Këshilli i Ministrave ka krijuar komitetin e lojrave të fatit, si një strukturë ad-hoc, pranë ministrit të Ekonomisë, i cili do të ketë si detyrë shqyrtimin e kërkesave për dhënien e lejeve të lojërave të fatit, kazinotë dhe hipodromet. Vendimi i qeverisë duhet të publikohet në gazetën zyrtare për t’u bërë ekzekutiv. Nga ai moment e tutje i gjithë sistemi delikat i lojërave të fatit dhe kazinove do të kalojë përmes këtij komiteti të ri dhe ministrisë së Ekonomisë, e cila prej pak javësh, gjithnjë me vendim të qeverisë, ka zëvendësuar ministrinë e Financave në kontrollin e këtij sektori. Një nga çështjet e para që duhet të marrë në shqyrtim komiteti, është kazinoja e vetme e autorizuar derimëtani në Shqipëri: “Regency Casino” e Tiranës.
KAZINOJA NE PRITJE TE NJE SELIE TE RE
Licenca për të hapur kazinonë u dha vitin e kaluar nga qeveria socialiste e kryeministrit Fatos Nano: procedura e komplikuar e garës u mbyll me fitoren e grupit grek “Hayatt Regency”. Vendimi për të hapur një kazino pikërisht në qendër të kryeqytetit u kontestua nga një pjesë e shoqërisë civile dhe nga opozita e atëhershme drejtuar nga Partia Demokratike. Pas zgjedhjeve të 3 korrikut 2005, shoqëria civile vazhdoi të kundërshtonte kazinonë, ndërsa qeveria, u mjaftua të fuste në ligjin e buxhetit taksa të reja për ata që zhvillojnë aktivitet kazinoje. Sa i takon vendosjes në qendër të Tiranës, kryeministri Sali Berisha bëri të ditur se ka arritur një marrëveshje me pronarët e licensës, të cilët janë impenjuar ta transferojnë atë në një vend tjetër. Një premtim, që vetë kryeministri është impenjuar ta respektojë.
PO KUSH JANE PRONARET E RINJ?
Problemi me të cilin duhet të merret komiteti i ri nuk është vetëm vendi ku duhet të transferohet Casino Regency, por edhe pronësia. Pas lajmit të taksave të reja të vendosura nga qeveria Berisha, në dhjetor të vitit të kaluar shoqëria greke “Hayatt” doli në përfundimin se investimi në Shqipëri nuk ishte më i leverdisshëm, ndaj vendosi të shiste licensën e sapo fituar. Kazinoja e Tiranës, prej gati një viti nuk i takon më shoqërisë ndërkombëtare që e kishte fituar zyrtarisht. Sipas dokumentave të publikuara nga Hayatt, licenca për kazinonë e Tiranës është blerë nga një shoqëri me seli në Qipro të cilës nuk i njihen zyrtarisht emrat e pronarëve. Duhet të jetë ky komitet i ri mbi kazinotë që të verifikojë me urgjencë se kush janë me të vërtetë pronarët e Kazinosë së Tiranës dhe nëse janë respektuar të gjitha kushtet e parashikuara nga ligji gjatë transferimit të licensës.