Për plot nëntë muaj, nuk ka hapur gojë për ekzekutimin barbar të familjes së vëllait të tij. Atë breshëri të gjatë plumbash që derdhi në errësirë mbi Shpëtim Marën, bashkëshorten shtatzënë të këtij të fundit dhe mbi fëmijën e tyre dy vjeç, Artiolin, e kishte fshehur në një cep të kujtesës së tij, vetëm e vetëm që të mbulonte lidhjen sentimentale që kishte me kunatën. Por heshtja e tij ka marrë fund dje, duke zbardhur plotësisht motivin e një ngjarjeje, që në shkurt të këtij viti tronditi mbarë opinionin shqiptar. I dyshuari kryesor i ngjarjes së ndodhur në fshatin Kozare të Kuçovës, Luan Mara, i cili është arrestuar, përreth një javë është marrë nga 3 deri në 5 orë në pyetje nga hetuesit e çështjes. Gjurmët e gishtave të tij të gjendura në banesën e tre viktimave dhe krijesës që pritej të vinte në jetë, si dhe një palë atlete, ishin provat e vetme që dispononin fillimisht përfaqësuesit e Prokurorisë së Beratit. Pas hetimeve dhe përgjimeve telefonike (burime konfidenciale thonë se është bërë dhe një analizë ADN-je), është urdhëruar prangosja e Luan Marës. Seancat e gjata të pyetjeve si dhe pesha e rëndë e fajit, ka thyer më në fund autorin e krimit. 35-vjeçari ka pranuar autorësinë. Ndërkohë, ka pranuar dhe atë që nuk do të donte ta pranonte kurrë, se shkaku i tragjedisë në trungun e tij familjar ishte flirti me të kunatën, Florien, gjatë kohës kur i vëllai ndodhej në emigracion në Greqi. Kjo marrëdhënie e fshehtë u kishte kyçur gojën prindërve të vrasësit, vëllezërve dhe motrave të tij, pavarësisht dhimbjes së madhe për humbjen e njerëzve më të afërt të tyre. Por vrasësi nuk ka pranuar atë çka dyshohet nga hetuesit, se fëmija që priste Florie Mara, ishte fryt i marrëdhënieve të tyre jashtëmartesore.
Arrestimi
Nuk ka rezistuar dot. I ulur në një karrige përballë prokurorëve, Luan Mara ka deklaruar: Po, unë vrava vëllain tim Shpëtimin, gruan e tij shtatzënë dhe nipin tim, Artiolin. Përballë presionit psikologjik, 35-vjeçari ka thënë se i vëllai i tij dyshonte për lidhjen sentimentale me të shoqen. "Shpëtimi më akuzoi para prindërve të mi, se unë kisha marrëdhënie me gruan e tij, ndaj i ekzekutova dhe armën e hodha në breg të lumit Osum", - është shprehur pas një kohe të stërgjatë heshtjeje e pendimi, autori i një prej krimeve më të llahtarshme brenda familjes. Sipas hetuesve të çështjes, Luani ka pranuar faktin se kishte të bënte me nusen e vëllait të tij, Florien. Vetëm pak orë pas tragjedisë në këtë familje, i dyshuari kryesor ishte Luan Mara. Por ai kishte mohuar çdo gjë, madje akuzoi në atë kohë policinë se kishte ushtruar dhunë mbi të. Për gjurmët e tij të gjetura në dhomën ku u krye ekzekutimi i gjithë pjesëtarëve të familjes, 35-vjeçari kishte shpjeguar se kishte qenë për vizitë në mbrëmje tek vëllai i tij. E ndërsa është lënë i lirë, prokuroria ka mbajtur nën vëzhgim Luan Marën. Alo-t e këtij të fundit me të afërmit, kanë forcuar dyshimet se ai ishte autori i vrasjes. Nuk bëhet e ditur, nëse hetuesit kanë bërë analizën e ADN-së, që do të konfirmonte të vërtetën e tmerrshme që nuk thuhej, jo vetëm nga autori por edhe nga të afërmit e tjerë të viktimave. Provat e grumbulluara nga ekspertët kanë çuar në prangosjen e autorit të një vrasjeje të shumfishtë.
Vrasja
Në orët e para të mëngjesit të 10 shkurtit të këtij viti, një nga djemtë e familjes Mara ka sinjalizuar policinë për vrasjen e vëllait të tij, Shpëtimit e bashkëshortes së tij shtatzënë, si dhe fëmijës së tyre dy-vjeçar. Menjëherë pas kësaj ngjarjeje, u shoqëruan në polici vëllezërit e viktimës, Shpëtim Mara. I dyshuari kryesor ishte vëllai i vogël, Luani. Kjo për faktin se në banesën e viktimave u gjetën gjurmët e gishtave të tij.



Ngjarja

Masakra
Mëngjesin e 10 shkurtit të këtij viti, njëri nga djemtë e familjes Mara lajmëroi policinë për vrasjen e vëllait të tij, Shpëtimit, bashkëshortes së tij shtatzënë, Florijes dhe fëmijës së tyre 2-vjeçar, Artiolit

Policia

Shoqërimi
Vetëm pak orë pas ngjarjes që tronditi mbarë opinionin publik shqiptar, policia e Beratit shoqëroi në komisariat vëllezërit e viktimës, Shpëtim Mara. Gjithashtu u morën në pyetje dhe prindërit e këtij të fundit, Shefqet dhe Bajame Mara

Hetimi

Dyshimi
Pas veprimeve të para hetimore, i dyshuari kryesor për ngjarjen ishte vëllai i vogël i viktimës, Luan Mara. Në atë kohë, policia deklaroi se në banesën ku ndodhi masakra, u gjetën gjurmët e gishtave dhe një palë atlete të 35-vjeçarit.

Prokuroria

Zbulimi
Prokuroria e Beratit, pas 9 muajsh zbuloi autorin, si dhe zbardhi motivin e vrasjes së katërfishtë në fshatin Kozare të Kuçovës. Luan Mara ka pranuar krimin. Ai ka thënë se ekzekutoi vëllain dhe familjen e tij, për të fshehur lidhjen sentimentale që kishte me kunatën.
Informacioni eshte marre nga Gazeta Shqiptare.