Hetimet për kufomën e 20-vjeçares së gjetur të masakruar në liqenin e Zall Herrit, kanë rikthyer grupin e hetimit në këtë zonë. Rreth 8 vajza nga fshati pranë liqenit me të njëjtin emër, janë thirrur për të dëshmuar në Komisariatin e Policisë numër 5, në Kamëz të Tiranës. Prej ditës së gjetjes së trupit të masakruar, Komisariati i Policisë së Kamzës është kthyer në një celulë të policisë kriminale të kryeqytetit dhe të Ministrisë së Brendshme. Verifikimet e grupit hetimor kanë vazhduar deri në orën 01:00 pas mesnate, duke u gdhirë dita e diel. Vajzat, mësohet se janë shoqëruar për t’u pyetur nëse kishin parë ndonjë vajzë që prostituonte, apo që mbahej e izoluar nga tutorë të prostitucionit në atë zonë. Vajzat janë pyetur edhe nëse kishin dijeni për ndonjë vajzë tjetër të zonës së tyre, që nuk është parë pas gjetjes së kufomës. Hetimet janë përqendruar në pistën e një krimi brenda familjes, ndaj edhe familjarët mund të mos kenë denoncuar zhdukjen e vajzës së tyre. Inspektorët e Krimeve dhe ata të Rendit, janë duke mbledhur informacione lidhur me zhdukjen e padenoncuar të ndonjë prej vajzave të zonës ku u gjet kufoma. Gjithsesi, deri në orët e vona të mbrëmjes nuk ishte kryer ende identifikimi i kufomës apo gjetja e motivit dhe identifikimi i autorit të vrasjes makabre.