Pas dy humbjeve radhazi, ndaj Çelsit dhe Realit të Madridit, Barcelona, që ka fituar dy takimet e tjera me Badalonën dhe Rekreativon, duket se ka gjetur optimizmin e duhur në prag të sfidës së sotme ndaj Çelsit në "Kamp Nou". Gjithsesi, kampionët e Europës duhet të tregojnë kujdesin maksimal, pasi një humbje do ta vështirësonte së tepërmi mundësinë e mbrojtjes së titullit. Barcelona renditet në vendin e dytë të grupit A, me katër pikë, aq sa Verderi i vendit të tretë, dhe pesë pikë më pak se Çelsi që i mundi katalanasit 1-0 në "Stemford Bridxh", dy javë më parë. Në ndeshjen e fundit të kampionatit, skuadra e Rajkardit arriti një fitore bindëse 3-0 ndaj Rekreativos. Braziliani Ronaldinjo shënoi dy herë, duke dhënë një sinjal se po i afrohet formës ideale, pas paraqitjeve zhgënjyese ndaj Çelsit dhe Realit. "Dinjo" shënoi golin e parë me 11-metërsh dhe e dyfishoi rezultatin me një gol me kokë, i pesti për të në Primera Divizion. "Ishte një fitore e rëndësishme për ne, - tha trajneri Rajkard. - Vura re një përmirësim te skuadra, sidomos në të luajturin në grup. Ndaj Çelsit do të jetë një ndeshje e ngjashme, sepse është një skuadër shumë e ekuilibruar dhe për këtë do të jetë vendimtar goli i parë. Ronaldinjo edhe ndaj Rekreativos luajti rolin e tij dhe kjo më bën të shpresoj për ndeshjen e vështirë që na pret."
Problemet e Barçës. Një nga problemet më të mëdha te Barcelona është mospërshtatja e dy blerjeve në merkaton e verës, Xhianluka Zambrota dhe Liliam Turam. Kësisoj, ndaj Çelsit mund të jenë titulluar Silvinjo dhe Beleti, me të cilët Barça luan një futboll më të rrezikshëm dhe për momentin japin më shumë garanci se dy futbollistët e ardhur nga Juventusi. Ndërkohë, pas dëmtimit të Etosë, sulmi është në këmbët e Eidur Gudjohnsenit. Islandezi ka rigjetur golin në Kupën e Mbretit dhe do të kërkojë të bëjë "bis" ndaj ish-skuadrës së tij. Edhe argjentinasi Havier Saviola mbetet një alternativë e vlefshme, pasi në ato pak minuta që ka luajtur, ka treguar se di të përshtatet me tipin e lojës së kërkuar nga Rajkardi. Argjentinasi tjetër, Lionel Mesi, ka lënë pas dëmtimin e pësuar ndaj Realit. 19-vjeçari është stërvitur rregullisht të dielën dhe sot do ta fillojë ndeshjen si titullar.
Dëmtimet e Çelsit. Hoze Mourinjo, trajneri i Çelsit, është ende në dilemë për aktivizimin e dyshes titullare Andrei Shevçenko-Didië Drogba. Ukrainasi nuk luajti në fitoren 2-0 që Çelsi arriti ndaj Shefildit në kampionat, për shkak të një dëmtimi muskular, ndërsa Drogba, i cili po kalonte një formë të shkëlqyer, u zëvendësua në minutat e para, pas një shqetësimin në këmbën e majtë. "Herën e parë ndaj Barcelonës luajtëm pa dy portierë, ndoshta tani është rasti të hipim në autobus pa dy sulmues," - tha trajneri i "bluve". Hilario pritet të jetë sërish titullar, edhe pse Kudiçini është stërvitur rregullisht në dy seancat e fundit. Portieri portugez, i cili nuk pësoi gol në ndeshjen e debutimit ndaj Barcelonës, u shqua edhe këtë të shtunë, kur priti një 11-metërsh.