"Europe" ngre në këmbë pallatin e Kongreseve

Belina Budini
15-01-2007

Europe gjate koncertit te djeshem
"Europe" nisin me Tiranën turin e tyre evropian për vitin 2007, edhe pse në datat e turit të publikuara në internet, Shqipëria nuk ishte parashikuar si stacion i mundshëm. Por në një intervistë për gazetën "Shekulli", anëtarët e grupit të famshëm, pohuan se kjo ndalesë në Shqipëri, është pjesë e turit të tyre që do t'i shpjerë pas koncertit në Pallatin e Kongreseve, në Granada, Madrid, Barcelonë dhe Bilbao të Spanjës. A ka ndonjë kontekst politik kjo ardhje e paparashikuar e grupit në Tiranë? Megjithëse, mirëseardhjen grupit ua dhanë politikanët shqiptarë, Fatos Nano dhe Sokol Olldashi, në ambjentet e "Living Room" dje në mbrëmje, anëtarët e grupit shprehen se ky koncert është pjesë e turit të tyre të radhës dhe në të njëjtën kohë, pjesë e kërkimit të tyre të vazhdueshëm për vende të reja, që nuk i kanë vizituar më parë me muzikën e tyre.

Pesë suedezët, mendojnë se zhvillimi i vazhdueshëm kërkon progres artistik dhe se ka shumë më tepër të zbuluar në këtë botë, sesa në planetin Mars. "With so many things to be found" duket se është motivi kryesor i "Europe" dhe kërkimi i tyre përfundon me një qëllim ambicioz: Të bëhen legjenda të rrokut. Eksituese e kanë quajtur ata praninë në party-n e mbrëmshëm të limituar në ambjentet e pub-it, nga ku u larguan para mesnatës drejt hotelit, të shoqëruar nga tingujt e hitit të tyre më të famshëm "Final Countdown". Në intervistën që u morëm gjatë qëndrimit të tyre me gazetarë dhe të ftuar të tjerë në ambjentet e këtij pub-i, Joey Tempest dhe John Norum, këngëtari dhe kitaristi i grupit u shprehën se Tirana është një stacion nga më interesantët e turit të tyre që sapo e kanë nisur, ndërsa pohojnë se "rikthimi" i tyre vazhdon të shkojë shumë mirë pas "Start from the Dark" dhë këngët e reja po pëlqehen shumë, ndërsa fansat e tyre, ata të dikurshmit dhe plot të rinj, vazhdojnë t'i mbështesin njëlloj.

Pse jeni në Tiranë?

Neve na pëlqen shumë të eksplorojmë gjëra të reja dhe vende të reja. E kemi bërë shpesh këtë gjë dhe është pjesë e punës sonë dhe dëshirës sonë, për një lloj aventure muzikore.

A ka ndonjë kontekst politik kjo vizitë e juaj këtu, pasi pashë që mirëseardhjen ua uruan dy politikanë shqiptarë, që janë në momente kruçiale të karrierës tuaj?

Mmm... Pritja ishte shumë e ngrohtë... Vizita në Shqipëri është pjesë e turit tonë dhe menjëherë pas koncertit në Tiranë, të hënën do të nisemi për në Spanjë, ku kemi programuar disa koncerte të tjerë në Granada, Madrid, Barcelonë e Bilbao deri në datën 20 janar, pastaj turi ynë vazhdon në Zvicër, Itali, Austri, Çeki, Gjermani, Angli dhe Paris.

A e njihnit Shqipërinë?

Jemi këtu edhe për ta njohur pak, apo jo...!

Çfarë keni mësuar në kaq pak orë sa keni në Tiranë?

Që qenkeni njerëz shumë miqësorë. Pritja ishte shumë e ngrohtë dhe hoteli ishte shumë komod.

Po vajzat?

Tërheqëse...

Po për muzikën shqiptare, dini ndonjë gjë?

Jo, por zgjedhjet muzikore "Gold" këtu po na pëlqejnë.

Do të këndoni këtu në pub sonte?

Edhe mundet... (në fakt nuk kënduan)

Sa do të zgjasë koncerti juaj në Pallatin e Kongreseve?

Është parashikuar të zgjasë 45 minuta, por asnjëherë nuk i dihet, sepse shpesh vazhdon më gjatë se ç'është parashikuar. Varet nga atmosfera që do të krijohet...

Çfarë do të këndoni?

Kemi përzgjedhur hitet tona më të njohura, por edhe këngë nga albumet e reja.

Si po shkon rikthimi juaj muzikor në përgjithësi? A mendoni se do ta ringjallni magjinë e viteve '80?

Zhvillimi i vazhdueshëm kërkon progres artistik dhe në fakt, mendojmë se ka shumë më tepër për të zbuluar në këtë botë, sesa në planetin Mars. Rikthimi ynë po shkon shumë mirë dhe, për befasinë tonë, kemi patur një mbështetje vërtet të fortë nga fansat tanë, ata të dikurshmit, dhe plot të rinj. Sapo kthehemi nga turet, nuk na pritet më sa të shkojnë në studio, të frymëzuar për të bërë këngë të reja. Albumi ynë i fundit vijon në linjën e rrokut tradicional, por mendojmë se në ndonjë nga këto ditë, do të arrijmë diçka...

Pjesëtarët e "Europe' në Tiranë

Joey Tempest

John Norum

John Levén

Mic Michaeli

Ian Haugland

Albumi i fundit "Secret Society", një përpjekje për të arritur majat e dikurshme

Në kërkim të legjendës "rock"

Somario:

"With so many things to be found" duket se është motivi kryesor i "Europe" dhe kërkimi i tyre përfundon me një qëllim ambicioz: Të bëhen legjenda të rrokut.

Heronjtë e "hard rock"-ut me në krye këngëtarin Joey Tempest dhe kitaristin, John Norum, si edhe anëtarët e tjerë të bandës, Mic Michaeli, Ian Haugland dhe John Leven, kanë nisur kësisoj turin e tyre të shtatë për albumin "Secret Society" që është albumi i tyre i dytë që nga rikthimi fantastik në vitin 2004, me "Start From The Dark". Kritikët thonë se "Europe" po rikrijojnë vetveten dhe po kërkojnë sfida të reja. Nga pikëpamja e stilit, albumi i tyre i mëparshëm "Start From The Dark", ishte akoma afër tingullit dhe teksteve të suksesit të tyre të madh të vitit 1986, "The Final Countdown", që pati ****ur 8 milionë kopje në gjithë botën. Ndërsa "Secret Society" konsiderohet si një përpjekje për të arritur maja të reja. "Forever Traveling", "Love is Not The Enemy" dhe "A Mother's Son", janë disa nga këngët e tyre, janë disa këngët që ftojnë dëgjuesit për një udhëtim introspektiv në vetvete, ashtu si edhe të zbaviten në të njëjtën kohë. "With so many things to be found" duket se është motivi kryesor i "Europe" dhe kërkimi i tyre përfundon me një qëllim ambicioz: Të bëhen legjenda të rrokut. Albumi i tyre më i ri, "Secret Society" është publikuar në tetor dhe turet për të vazhdojnë.