Bekham, mesfushori i Realit të Madridit, nuk do të luajë në ndeshjen e sotme ndaj Gimnastik Tarragonës, për shkak të një shqetësimi muskular, bëri të ditur dje klubi "merenges". Ish-kapiteni i Anglisë u dëmtua në ndeshjen e Kupës së Mbretit, barazuar 1-1 ndaj Ekijës, e cila ishte e dyta që niste si titullar, nga tetë takime të luajtura gjithsej në këtë sezon. Bekhami nuk është stërvitur me skuadrën dhe flitet se 31-vjeçari ka nevojë për një javë pushim.

Leo Mesi, sulmuesi i Barcelonës, shpehet optimist për sa i përket pranisë së tij në ndeshjen e Ligës së Kampioneve, të martën ndaj Çelsit. Argjentinasi, i cili nuk do të luajë në ndeshjen e sotme ndaj Rekreativos, për shkak të një shqetësimi në kavilje, u shpreh për "El Mundo Deportivo": "Kavilja më dhemb akoma, por kam besim se të martën do të jem i gatshëm për të luajtur. Barcelona renditet në vendin e dytë të grupit A, me pikë të barabarta me Verder Bremenin.

Lotina, ish-trajneri i Numansias, Osasunës, Selta Vigos dhe Espanjolit, do të drejtojë Sociedadin në pjesën e mbetur të sezonit, pasi klubi bask vendosi ta emërojë në vendin e trajnerit të shkarkuar, Hoze Mari Bakero. Ky i fundit u largua pas humbjes 4-1 në Malaga. Lotina do të jetë trajneri i katërt i Sociedadit në harkun e 14 muajve. Trofeu i vetëm që ai ka fituar gjatë karrierës, është Kupa e Mbretit, në vitin 2003 nën drejtimin e Espanjolit.

Rajkard, trajneri i Barcelonës, u shpreh optimist në prag të ndeshjes që skuadra e tij do të luajë sot ndaj Santanderit, tri ditë para sfidës në Champions me Çelsin. Holandezi tha: "Ronaldinjon e kam parë mirë në stërvitje dhe po i afrohet gjithnjë e më shumë formës ideale. Të njëjtën gjë mund të them edhe për Dekon. Eshtë normale që pas humbjeve ndaj Çelsit dhe Realit, kritikat të bien mbi "yjet" e skuadrës, por po flasim për kampionë që dinë të reagojnë.

Barcelona ka arritur një marrëveshje të re me sponsorin teknik "Nike", në bazë të së cilës do të vazhdojë bashkëpunimin deri në vitin 2013 dhe do të përfitojë plot 150 milionë euro. Firma amerikane synon ta shtyjë deri në 2018-n marrëveshjen, për të arritur një bashkëpunim historik 20-vjeçar. Presidenti Mark Marker tha: "Barça është një nga skuadrat më të forta në botë dhe ajo që dëfren më shumë me futbollin e saj. Jemi të lumtur për rinovimin."



