Një 17-vjeçare i ka dhënë fund jetës, duke u vetëvarur me litar në oborrin e shtëpisë. Ngjarja tragjike ka ndodhur në orët e para të ditës së djeshme, në lagjen "Kalluç" të Poliçanit. Motivi që dyshohet se e ka shtyrë Denisa Dervishin të ndërmarrë aktin e vetë-sakrifikimit, ka qenë një fejesë e padëshiruar nga babai i saj. Sipas policisë, vajza është vetëvarur në kushtet e depresionit. Ajo jetonte me gjyshen e gjyshin, pasi prindërit i ishin divorcuar para disa vitesh. Mësohet se kundërshtimin për fejesë, vajza e re ua kishte bërë prezent shoqeve të saj të lagjes.
Ngjarja
Banorët e lagjes "Kalluç" në qytetin e Poliçanit, janë tmerruar kur kanë parë trupin e pajetë të Denisa Dervi****, varur në një pemë në oborrin e shtëpisë së saj. Me gjithë përpjekjet për ta shpëtuar vajzën, banorët nuk kanë mundur të bëjnë dot asgjë, pasi ishte tepër vonë. Menjëherë, ata kanë lajmëruar policinë, forcat e së cilës nuk kanë vonuar të mbërrijnë në vendin e ngjarjes. Nga hetimet e para, mësohet se vajza kishte përdorur një litar, të cilin e kishte vendosur në një pemë rreth pesë metra të lartë. Grupi i ekspertëve tashmë po heton për të hedhur dritë mbi motivet e ngjarjes së rëndë, edhe pse dyshohet se shkak i saj është kundërshtimi i vajzës, për një fejesë të saj të bërë nga i ati. Madje, këtë fakt e ka pohuar dhe një shoqja e saj, e cila është marrë në pyetje nga policia. Miranda Sh., një prej banoreve të lagjes dhe shoqe e 17-vjeçares së vetëvarur, është shprehur para oficerëve të policisë se Denisa ishte një vajzë e urtë dhe e ndjeshme dhe ndonëse jetonte me gjyshërit e saj pas divorcit të prindërve, e kishte të vështirë përballimin e jetës. Ajo ka pohuar se shoqja e saj tashmë e vetëvarur, e kishte vënë në dijeni se kishte pasur një rast fejese, por e kishte refuzuar me çdo kusht. Sipas dëshmitares, kohët e fundit Denisa ndihej jo e qetë dhe shpesh i thoshte se jeta e saj ishte e vështirë.
Historia
Pesë muaj më parë, Denisa Dervishi është vendosur për të jetuar në lagjen "Kalluç" të Policanit, bashkë me gjyshin e gjyshen, pasi dy prindërit i ishin divorcuar vite më parë. Sipas policisë, nëna jetonte në Lushnje, ndërsa babai në Skraprar. Më-ngjesin e djeshëm, pasi vajza ka bërë punët e shtëpisë, kur gjyshi dhe gjyshja nuk gjendeshin në shtëpi, ka vendosur t'i japë fund jetës së saj. Vetëm pak orë më parë, ajo kishte blerë rroba të reja, pasi i kishin ofruar një rast fejese, edhe pse ajo e kishte kundërshtuar haptazi.