Deklaratat e Bashkim Gazidedes rrezikojnë destabilizimin e vendit. Sekretari i Përgjithshëm i Partisë Socialiste, Pandeli Majko, kërkoi dje ndërhyrjen e prokurorit të Përgjithshëm për të parandaluar destabilizimin e vendit, pas deklaratave të ish-shefit të SHIK-ut në vitet ‘92-‘97.

“Sot ne presim që prokurori i Përgjithshëm të fillojë procedurat lidhur me faktin nëse dikush ka dëshirë të na provojë se ende jetojmë në një shtet të ligjshëm, ende jetojmë në një vend që aspirojmë të jemi pjesë e Bashkimit Evropian dhe jo në një vend xhungle, ku njerëz pothuajse gjysmë mostra kërkojnë t’i kthejnë këtij vendi destabilitetin”, tha Majko. Gjithashtu, sekretari Socialist i bëri thirrje “Presidentit të Republikës, prokurorit të Përgjithshëm maxhorancës, përfaqësuesve të saj që të reagojnë përballë ngjarjeve të tilla, të cilat socialistët i cilësojnë shumë të rënda”. Sipas Majkos, “ajo që realisht e shikojmë është një tendencë në rritje për të nxitur një formulim të shtetit informal në Shqipëri dhe ky shtet informal aktualisht po drejtohet nga kryeministri Berisha. Ky shtet aktualisht nuk po respekton Kushtetutë dhe sistemin kushtetues të Republikës së Shqipërisë”. Dy ditë më parë ish-shefi i SHIK, Bashkim Gazidede, në emisionin “Opinion” në TV Klan të gazetarit Blendi Fevziu, shpërndau akuza mbi opozitën për ngjarjet e ‘97, por akuzoi dhe pasardhësin e tij, Fatos Klosi, për zhdukje të oficerëve të shërbimit. Sipas Majkos, deklaratat e ish-shefit të SHIK-ut, bëhen dhe nga tronditja që ka zënë radhët e Partisë Demokratike nga hapja e dosjeve të Sigurimit të Shtetit para viteve ‘90. “Ky njeri që deri më sot ka heshtur, dje ka dalë për të qartësuar sipas opinionit tim, një poker spiunësh, i cili ka filluar brenda radhëve të Partisë Demokratike. Duket qartë se ligji ‘Për transparencën e të kaluarës së ish-bashkëpunëtorëve të Sigurimit të Shtetit’ ka ngjallur goxha probleme me pronarët e “sektit të shpirtrave të mallkuar” në Partinë Demokratike dhe dje ky njeri për të përfaqësuar jo vetëm veten, doli dhe tundi zinxhirët e vjetër dhe prangat e reja”, tha Majko.

Gazidede: Ishte revolucion komunist

Ish-shefi i Shërbimit Sekret në vitin 1992-1997 është rrëfyer në emisionin “Opinion” të gazetarit, Blendi Fevziu në TV Klan. Gazidede ka treguar se si është ngjitur në majën e SHIK-ut, marrëdhëniet me Berishën, piramidat, zhdukjen e biznesmenit Remzi Hoxha, dosjet e sigurimit, si dhe rolin e tij në revoltën e vitit 1997. Gazidede hodhi akuza të rënda për eksponentë të opozitës aktuale dhe pasardhësin e tij në këtë shërbim, Fatos Klosi, për zhdukjen e dy oficerëve të shërbimit. Ish-shefi i SHIK akuzoi opozitën si nxitëse dhe organizatore të revoltave të ’97 me kontigjentë të Sigurimit të Shtetit, por iu shmang dhe shumë pyetjeve të gazetarit Fevziu.

Informacione eshte marre nga Gazeta Panorama