Të freskët pas fitores në derbi ndaj Milanit, lojtarët e Interit janë të mbushur plot me besim, ndërkohë që përgatiten për udhëtimin në Rusi ndaj Spartakut të Moskës. Rezultati i kësaj ndeshjeje do të jetë shumë i rëndësishëm, pasi nga ky do të përcaktohet e ardhmja e këtyre dy klubeve në Champions. Bajerni i Mynihut kryeson renditjen me nëntë pikë, i ndjekur nga Sportingu i Lisbonës me katër pikë. Interi ka grumbulluar tri pikë dhe Spartaku vetëm një. Të dyja skuadrat nuk mund të tolerojnë dhe të humbasin, por Interi duket në formë më të mirë për të arritur fitoren. Fillimi i sezonit nuk ishte shumë pozitiv për milanezët, por më në fund duket se italianët kanë filluar të gjejnë rrugën te fitoret. Ata mundën Milanin të shtunën, duke kaluar në avantazh deri në 4-1, por pas daljes me karton të kuq të mbrojtësit Marko Materaci, Milani e ngushtoi rezultatin në 4 3. Forma e tyre është rritur në momentin e duhur. Një fitore 2 1 ndaj Spartakut të Moskës në "San Siro" i ka dhënë Interit pikët e para në këtë sezon të Ligës së Kampioneve. Ata kanë nevojë për tri pikë të tjera për të shpresuar për kualifikimin. Mesfushori Dejan Stankoviç, i cili tregoi formë të mirë në rolin e organizatorit pas dy sulmuesve në ndeshjen derbi, mendon se udhëtimi drejt kryeqytetit rus do të jetë një test i vështirë për besimin e klubit në Europë. "Të martën duhet të kemi përkushtimin e duhur dhe të njëjtin vullnet për të fituar që treguam ndaj Milanit, - tha ai për "sajtin" e Interit. - Nuk do të jetë e lehtë. Do të jetë ftohtë dhe ne do të luajmë në fushë sintetike, por mendoj se kemi mundësi të fitojmë". Patrik Vieira nuk do të luajë, pasi është dëmtuar ndaj Milanit, por Havier Zaneti së bashku me Dagllas Maikon ka mbushur hapësirat boshe që janë lënë në mesfushë. Në repartin sulmues do të jenë të gatshëm Zlatan Ibrahimoviç dhe Hernan Krespo. Hulio Kruz, i cili shënoi të dy golat ndaj Spartakut dy javë më parë, pritet ta nisë ndeshjen nga stoli i rezervave, por mbrojtësi Fabio Groso nuk do të luajë, pasi duhet të përmbushë pezullimin prej dy ndeshjesh. Por edhe rusët e dinë që ky është shansi i tyre i fundit real për të pretenduar një kualifikim të mundshëm në raundin tjetër. "Interi i këtij momenti nuk është ai i viteve të fundit, - tha kapiteni i Spartakut, Jegor Titov. - Nuk ka moment më të mirë për t'u ndeshur me ta dhe nëse nuk do t'i mundim dot këtë herë, me shumë mundësi nuk do t'i mundim dot herë të tjera". Interi ka fituar katër nga pesë ndeshjet e fundit ndaj Spartakut në kompeticionet europiane dhe një herë ndeshja ka përfunduar në barazim. Spartaku shpreson të arrijë të mos humbasë më në Ligën e Kampioneve, pasi prej 20 ndeshjesh radhazi nuk ka arritur te fitorja.
Driten VISHA

Spartak Moskë - Inter
Formacionet e mundshme:
Spartak: V.Kovalevski; Geder, M.Jiranek, K.Rodriguez, M.Stranzl; D.Bojarintsev, R.Kovaç, Mozart, V.Bistrov, J.Titov; R.Pavliçenko.
Inter: H.Sesar; D.Maikon, I.Kordoba, M.Materaci, F.Groso; H.Zaneti,
O.Dakurt, L.Figo; D.Stankoviç; Z.Ibrahimoviç, H.Krespo.


Spartak Moskë - Inter (18:30)
- Spartaku nuk fiton prej 20 ndeshjesh në Ligën e Kampioneve, i cili do të ishte një rekord nëse AEK-u i Athinës nuk do të kishte 21 të tilla. 16 nga 20 ndeshje kanë qenë humbje.
- Spartaku ka fituar vetëm dy nga 13 ndeshje ndaj kundërshtarëve italianë, e fundit ndaj Atalantës në Kupën UEFA 1989 90.
- Interi ka humbur vetëm një nga nëntë ndeshjet e fundit ndaj skuadrave ruse, një humbje 0-3 ndaj Lokomotivës para tri sezoneve.
- Katër nga pesë ndeshjet e fundit të Interit me Spartakun e Moskës kanë përfunduar me fitoren e italianëve me rezultatin 2-1.
Gjyqtar: Klaus Bo Larsen (Danimark)