Urdhri” për veshjen e uniformës, ose ndryshe veshjes standarde, duket se ka disa kohë që ka mbërritur edhe në shkollën e gjuhëve të huaja në Tiranë, “Asim Vokshi”. Por, sërish problemet nuk kanë të sosur. Përve ç “gënjeshtrës” së madhe se secila gjuhë do të zgjidhte një uniformë, ngjyrat e së cilës do t’i përshtateshin flamurit të vendit, gjuhën e të cilit studiojnë për katër vite në shkollë, masat e tyre kanë qenë jo të kombinuara si ç duhet. Një uniformë, e përbërë nga një pulovër e vetme, ka kushtuar 1300 lekë, të cilat janë paguar nga vetë nxënësit, dhe do të pasohet edhe me një tjetër, me të njëjtat ngjyra si këto të tanishmet, por për stinën e verës. Uniformat janë zgjedhur me qëllim që nxënësit të dallohen më lehtë, sipas gjuhës së cilës ata studiojnë. Kështu pohojnë nxënës e drejtues shkolle sëbashku. Edhe pse nxënësit mendonin se do të dukeshin trendy me ngjyrat e flamujve përkatës, shumë prej tyre kanë mbetur të pakënaqur nga ngjyrat aktuale të uniformave. “Këto janë ngjyra koti, as që na pyetën fare, as senatorja e klasës, e as ndonjë tjetër”, tregon një vajzë që studion për anglisht. U tha që uniformat janë zgjedhur nga përfaqësuesit e nxënëseve dhe drejtori i shkollës. “Le pastaj materiali, gjasme vijnë nga Italia”, vazhdon shoqja karshi. Por mesa duket, më të pakënaqurit kanë mbetur djemtë. Ata e pranojnë që nuk u pëlqen veshja me uniformë, por gjithsesi ky tashmë është një rregull, që nuk mund të diskutohet gjatë.

Probleme me masat e pulovrave

Përpara dy javësh drejtori i shkollës, Prelë Vata, ka deklaruar se “të gjithë nxënësit duhet të paraqiten në shkollë me uniforma, ndryshe do të përjashtohen nga mësimi”. E megjithatë, kanë kaluar shumë ditë, e ka ende nga ata që vazhdojnë të hyjnë në shkollë pa uniformë, jo për antikonformizëm, por sepse mungojnë masat e përshtatshme të pulovrave. Asnjë nxënës nuk është përjashtuar nga mësimi, pasi nuk është faji i tyre, që nuk janë paraqitur me uniformë. “Më mirë kështu, të paktën rrimë edhe pak pa unirormë”, shprehet Andi, një djalë, klasa e të cilit nuk është kompletuar ende me veshje standarde. Kështu, qenka “kapërcyer” edhe rregulli, së cilit duhet t’i nënshtrohen të gjithë. Gjithsesi, sipas mësuesve, “kjo është një fazë kalimtare, pasi të gjitha rregullat në fillim implementohen me vështirësi”. Debati për veshjen standarde ka kohë që është ndezur në Shqipëri, mes përfaqësuesve të ministrisë së Arsimit dhe Shkencës, mësuesve, nxënësve, prindërve dhe opinionit publik. Edhe pse e pakëndshme dhe e parehatshme, për shumë prej nxënësve, ajo eliminon në masë veshjen ekstravagante shumë vajzave në shkollat e mesme publike në kryeqytet e më gjerë. Nga ana e tyre, nxënësit nuk duan të kenë një aparencë uniforme, e për më tepër që kjo t’u “imponohet”.

Uniformat sipas gjuhëve të huaja

Anglishtja ka uniformën me ngjyrë vishje në të kuqe, në të vërtetë nuk t ngjan shumë me flamurin anglez,
Gjuha gjermane ka uniformë me ngjyrë vishnje të errët,
Gjuha frënge ka uniformë me ngjyrë blu,
Gjuha italiane ka uniformë me ngjyrë bojëqielli,
Gjuha ruse ka uniformë me ngjyrë portokalli.