Gjithsej 200. Aleks Del Piero është Juventusi dhe prej së shtunës edhe më shumë. Kapiteni arriti objektivin që kërkonte prej disa javësh pa fat dhe hyri direkt në historinë e klubit bardhezi. Një karrierë e karakterizuar nga magji autentike, si në kampionat, ashtu edhe në Europë. Vitet e para, me "golat "ala Del Piero" dhe ato të rëndësishmit, pas dëmtimit të pësuar në gju në Udine.
Numrat ndonjëherë flasim më shumë se çdo parashikim apo fjalë. Ato të Aleks Del Pieros nga Koniljano janë të një prej këtyre rasteve. 491 ndeshje gjithsej me fanellën bardhezi me 200 gola. Sa shumë! I fundit ndaj Frozinones, një skuadër ndaj së cilës asnjëherë nuk do ta kishte menduar se do të luante një ndeshje të vlefshme për kampionatin. Ndoshta një miqësore, por jo Serinë B. Festoi aty, në tempullin juventin, objektivin më të bukur, çmimin e një karriere të jashtëzakonshme.
Por Aleks Del Piero është Juventusi dhe Juvja është një "det" me trofe, me ndeshje legjendare, me gola që vlejnë një titull ose një kupë me veshë "të mëdhenj". Ata kanë qenë golat e Ales. Bota e futbollit e "zbuloi" në një pasdite në Firence. Një krosim nga mbrojtja dhe djaloshi që koordinohet dhe fluturimthi befason portierin e Fiorentinës, Toldo, duke i dhënë fitoren Juves (3-2). Një prekje prej kampioni, një goditje "ala Pinturikio", siç do të thoshte më vonë avokati. Pastaj, pati edhe të tjerë. Të mrekullueshëm, si ai në vitin magjik të Championsit, kur lindi "goli ala Del Piero" (goditja nga jashtë zone diagonal me të djathtën). Gola të rëndësishëm si ai në Tokio, që vlejti për Kupën Interkontinentale, ose si "perla" në finalen kundër Borusia Dortmundit. Por edhe ata të zemrës, ata plot kënaqësi si në Bari me atë vrapim, shikim dhe krahët e ngritura në qiell për të kujtuar babain që i kishte vdekur prej pak kohësh.
Për t'u kthyer te numrat, asnjëherë kaq pak të ftohtë, Del Pieroja ka një mesatare për gol me fanellën bardhezi, prej 0.40. Thuajse një gol në çdo dy ndeshje. Dhe duke parë problemet fizike që e kanë lënë disa herë jashtë, sidomos pas thyerjes së ligamenteve në gju në Udine në 1998-ën, është një e dhënë e jashtëzakonshme. Në Champions, "CV"-ja thotë 38 gola në 81 ndeshje, ndërsa në dy ndeshjet e Superkupës Europiane ka shënuar dy gola. Një histori bardhezi, si filmat më të bukur, ata të hyrë në mite, ata që nuk mbarojnë kurrë.