Ka konsumuar cigare pa fund dhe gjatë 24 orëve të para pas hekurave, Namik Dedgjoni nuk ka shprehur asnjë shenjë pendesë në lidhje me krimin makabër që ka kryer. Vrasja e të dashurës, Hëna Tringa, në sy të bashkëshortit të saj, Jonuz Tringa, përveç shijes së hidhur nuk i ka ngjallur asnjë ndjenjë fajësie taksistit Dedgjoni. Dje ai ka marrë masën e arrestit “burg pa afat”, duke mos pranuar që të mbrohet nga avokatët dhe duke u ulur i vetëm në karrigen të pandehurit. Masa e sigurisë Arrestimi vetëm disa orë pas ngjarjes pothuajse në kushtet e flagrancës, si dhe natyra e krimit, duket se kanë përshpejtuar marrjen e masës së sigurisë për Namik Dedgjonin, 39 vjeç, nga Memaliaj. Trupi gjykues i mbledhur në orët e vona të drekës, kryesuar nga gjyqtarja, Albana Spahiu, ka dhënë masën e sigurisë “burg pa afat” pas të dhënave të ofruara nga organi i akuzës. Prokurorja e çështjes, Alketa Ziflaj, ka argumentuar të gjitha materialet e vëna në dispozicion nga ana e policisë dhe të cilësueshme prej organit të akuzës, për dhënien e masës së sigurisë “burg pa afat” për vrasësin e gruas së dy fëmijëve nga Memaliaj. Ajo çka ka rënë në sy seancën e sotme ishte mungesa e një avokati mbrojtës për Dedgjonin. Kjo nuk është pohuar, apo mohuar nga pjesëtarët e Gjyqësorit, të cilët gjithsesi kanë vendosur që 39-vjeçari Dedgjoni të qëndrojë sërish në dhomat e paraburgimit të komisariatit të oolicisë së Tepelenës, në pritje për t’u gjykuar. Përcjellja e tij për në Gjykatën e Tepelenës është bërë nën masa të rrepta sigurie, nga frika e ndonjë hakmarrjeje të mundshme nga ana e familjarëve të Tringës. Hetimet zbardhin lidhjen dashurore Përgjatë ditës së djeshme, duke vazhduar deri në orët e mbrëmjes, vrasësi Dedgjoni i është nënshtruar një serie të gjatë pyetjesh nga ana e policisë. Në deklarimet e tij, Dedgjoni mësohet të ketë pohuar të gjithë mekanizmin e ngjarjes së natës së pardjeshme, kur vrau me vetëdije të plotë Hëna Tringën, të cilën pretendonte se e kishte të dashur që prej 6 vjetësh. Sipas Dedgjonit, ata janë njohur në plazhin e “Ujit të Ftohtë” të Tepelenës në vitin 2000. Sipas burimeve mjaft konfidenciale, Dedgjoni në deklarimet e tij ka pranuar se paskësh qenë i dashuruar me gruan e dy fëmijëve disa muaj më vonë. Njohja filloi të precipitonte, duke u bërë më e efektshme, pasi dhe takimet mes tyre, gjithmonë sipas Dedgjonit, liheshin tri herë në javë në vende të ndryshme, madje dhe në qytetin bregdetar të Sarandës, një prej vendeve më të frekuentuara prej tyre. “Kam qenë tmerrësisht i dashuruar dhe paskam qenë i verbuar nga ajo”, ka thënë vrasësi Dedgjoni. “Edhe ajo më dashuronte marrëzisht, madje këtë ma ka pranuar sa herë që unë ia kërkoja”, ka thënë para personave që e merrnin në pyetje 39-vjeçari. Në deklarimet e tij ai ka qënë mjaft argumentues dhe i prerë, duke çuditur madje edhe vetë hetuesit. ”E kam vrarë se ma bëri borxh. Nuk mund të durohej më ironia e saj karshi meje, që ishte mjaft e rëndë”, ka thënë vrasësi. “Nuk do të doja kurrsesi të përfundonte në këtë mënyrë, por Zoti e solli atë moment, që gjithsesi ishte i dhimbshëm si për të shoqin e saj, ashtu edhe për mua”, ka thënë Dedgjoni. Vrasësi Dedgjoni Namik Dedgjoni njihej si një shofer taksie mjaft korrekt nga ana e kolegëve të tij. Ai ishte i martuar dhe kishte dy fëmijë. Gjithnjë sipas kolegëve, ai punonte shumë për të mbajtur familjen dhe me furgonin e tij bënte rrugë të thella si në zonën e Kalivaçit, apo edhe në zonën e Miricës e Salarisë. Ai ka lindur në fshatin Memaliaj dhe më pas familjarisht ka zbritur në qytezën me po të njëjtin emër, për një jetë më të mirë. Viktima Tringa Hëna Tringa, 30 vjeçe, pothuajse pjesën më të madhe të kohës e ka kaluar pa punuar. Burime nga komshinjtë bëjnë të ditur se merrej me qëndistari në shtëpi, si dhe një periudhë kohe kishte punuar edhe në një market si ****ëse. E martuar që nga viti 1992 me Jonuz Tringën, ajo kishte dy fëmijë. Vetëm para 6 viteve familja e tyre ishte transferuar në qytezën e Memaliajt, pasi deri në atë periudhë kishin jetuar në fshatin me të njëjtin emër. “Ai ishte anormal. Donte t’i prishte familjen” Babai i Hënës: Vrasësin e paditëm në polici “Vajza ime dha jetën e saj, sepse nuk lejoi që njerëz anormalë si Namik Dedgjoni t’ia prishnin familjen”. Kështu ka reaguar një ditë pas humbjes së të bijës, babai i Hëna Tringës, Enver Zeneli. Duke rrëzuar të gjitha variantet e deklaruara deri tani nga vetë ekzekutori dhe policia për një lidhje mes tyre, ai u shpreh gjatë një kontakti me gazetën, se familja e vajzës së tij kishte bërë denoncim për shqetësimet e sjella nga Dedgjoni. “Shtetasi Namik Dedgjoni ka bërë veprime nga më të paimagjinueshmet. Ka shqetësuar në mënyrë sistematike për dy vjet time bijë dhe familjen tonë, duke kërkuar dorën e Hënës për grua. Për këtë fakt kemi vënë në dijeni dhe Punonjësit e Policisë, por ndaj tij nuk është marrë asnjë masë”, sqaroi Zeneli. Në emër të familjarëve, babai i viktimës 30-vjeçare thekson se, deri tani nuk është thënë e vërteta, por është deklaruar vetëm varianti që i intereson të arrestuarit për këtë ngjarje.