Buzëqeshja e Robinjos, karakteristike për 22-vjeçarin brazilian, është bërë edhe më e madhe që pas ndeshjes me Steauan e Bukureshtit, kur Fabio Kapelo e aktivizoi për herë të parë si titullar. Ai diti të shfrytëzojë rastin. Goli dhe paraqitja në Rumani i dhanë mundësinë ta niste nga minuta e parë edhe "El Klasikon", atje ku të gjithë patën mundësinë të shohin vlerat e talentit të ardhur nga Santosi. Ja cila ka qenë intervista e tij për të përditshmen spanjolle "El Pais"...
- Njerëzit në Brazil ju adhurojnë. Ata ju konsiderojnë një gjeni të futbollit. Gjithsesi, si u ndjetë në fillim të sezonit kur Kapelo ju la në stol?
- Nuk kam pse të shqetësohem, sepse e di se çfarë futbolli mund të luaj dhe besoj tek ajo mënyrë loje. Jam vetëm një fëmijë 22-vjeçar me shumë gjëra për të mësuar. Kam ende për t'u rritur, por e di se duke punuar ashtu si duhet, mund të bëhem numri 1 në botë. Kjo është ajo që synoj.
- Emerson Leao ka thënë se jeni më i zoti për të dribluar sesa për të shënuar gola.
- Kjo ka ndodhur kur fillova të luaja futboll. Që prej asaj kohe jam maturuar. Leao ishte trajneri im që kur isha 17 vjeç. E di që tashmë është më i rëndësishëm fakti që të shënoj gola, megjithatë dua të them se driblimet e mia janë më efektive sesa fakti që të shënoj gola. Duhet të përmirësohen disi në goditjen para portës.
- Gjithsesi, jeni i zoti në driblimin e kundërshtarit, a nuk është kështu?
- E adhuroj driblimin dhe është ajo që di të bëj më mirë se çdo gjë tjetër, por goli ka vlerën e vet dhe prandaj njerëzit e dëshirojnë kaq shumë.
- Vitin e kaluar, Ronaldo shënoi më shumë gola. Ai shënoi 14 dhe ju shënuat tetë, duke mos llogaritur penalltitë.
- Nuk jam një tip lojtari që godas penallti. Kam goditur kur luaja për Santosin, sepse ma kërkonin. Mendoj se këtë vit do të shënoj më shumë, por kjo varet nga progresi im. Viti im i parë këtu ishte i vështirë. Mendoj se vetëm do të përmirësohem.
- Vitin e kaluar, disa nga shokët e tu të skuadrës shprehën shqetësimin se e mbani shumë topin dhe dribloni shumë.
- Shokët e mi nuk më kanë thënë asnjë fjalë. Kam besim të plotë tek ata. Më kanë thënë vetëm se duhet të dribloj dhe pastaj të godas portën. Stafi teknik nuk më ka thënë asgjë të tillë. Kapelo më ka thënë vetëm se unë duhet të vazhdoj të bëj atë detyrë që kam kryer, të njëjtin rol që kam edhe te Brazili.
- Cila është diferenca mes përgjegjësive që keni në përfaqësuesen braziliane dhe atyre që keni kur luani me Realin?
- Markimi i kundërshtarit është i ndryshëm këtu. Nëse humbet topin, duhet të kthehesh në pozicionin tënd. Nuk dua të ndryshoj asgjë në lojën time për sa i përket momentit kur kam topin në këmbë. E di shumë mirë se ç'duhet të bëj. Ky është stili im dhe nuk do ta ndryshoj asnjëherë. Eshtë ky stil loje që më solli te Reali i Madridit dhe në elitën e botës së futbollit. Do të vazhdoj të eci në këtë rrugë.
- Kapelo ka deklaruar se Rauli i pëlqen se luan edhe pa top. Çfarë kuptimi ka kjo për ju?
- Të markosh mirë dhe të luftosh. Kapelo i pëlqen lojtarët luftarakë, ata që nuk bëjnë asgjë tjetër veçse luajnë. Në ditët e sotme, një ndeshje futbolli nuk fitohet vetëm në sajë të cilësive. Prandaj, Kapelo më ka thënë të rikthehem në pozicionin tim.
- Futbollistët e Barcelonës duken më të prirur për të aplikuar futbollin brazilian. Do të ndihe**** më mirë nëse do të luanit në një skuadër të prirur për sulm?
- Nuk ka të bëjë me mënyrën e të sulmuarit, por me atë të luajturit. Barcelona është një grup i bashkuar dhe luan prej kohësh së bashku. Nuk ka rëndësi se cilët zbresin në fushën e lojës, pasi stili është i njëjtë. Kjo i jep besim në çdo moment të ndeshjes dhe është diçka që duam të bëjmë edhe ne te Reali.
- Ju duhet të keni një marrëdhënie të shkëlqyer me Ronaldon. Cili është sekreti?
- Ronaldo është një tip shumë i hapur, luajmë futboll në sallë dhe kësisoj e njohim mirë lojën e njëri-tjetrit. Të gjithë te Reali e dimë shpejtësinë e tij në shkëputje dhe përpiqemi ta ndihmojmë. Roni po stërvitet mirë dhe kur të jetë plotësisht gati, do të kemi një Real edhe më të fortë.
- Kapelo ka deklaruar se do të pëlqente që futbollistët e tij të qëndronin më shumë me njëri-tjetrin jashtë fushe...
- Kemi filluar ta bëjmë diçka të tillë. Pak ditë më parë ishim të gjithë duke festuar datëlindjen e Mishel Salgados, por problemi është se disa janë të martuar, ndërsa disa jo. Prandaj disa shoqërohen më shpesh dhe disa dalin më rrallë.
- Keni pasur vështirësi në përshtatjen e stilit tuaj të lojës me atë të skuadrës?
- Shokët e skuadrës më kanë trajtuar shumë mirë. Kanë qenë të ngrohtë dhe më kanë bërë të ndihem si në shtëpi, kjo është shumë e rëndësishme për një 20-vjeçar. Në Europë loja është më e shpejtë se në Brazil dhe kjo u përshtatet karakteristikave të mia. Vetëm me aksione të shpejta mund të depërtosh në një skuadër që mbrohet me 11 futbollistë.
- Romario dikur ka thënë se nëse do të luanit të paktën në 60% të nivelit që ai ka treguar, do të bëhesh i madh...
- E di, por unë nuk dua të bëhem si Romario dhe për këtë nuk do të jem kurrë si ai. Për momentin mendoj vetëm të dëfrehem dhe këtë mund ta bëj vetëm duke fituar me Realin. Shumë njerëz më krahasojnë me Romarion apo Pelen, por s'më pëlqejnë gjëra të tilla. Unë jam Robinjo.