Shumë zyrtarë të lartë të shtetit, sot gjenden pa asnjë mbrojtje. Rasti i djeshëm i dhunës ndaj ish kreut të SHISH Fatos Klosi, tregon se në çdorast, kushdo që ka “hesape” për të larë me ndonjë funksionar të lartë, mund t’i përfundojë vetë pa asnjë problem. Askush nuk garanton se nesër ish kryeministrit Aleksandër Meksi nuk mund t’i dalë përpara ndonjë i ashtuquajtur “i çmendur” dhe ta rrahë në mes të rrugës. Apo ish presidentit Meidani, që sot, nuk ruhet më nga Garda e Republikës madje nuk ka asnjë makinë për të qarkulluar, gjë që e ka shprehur edhe vetë në mënyrë publike. Por mund të ndodhë sikurse ishte rasti edhe i ish kryetarit të Kuvendit Pjetër Arbnori, i cili edhe pse ishte në Itali në momentet e fundit të jetës, askush nuk u kujtua për të, e për më tej, askush nuk e dinte se ishte në Itali për t’u kuruar dhe për t’i dhënë ndonjë ndihmë. Në fakt, më shumë sesa tragjedia e vetë këtyre ish zyrtarëve të lartë të shtetit, kjo është pa frikë tragjedia e vetë shtetit shqiptar, i cili nuk merr asnjë masë për të krijuar një gjendje sigurie për të gjithë ata ish funksionarë që kanë drejtuar sektorë delikatë në shtet duke marrë mbi vete përgjegjësitë.
Një pjesë e mirë e zyrtarëve politikë, këtë “frymë” të re frike, e lidhin me rikthimin e Gazidedes, ish shefit të SHISH, i cili edhe pse u akuzua për shumë ngjarje në vend, deri tani, nuk i ka hyrë asgjë në këmbë nga organet e drejtësisë që nuk duan apo nuk kanë mundësi t’i shkojnë të vërtetave deri në fund. Megjithatë, rasti i djeshëm me ish shefin e SHISH Fatos Klosi, është një ngjarje që më shumë përdhos figurën e shtetit.