Fushatë larg gjuhës së Berishës”, ka premtuar dje në Fier kryetari i PS-së, Edi Rama. Gjatë takimeve me kandidatët e opozitës së bashkuar, Rama i shoqëruar edhe nga Ilir Meta, Skënder Gjinushi, Neritan Ceka e Paskal Milo, kanë qenë në një mendje, se zgjedhjet vendore janë një test për qeverinë “Berisha”, pas të cilave vijnë zgjedhjet e parakohshme.
Rama ka deklaruar se do të jetë një fushatë me etikë, ku do të gërshetohen alternativat. Rama është shprehur se “do të mbështesim ata kandidatë që përmbushin jo vetëm aspiratat e partisë apo partive në koalicion, por dhe më gjerë, ata kandidatë që gëzojnë respektin mbarë qytetarë”. Më pas, Rama nuk ka harruar që t’i drejtohet Kryeministrit Berisha për t’i kujtuar se fitorja e opozitës së bashkuar në zgjedhjet lokale do të afrojë zgjedhjet e parakohshme.
“Zoti Kryeministër, qeveria juaj nuk përfaqëson shumicën. Është koha të ritestojmë qeverinë dhe më mirë janë zgjedhjet e përgjithshme të parakohshme për një gjë të tillë, sepse kostoja e kësaj keqqeverisjeje nuk mund të rritet më tutje”, - u shpreh Rama. Sipas tij, “kjo është një betejë e madhe për pushtetin politik, për t’i dhënë Shqipërisë shpresë dhe jo thjesht për të fituar një bashki apo komunë”. Rama ka theksuar gjithashtu se si opozitë e bashkuar, ata duhet ta shohin hartën e Shqipërisë si një të tërë dhe jo të fokusohen tek harta e komunës apo bashkisë ku interesohen dhe të harrojmë se rezultati në këtë komunë apo bashki është një rezultat i ndërvarur nga rezultati në nivel kombëtar. “Arsyeja që ne jemi të gjithë bashkë këtu, buron nga arsyeja e të gjithë shqiptarëve për të qenë të gjithë bashkë, për të hapur kështu një kapitull të ri shprese”, - tha Rama. Ndërsa kreu i LSI-së, Ilir Meta u shpreh se “ne jemi të sigurt se arrogancë nga prepotenca e qeverisë nuk do të gjejë mbështetjen e elektoratit në këto zgjedhje”. “Që të jemi shumicë, duhet të zgjedhim më të mirët e mundshëm në këtë sfidë elektorale”, - ka thënë Meta.
Ndërsa Skënder Gjinushi tha se “mesazhi që duam të përcjellim, është që e majta ka nxjerrë një mësim nga zgjedhjet e kaluara, vetëm nga fakti se ka munguar një bashkëpunim si ky i sotmi”. “Përvoja e 3 korrikut na mësoi të gjithëve që një e majtë e ndarë mund të çojë në humbje edhe në zona super të majta, madje edhe në zona të Fierit dhe të Mallakastrës. Ishte kërkesa juaj dhe e gjithë bazës së majtë që imponoi këtë bashkim”, - u shpreh Gjinushi. Ai theksoi se “gabimi që u bë në 3 korrik të mos bëhet më tani në zgjedhjet e ardhshme”. Neritan Ceka i PAD-së tha se “i vetmi grupim politik për ta qeverisur vendin me frymë evropianiste, është aleanca e majtë. Kjo është një dëshmi e bashkimit të të gjithë forcave të majta evropianiste. Ky është një bashkim vlerash, një bashkim që duhet të afirmohet, jo vetëm në elitën politike që ka kualitet më të lartë se ata që janë sot padrejtësisht në pozitë”. Ndërsa Paskal Milo i PDS-së, tha se “xhelozia politike mes partive është më e keqe se xhelozia në dashuri. Prandaj dua të tërheq vëmendjen për të qëndruar larg kësaj xhelozie, që ky koalicion i pastër të jetë dhe i frytshëm”.
Rama tha në fund se “cilido kandidat që do të shkelë kodin e etikës, qoftë nga PS-ja apo opozita e bashkuar dhe që përdor gjuhën e vjetër që i shkon për shtat Sali Berishës dhe jo një gjuhe të re, do të përjashtohet nga gara”.

Rama
Kryetari socialist, Edi Rama u bëri thirrje gjithë kandidatëve të respektojnë etikën në garë. “Cilido kandidat që do të shkelë kodin e etikës, qoftë nga PS-ja apo opozita e bashkuar dhe që përdor gjuhën e vjetër që i shkon për shtat Sali Berishës dhe jo një gjuhe të re, do të përjashtohet nga gara”, - tha ai.
Meta
Kryetari i LSI-së, Ilir Meta u shpreh gjatë takimeve të djeshme në Fier, se “ne jemi të sigurt se arrogancë nga prepotenca e qeverisë nuk do të gjejë mbështetjen e elektoratit në këto zgjedhje”. “Që të jemi shumicë, duhet të zgjedhim më të mirët e mundshëm në këtë sfidë elektorale”, - ka thënë Meta
Gjinushi
“Përvoja e 3 korrikut na mësoi të gjithëve që një e majtë e ndarë mund të çojë në humbje edhe në zona super të majta, madje edhe në zona të Fierit dhe të Mallakastrës. Pushteti lokal këtë radhë është vetëm prelud. Nuk është mbarim i pushtetit, është një prelud për të mbërritur në zgjedhjet e parakohshme”, - tha Gjinushi.
Ceka
“I vetmi grupim politik për ta qeverisur vendin me frymë evropianiste është aleanca e majtë. Kjo është një dëshmi e bashkimit të të gjithë forcave të majta evropianiste. Ky është një bashkim vlerash, një bashkim që duhet të afirmohet, jo vetëm në elitën politike që ka kualitete më të larta se ata që janë sot padrejtësisht në pozitë”.
Milo
Kryetari i PDS-së, Paskal Milo ka bërë thirrje dje për bashkim të forcave për fitoren e zgjedhjeve vendore. “Xhelozia politike mes partive është më e keqe se xhelozia në dashuri. Prandaj dua të tërheq vëmendjen për të qëndruar larg kësaj xhelozie, që ky koalicion i pastër të jetë dhe i frytshëm”, - u shpreh kreu i PDS-së, duke tërhequr vëmendjen e kandidatëve