Ata që nuk mundën ose nuk donin të ndiqnin studimet e larta me kohë të plotë, kanë një tjetër shans për vazhdimin e universitetit. Korrespondencën, emërtuar së fundi, studimet me kohë të pjesshme (part-time). Veçse jo ku të duan. Universiteti i Tiranës i ka bërë tashmë propozimet për degët që ofrojnë këtë sistem dhe për numrin e studentëve që janë në gjendje të përballojnë.

Ndërkohë që presin nga Ministria e Arsimit dhe Shkencës përgjigjen zyrtare lidhur me kuotat, tarifat përkatëse dhe skemën që do të përdoret për pranimin e tyre. Sipas rektorit të UT-së, Shezai Rrokaj, jo në të gjitha degët ofrohet ky sistem studimesh. “Këtë vit sistemin part-time e kemi propozuar në Fakultetin e Histori-Filologjisë, Ekonomikut dhe Juridikut”, - thotë Rrokaj, duke pranuar se do të ishte mirë që me kohë të pjesshme të kishte mësim edhe në degë të Fakultetit të Shkencave Sociale. Por, kjo e fundit, sipas tij, nuk realizohet dot, për shkak të mungesës së ambienteve në këtë fakultetet.
Kule: Ekonomiku, edhe me 50 mijë lekë
Asnjë limit për pranimet part-time në Fakultetin Ekonomik në Tiranë. Sipas vetë dekanit, Dhori Kule, nuk janë bërë propozime për kuota, por do të pranohen të gjithë ata që do të ketë dëshirë të ndjekin këtë lloj studimi. “Jam i mendimit se nuk ka shumë nevojë për kritere pranimi. Për mua, kush ka mbaruar shkollën e mesme, mund të ndjekë studimet part-time, pasi vijimësia nuk do të varet thjesht nga dëshira e momentit, por nga qëllimi që ka studenti për t’u arsimuar”, - thotë Kule, duke theksuar se ky sistem, më shumë se gjithë të tjerët, ka nevojë për staf të kualifikuar. “Kemi kërkuar që si çdo vit, të vijojë sistemi part-time, pa kufizim. Ndërkohë që përcaktimi i tarifës bëhet me vendim të Këshillit të Ministrave”, - thotë Kule. Sipas tij, këtë vit mund të ofrohen studime me një tarifë më të ulët, nga 75 mijë lekë që ka qenë në 50 mijë lekë, por kjo është një gjë që do të zyrtarizohet.
Filologjiku dhe Juridiku
Ndryshe është propozuar për degët e tjera, ku kuotat janë të limituara. “Në Fakultetin e Histori-Filologjisë janë propozuar nga 150 kuota për degët e historisë, gjuhë-letërsisë dhe gjeografisë”, - thotë rektori Rrokaj, duke shtuar se nuk do të ketë korrespondencë për degën e gazetarisë. Po kështu, ai pranon se në degën e juridikut janë propozuar 200 kuota për sistemin part-time. Pas studimit të situatës, infrastrukturës dhe stafeve pedagogjike, Rrokaj pranon se është parë e arsyeshme se 680 kuota për degët e part-time dhe pranimet pa limit në ekonomik janë të përballueshme. Degë të cilat, pa marrë në konsideratë cilësinë e mësimdhënies apo studentëve që kanë nxjerrë e kanë dhënë provën se mund të vijojnë në këtë lloj sistemi.
Pranimet
Nuk ka ende asgjë zyrtare sa i përket studimeve me korrespondencë. Duket se gjithçka është vonuar për shkak të tejzgjatjes së procesit të pranimeve në sistemin me kohë të plotë. “Nuk dimë asgjë nëse si kriter për pranimet e part-timit do t’i përmbahemi maturës shtetërore apo do të bëhet seleksionimi me dëftesa”, - thotë rektori i UT-së, Shezai Rrokaj. Për këtë ai deklaron se është detyrë e ministrisë të bëjë saktësime. Madje edhe për tarifën nuk dihet nëse do të ketë ndryshime apo do të vazhdojë të jetë ajo ekzistuesja. Nëse është kështu, atëherë për një vit studimet në juridik nevojiten 150 mijë lekë, 75 mijë në ekonomik dhe 50 mijë lekë për degët e Filologjikut.


150
kuota ka kërkuar Universiteti i Tiranës për korrespondencën në degën e historisë në Fakultetin Filologjik

150
kuota ka kërkuar Universiteti i Tiranës për korrespondencën në degën e gjeografisë në Fakultetin Filologjik

150
kuota ka kërkuar Universiteti i Tiranës për korrespondencën në degën e gjuhë-letërsisë në Fakultetin Filologjik

200
kuota janë propozuar për korrespondencën në degën e drejtësisë në Fakultetin e Drejtësisë

50
mijë lekë është tarifa për një vit shkollimi në degët e Fakultetit të Histori-Gjeografisë

75
mijë lekë është tarifa vjetore e shkollimit në Fakultetin e Ekonomisë në Tiranë

150
mijë lekë duhet të paguajë një i interesuar për të vazhduar me korrespondencë degën e Juridikut