Ndërtimi i rrugëve të reja kërkon edhe fonde për shpro-nësimet e pronarëve. Në projektbuxhetin e vitit 2007 është përcaktuar një fond i veçantë që do të përdoret për shpronësime për interesa publike. Burime pranë Ministrisë së Financave bëjnë të ditur për “Gazetën”, se në projektbuxhetin e vitit 2007 ky fond është 12 milionë dollarë. “Kjo do të ndihmojë në zhvillimin e procesit të ndërtimit të rrugëve, me qëllim që rrugët të fillojnë sa më shpejt”, - shprehen burimet.
Investimet
Në projektbuxhetit e vitit të ardhshëm është parashikuar që të investohen rreth 200 milionë dollarë, ose 19 miliardë lekë për rrugët. Kjo shumë është e përcaktuar vetëm për Ministrinë e Punëve Publike, Transportit dhe Telekomunikacionit. Dy janë prioritet; lidhja me fqinjët dhe lidhja me bregdetin. “Me anë të këtij programi synohet që të arrihet përmirësimi i rrjetit rrugor kombëtar, kompletimi i korridoreve rrugore kombëtare, përmirësimi i rrugëve ndërkufitare, rrugëve turistike etj, si edhe përmirësimi i sigurisë së qarkullimit rrugor, duke synuar arritjen e standardeve bashkëkohore”, - thuhet në relacionin e projektbuxhetit. Në hartimin e kuotave të programit, “Rrjeti i rrugëve nacionale”, prioritet kryesor janë ndërtimi i korridoreve kombëtare Veri-jug dhe Lindje Perëndim, ndërtimi i segmenteve Milot-Rrëshen (26 km), Kalimash-Kukës-Morinë (29km) dhe Rrëshen–Kalimash(45 km), me synimin që rruga Durrës-Kukës-Morinë të përfundojë brenda viteve 2009-2010. Kështu, për vitin 2007, për rrugën Rrëshen–Kalimash janë parashikuar financime buxhetore rreth 5 miliardë lekë, për segmentet Kalimash-Kukës-Morinë janë parashikuar rreth 3 miliardë lekë. Vënia në eficiencë e rrugëve turistike të vendit si në plazhin e Durrësit, Divjakës, Semanit, Patokut, Velipojës, Shëngjinit, Spillesë etj, si edhe rehabilitimi i rrugëve përgjatë bregdetit Jug-Perëndimor, si ndërtimi i rrugës Transballkanike Vlorë për të cilën janë parashikuar financim buxhetor 486 milionë lekë, ndërtimi i segmentit Dhërmi-Himarë dhe vazhdimi i punimeve për ndërtimin e segmentit rrugor Himarë-Sarandë, për të cilat janë parashikuar përkatësisht 200 milionë lekë.
Rrugët nacionale
Në këtë projektbuxhet parashikohet që të rritet financimi buxhetor për mirëmbajtjen e rrjetit të rrugëve nacionale, duke synuar privatizimin e plotë të shërbimeve dhe mirëmbajtjes mbi bazën e performancës. Produktet kryesore që do të realizohen në këtë program janë 4.5 km rrugë nacionale të kategorisë parë, të ndërtuar me kosto 839 milionë lekë. Po ashtu, 14 km rrugë nacionale të kategorisë së dytë, të ndërtuar me kosto 7.1 miliardë lekë, 23.7 km rrugë nacionale të kategorisë së tretë, të ndërtuar me kosto 1.3 miliardë lekë. Gjithashtu, edhe 82.8 km rrugë nacionale të kategorisë së dytë dhe të rikonstruktuara, me një kosto 2.2 miliardë lekë. Fondet e planifikuara për vitin 2007 për këtë program, zënë 72.3 për qind të shpenzimeve totale të kësaj ministrie, kundrejt 50.4 për qind në vitin 2006. Në krahasim me të pritshmin 2006, fondet në total për këtë program për vitin 2007 janë rritur 27 për qind.
Rrëshqitjet
Në këtë projektbuxhet, përveç ndërtimit të rrugëve, një fond i veçantë është edhe për rrëshqitjet e rrugëve, si Sauk-Krrabë, rruga Qeserakë, unaza Shkodër, unaza Kavajë, rruga Gjirokastër-Tepelenë, e Vorë - Fushë-Krujë. Pjesa më e madhe e këtyre rrugëve financohen nga donatorët e huaj, ndërsa qeveria shqiptare do të financojë elementët e sigurisë, si shenjat sinjalistike, semaforët etj. Ndërkaq, edhe portet do të jenë në vëmendje, sidomos ai i Durrësit. Tani do të nënshkruhet një hua me Bankën Evropianë të Investimeve, që është rreth 30 milionë dollarë, për zgjerimin dhe sistemimin e portit të Durrësit.