka shfaqur edhe seksioni i Antitrafikut në Drejtorinë e Policisë së Tiranës. Nga burimet policore të kryeqytetit mësohet se gjatë ditës së djeshme agjentët e seksionit të lartpërmendur kanë kërkuar delegimin e dokumenteve mbi çështjen e publikuar në media. "Ata kanë marrë dosjen për të vlerësuar gjithë materialet dhe për të parë nëse profesori i dërguar për ndjekje penale ka konsumuar elementë të veprës penale për abuzime seksuale", shpjeguan burimet nga grupi hetimor, të cilët ende nuk e kanë dokumentuar një gjë të tillë. Sipas tyre, dosja do të rishikohet me kujdes dhe do merren në pyetje disa nga nxënëset dhe nxënësit që kanë pasur kontakte me profesorin e proceduar penalisht. "Në përfundim të këtyre veprimeve, do të vlerësohet nëse ai do të ndiqet penalisht për vepër tjetër penale, apo do të pushohet hetimi i ndërmarrë", kanë detajuar burimet policore. Kjo histori ka lindur për policinë pas blerjes së CD-ve nga disa nxënës, të cilët ua kanë bërë faktin të ditur prindërve të tyre. Këta të fundit janë ndjerë në siklet kur kanë parë skenat në foto dhe filmimet që profesori i fizikës u kishte servirur nxënësve të tij. Ndërsa policia, pasi ka dëgjuar sqarimin e dhënë nga adoleshentët, të cilët kanë pohuar se janë në vitin e tretë në gjimnaz, i ka adresuar ata që të japin të gjitha sqarimet e nevojshme pranë Zyrës së Krimit Ekonomiko-Financiar në Drejtorinë e Policisë së Tiranës. Mësuesi i fizikës është marrë në pyetje dhe është vendosur të ndiqet në gjendje të lirë. Burime të policisë thanë se nga kontrolli i ushtruar në banesën e tij, janë sekuestruar 50 CD, të cilat tashmë janë në dorë të policisë për tu eksploruar.


Arsimi lëshoi qarkore të fshehur në të gjitha shkollat


Drejtoria Arsimore e Tiranës ka qenë në dijeni të skandalit të profesorit që u shiste materiale erotike nxënësve. Pasi është njohur me faktin, drejtoria arsimore ka urdhëruar shkarkimin e profesorit nga shkolla e mesme "Eqrem Çabej". Megjithëse për skandalin ishin në dijeni edhe drejtoria arsimore, Ministria e Arsimit, si dhe një pjesë e mirë e mësuesve të gjimnazeve, fakti u bë publik vetëm nga Drejtoria e Policisë së Tiranës. Përgjatë dy javëve, as Ministria e Arsimit dhe as drejtoria arsimore nuk ka dhënë ndonjë deklaratë lidhur me ngjarjen e ndodhur në shkollën e mesme për gjatë 9 muajve. Burime konfidenciale nga drejtoria arsimore e kanë pohuar këtë fakt, ndërkohë që kanë shtuar edhe se pas shkarkimit të profesorit është lëshuar një qarkore.

Qarkorja është dërguar nga Drejtoria Arsimore Rajonale e qytetit të Tiranës në të gjitha gjimnazet. Përmbajtja kryesore e qarkores kishte në thelb të saj ndalimin e tregtimit të lëndëve mësimore, libra apo materiale të tjera, në ambientet e shkollës.

Por edhe para se drejtoria arsimore të lëshonte këtë qarkore, në bazë të rregulloreve të shkollave dhe urdhrave të Ministrisë së Arsimit, askush nga mësuesit nuk ka të drejtë tu shesë nxënësve materiale mësimore, apo për më keq të ushtrojë presion mbi nxënësit që nuk blejnë të tilla materiale.

Ndërkaq, nxënësit e shkollës "Eqrem Çabej" prej shumë kohësh kishin diskutuar me mësuesit e tjerë, senatin e shkollës, si dhe me drejtuesit e gjimnazit, për presionin që u bënte profesori dhe materialet që i detyronte ai të blinin. Një nga nxënëset e gjimnazit të profilizuar deklaroi dje se mësuesi i detyronte të blinin CD, në të kundërt nuk do të mbeteshin në klasë. "Nëpërmjet nxënësve u ankuam në senat, por pa ndonjë informacion standard dhe pa një letër. Informacioni ynë ishte thjesht me gojë. Kështu që çështja mbeti pezull. Drejtorët ndërroheshin njëri pas tjetrit. Dhe në fund ai që do e merrte në konsideratë për ta ndjekur këtë çështje, iku. Çështja mbeti në këtë pikë", kjo ka qenë deklarata e njërës prej nxënësve të shkollës "Eqrem Çabej", Fiorza Mullai. Sipas saj, CD që shiste profesori kishin ushtrime fizike, kuize dhe përmbajtje pornografike. Profesori i fizikës është ndaluar për disa orë dhe më pas është lënë i lirë, sepse akuzohet se u ka ****ur nxënësve CD me materiale erotike. Mësuesi prej muajsh i detyronte të blinin fotot me ushtrimet e fizikës, por që mes tyre kishte pamje të nxehta. Në muajin e fundit të këtij viti, nxënësit e shkollës "Eqrem Çabej" kanë marrë guximin për të denoncuar profesorin e tyre. Ata thanë se CD me ushtrime dhe përmbajte erotike kushtonin 500 lekë. Nëse ata nuk i blinin, rrezikonin të mbeteshin në klasë. Pavarësisht se ngjarja po qarkullonte prej 2 javësh në zyrat e institucioneve arsimore, shpërndarja e CD me përmbajtje erotike është bërë publike nga policia e Tiranës. Profesori i lëndës së fizikës u ka ****ur për 9 muaj rresht nxënësve të degës së shkencave ekzakte CD me të cilat ka pasur lojëra, kuize, foto dhe video me përmbajtje erotike. Drejtoria arsimore është njohur para dy javësh kur është vendosur edhe shkarkimi i mësuesit në shkollën "Eqrem Çabej".

Ministria e Arsimit është vënë në dijeni nga policia e Tiranës që po kontrollon provat e deritanishme. Mësuesit dhe pedagogët janë të ndaluar të shesin libra apo materiale të tjera në ambientet e shkollës. Burime në Ministrinë e Arsimit deklarojnë se edhe nëse në CD nuk do të kishte materiale erotike, mësuesi do të shkarkohej se nuk lejohet që stafi i mësuesve të tregtojë materiale të ndryshme mësimore.