Partitë politike u kritikuan në Strasburg,
jo vetëm për dështimin e reformës zgjed
hore, por edhe për tensionet politike që kanë shkaktuar dhe dëmtimin e imazhit të Shqipërisë në Evropë. Faktet u bënë publike dje nga një prej anëtarëve të delegacionit parlamentar në Strasburg, Arian Madhi. Mbi debatet e ditëve të fundit të zhvilluara mes pozitës dhe opozitës për reformën zgjedhore, çështjen e prokurorit etj, që në thelb kundërshtonin njëra-tjetrën, Madhi tha dje se shumë prej qëndrimeve të partive politike kanë qenë abuzive. Duke zbardhur pjesë të bisedave dhe rekomandimeve të eurodeputetëve, kreu republikan theksoi dje se Shqipërisë, ndër të tjera i është kërkuar të ketë kujdes edhe me respektimin e të drejtës së pronës, besueshmërinë e sistemit gjyqësor, sigurimin e energjisë hidroelektrike por edhe të respektimit të të drejtave të çamëve. Madhi citoi se ambasadori i prezencës finlandeze në Këshillin e Evropës, Rusi, tha: “Atmosfera politike në Shqipëri është përkeqësuar dhe kjo dëmton imazhin e Shqipërisë në Evropë”. Po kështu, sipas kreut të grupit republikan, Rusi kritikoi faktin që partitë politike shqiptare nuk kanë bërë asnjë përparim të dukshëm në reformën zgjedhore. Ndërkohë që për sa i përket çështjes së Prokurorit të Përgjithshëm Sollaku, Madhi bëri të ditur se një prej eurodeputetëve, Doris Pak tha se “Vendimet e Presidentit duhet të respektohen”.
Mangësitë
Ndër çështjet e tjera sipas Madhit të prekura gjatë vizitës në Strasburg, në takimin e 13-të ndërparlamentar, ishin edhe sistemi gjyqësor por edhe niveli i papunësisë, si dhe situata energjetike. Madhi bëri të ditur se nënkryetari i delegacionit, Johanez Slloboda vuri në dukje faktin që energjia hidroelektrike ka mangësi dhe se Shqipëria duhet të mendojë të fusë energjinë solare dhe termocentrale. “Për investimet e huaja ka një treg interesant, por duhen parë çështjet e infrastrukturës dhe energjisë”, - ka theksuar Slloboda sipas Madhit. Për sa i përket çështjes së pronave çame, Madhi citoi edhe fjalët e eurodeputetes Doris Pack. Ajo ka theksuar se “Të drejtat e çamëve janë çështje të së drejtës njerëzore dhe akte humanitare. Asnjë grek nuk mund t’i kundërvihet faktit që të trajtohen të drejtat humanitare të çamëve, si për të bërë vizita në vendin e tyre apo në varrezat e tyre”. Çështje të tilla si mangësia e energjisë, niveli ende i lartë i papunësisë në Shqipëri por edhe respektimi i të drejtës së pronës, nuk u prekën fare nga përfaqësuesit e dy partive të mëdha në delegacion. I gjithë debati i tyre u zhvillua lidhur me reformën zgjedhore, e cila duhet të mbyllet sipas eurodeputetëve, brenda muajit nëntor.



Rusi, Ambasador i prezencës finlandeze
Nga Shqipëria priten më shumë reforma, duhen arritur rezultate praktike në zbatimin e Marrëveshjes së Stabilizim-Asociimit
Kërkohen përpjekje nga qeveria, opozita dhe shoqëria civile.
Konstatoj në mënyrë dekurajoze, se atmosfera politike është përkeqësuar. Kjo dëmton imazhin e Shqipërisë në Evropë.
Reforma zgjedhore është një çështje shumë e rëndësishme.
Deri tani nuk është bërë asnjë përparim i dukshëm.

Doris Pack, deputetja e parlamentit Evropian
Nuk mund të kritikohet për çdo gjë qeveria. n Ne duhet të ndihmojmë Shqipërinë për ndërmarrjet e vogla dhe të mesme, si forma të suksesshme të organizimit ekonomik.
Vendimet e Presidentit të respektohen! Unë nuk gjykoj nëse janë të drejta ose të gabuara këto vendime.
Grekët kërkojnë të drejtat e minoritetit të tyre në Shqipëri, por ato duhet të thellohen dhe për çështje që ekzistojnë jo vetëm nga njëra anë e kufirit. Asnjë grek nuk mund t’i kundërvihet faktit që të trajtohen të drejtat humanitare të çamëve, si për të bërë vizita në vendin e tyre apo në varrezat e tyre.

Përfaqësuesi i KE, Rumbold
Shohim masa të vendosura nga qeveria, për të luftuar korrupsionin. n Mirëpresim rolin e Parlamentit, për sa i përket integrimit evropian për reforma të domosdoshme për implementimin e MSA-së. Të bëhet progres në respektimin e së drejtës së pronës!
Duhen ndryshime në sistemin gjyqësor, që ai të bëhet i besueshëm. Kemi parë progres në dogana. Heqja e barrierave ndaj biznesit është po kaq e rëndësishme dhe qeveria ka ndërmarrë hapa pozitivë në këtë drejtim.